mlogo

بابكر سلك

بابكر سلك

فضائية مميتة

> كشفت الثورة الشابة عن تخريفات كهول عجيبة
> تخيل يا اخي الحبيب
> فضائية تسبح في الفضاءات الاعلامية وتصل جل العالم
> تفرد اجنحة شاشتها لاسقاطات مخجلة وببجاحة متناهية وقوة عين لاتعرف الحياء
> اخي الكريم
> ثورتنا الشابة وصلت لكل العالم برغم مواقف الاعلام المرئي الداخلي وقصور الاعلام العالمي في بداياتها
> ثورة انتشرت ونشرت نفسها بايدها وشديدها
> لانها ما كانت ثورة سياسة بقدرما كانت ثورة على الاخلاق
> ولكن اخي الكريم
> يصر البعض على التمسك بتلك الاخلاق الساقطة التي قامت لاجل ابادتها الثورة
> ثورة لاتعرف الكذب
> ولكنها تحارب الكذب والتلفيق والتلتيق
> ثورة ادهشت العالم بسلميتها رغم وحشية محاولات قمعها
> ثورة ألجمت الخونة حجراً في حلاقيم كذبهم الغريقة التي يكذبون من خلالها علي انفسهم ويعتقدون انهم يخدعون الناس وما يخادعون الا انفسهم
> ثوار احرار شباب اصحاب قيم واخلاق وولاء للمواطن والوطن
> قدموا الارواح فداء للثورة وبدلوا الافراح اتراحاً لاجل الوطن الحزين
> فيهم من خرج من الثورة بعاهة دائمة
> وفيهم من يعاني نزف الجراح والآلام حتى كتابة هذه الاسطر
> وبعد ده كلو تطل علينا تلك الفضائية القبيحة خلقة واخلاق
> لتصف الثوار والكنداكات بالزناة والسكارى والخارشين والمساطيل
> بربكم الا تستحق تلك الشاشة المحاسبة قبل المقاطعة الابدية؟؟؟
> الآن فقط عرفت لماذا هي فاشلة اصلاً ومقاطعة حتى من قبل الثورة
> فضائية يجب مسح ترددها من كل الاجهزة والى الابد
> قرف يقرفكم
> حتى الثورة على الاخلاق ماخجلتكم من اخلاقكم القبيحة؟؟؟؟
> المهم
> هلالابي قال لي عندنا ستة كور دقت في الحديدة
> قلت ليهو انه عهد العدالة المابشتغل فيهو تحكيم ولاتنجيم ولا محاباة
> حاتعيشوا طويل وتاخدوا غيرها كتير
> فالتنافس بالمؤثرات قد ولى
> واخاف على الهلال في عهد العدالة من اللعب في مجموعة كوستي آخر الموسم المقبل
> ايها الناس
> الكهرباء ورتنا الطفا النور منو
> فكان الهتاف المزيف السد السد
> وجاءت القطوعات الرد الرد
> فهل ماندفعة ثمناً لهذه القطوعات سنحاسب به من أتى الينا بتلك الأجهزة البالية
> ام نكتفي فقط بالدعاء عليهم كالعادة؟؟
> المهم
> سمعت انو واحد من الناس الجوة الجك طلب السماح له بزيارة والدته
> والدتك بالتا؟
> ياخ انتوا حرمتوا امهات من شوفة اولادهن مدى الحياة
> ياخ انتوا حرمتوا شباب من شوفة الدنيا مدى الحياة
> ياخ انتوا حرمتوا اسر من اولادها
> واولاد من اسرهم
> ياخ انتوا حرمتوا الناس من وطننهم
> وحرمتوا الوطن من ناسو
> تقول لي اشوف امي ؟
> ماما مافي ببح .. فطموك يا الحبيب
> ضوق فقدان الحليب
> ياخ انتوا حرمتوا الزول من ماهيتو
> تقول لي امي .. الجمه
> ايها الناس
> الكاس كاسنا
> والفي كاس كاسنا
> ونحنا اهلو ونستاهلو
> اخي الحبيب انها ثورة اخلاق وعلى الاخلاق
> اليابان ما فيها دين
> لكن اخلاقها عالية
> عشان كده مابكذبوا باسم الدين
> ولابكذبوا باسم عدم الدين
> ايكذب المؤمن يارسول الله؟
> ايها الناس
> إن تنصروا اللـه ينصركم
> اها
> نجي لي شمارات والي الخرتوم
> بالقطوعات الكتيرة دي
> عرفنا منو الطفا النور يا والينا
> لكن الازمات الفينا
> ناس الجاز والفلس والبنزينا
> ماعرفنا سببها منو يا والينا
> المجلس ولا قوى التجمع
> ولا مسودة الاتفاق
> ولا العقالات ..ورينا
> الصفوف جننت الناس وطلعت..عينا
> عينا يا والينا
سلك كهربا
ننساك كيف والكلب قال شفت العقال المزيف قاعد وسط العقالات الاصلية زي التمرة الكعبة وسط صحن التمر..الله يقطع التقليد
والي لقاء
سلك

Who's Online

440 زائر، ولايوجد أعضاء داخل الموقع

Search