mlogo

اقصي المدينة

قصة المستهبل مع الخليفة عبدالله

> يقال إن أحد المستهبلين، كان عدمان المليم...جاتو فكرة و ركب الموجة...
جاء للخليفة عبدالله التعايشي رئيس دولة السودان آنذاك وقال ليهو:
سيدي الخليفة انا عندي وجع اضان و الدكاترة كلهم ما عالجوني ...ورأيت لي رؤية انك لو رقيت لي في اضاني دي بشفي وان كان الشفاء من الله...
> الخليفة قال ليه : سمح المبروك تعال لي بعد صلاة العصر... الخليفة صلى بالانصار العصر و ناداه (( فلان ود فلان )) تعال برة هنا ..
الراجل مشى طوالي على الخليفة و الخليفة مسكو وقعد يقرأ ليه في آيات قرآنية في اضانوا بي صوت خاااااافت... وبعد ما خلص الرقية المستهبل رجع الصف الوراء و الخليفة ركب فرسه وفااااات...
> الأنصار جوا على الراجل قالوا ليه ..
المبروك شن نفرك مع الخليفة ؟
و بتوسوس معاهو قال ليك شنو؟
> قال ليهم :
الخليفة قال داير يعين وزراء جُداد لنج في كل السودان وقال اي وزير لازم يكون شريفي جَدو النبي....و قال لي سجل الأشراف في ورقة بيضاء و ارفعها لي بعد اسبوع....و الشريفي منكم خليهو يجيني اسجله في البيت...
كل واحد من الجماعة مشى ليه في البيت و دفع جنيه عشان يسجلو في الورقة بتاعة الأشراف...( الوزراء المرتقبين )..
يومين المستهبل طلع بي مبلغ محترم وعمل نائم...
و الخليفة ما عيًن ولا وزير جديد ولا رفد وزير قديم... الجماعة قالوا ليه يا تدينا قروشنا يا نكلم الخليفة... قال ليهم : كدي شيلوا الصبر شوية وانا بمشي اسال الخليفة...
المطبلاتي مشى للخليفة وقال ليهو : يا سيدي الخليفة والله اضاني العملت لي فيها الرقية بقت تسمع دبيب النملة في الحجر ...عشان كده لازم بعد صلاة العصر ترقي لي في اضاني التانية...
> العصر الخليفة نادى ( فلان ودفلان ) تعال برة... ومسكو ورقى ليهو في اضانو التانية. ..و ركب الفرس و فاااات....
> الأنصار الاتسجلوا في ورقة (الأشراف) جوا للمستهبل وسألوه اها الخليفة قال منو ومنو .؟
> قال ليهم والله الخليفة قال كلاااااام نُكرررر .كلاااام حااار...
الخليفة قال الاسبوع الجااااااي ح يولع تقااااااابة بتاعة نااار و يجيب الناس المسجلين ديل يدخلهم في النار واحد واحد... عشان يعرف الشريفي الاصلي من الكضاب!
ويا جماعة الشريفي النار ما بتحرقو و أما الكضاب منكم يلاقي الله ويلاقي النار ويلاقي الخليفة عبدالله .. وانا من دربي ماشي أسلم الورقة للخليفة .
> يا اخي الجماعة ديل رقدوا سلطة.. سلطة روب بالعجور... وبدأوا يحنسوا في المستهبل ده يومين : المبروك اخوي عليك الله تمسح اخوك عشان انا شريفي من امي بس ؛ المبروك انا ما شريفي بحب الأشراف فوق الله والرسول يا أخوي تمسح اسمي !
المبروك عشان يمسح اساميهم في الاخر وافق بشرط اي زول عشان يمسح اسمه من الورقة يدفع خمسة جنيه.. والله الزول ده كان حضر زماننت دا والوزراء يمشوا يقروا الغيب عند المشعوذين كان طلع ليهو بي بنك بنكين ومية قطعة ارض درجة اولى ..

من حكايات د. أحمد الطيب إبراهيم

Who's Online

3578 زائر، ولايوجد أعضاء داخل الموقع

Search