الأحد، 25 شباط/فبراير 2018

board

التش والعون الغذائي

> بعد رفع الحظر واستشراف عهد جديد
> لا بد لليل ان ينجلي
> ولا بد لعنكبوت البطون ان يرحل

> ولا بد من ظهور رفع الحظر في صينية غدانا
> وفي صحن عشانا
> وفي ساندوتشاتنا البين الوجبات
> ولا بد للشحم ان يظهر على قفانا
> سنعود سلة غذاء للعالم واقعاً لا شعار
> والزاد كان ما كفى اهل البيت يحرم على الجيران
> البيض من أهم العناصر الغذائية
> للكبير وللصغير
> وطار راح الطبق وصل ستين الف جنيه
> اليومين دي فيهو نزول (عقبال الدولار)
> لكن لو دايرين نوفر دستة جني جداد لكل مواطن يومياً
> علينا بالاهتمام بتطوير وزيادة انتاج الجني جداد
> وعشان نعمل كده يجب ان تستفيد الدولة من امكانات التش في هذا النوع من الانتاج.
> الدولة لو وفرت الجو المناسب للتش
> صدقوني طبق البيض حايبقي بجنيه
> التش ده عون غذائي عديل كده
> ايها الناس
> نعيش بفضل الله احلى ايام فريق الكرة
> وشهر العسل هذا يجب ان نعمل لاجل استدامته لتصبح ايامنا كلها عسلاً وما ننوم في العسل لنفيق على لمة النمل الكملت العسل وشبكتنا قريص.
> بالذات النمل اب ريش
> ده حاقد شديد
> عشان كده نحتاج لاعداد فني جيد وبدني متطور ونفسي علمي جداً.
> كي تكتمل الصورة لا بد من الجد والاجتهاد اكثر.
> لم رجلينك التش في المنطقة
> الحكم زاتو قالوا لم رجلينو
> المهم
> طموحنا محطته الاخيرة ليست فريق كرة القدم طبعاً.
> نريد في هذه المرحلة ان نصل بفرق مناشطنا لمستويات تليق بالمريخ وحيد البلد.
> ولن يتأتىي لنا ذلك الا بوقفة شعب المريخ القوية.
> بالذات شفوت القروبات
> ونريد في هذه المرحلة ان نطور نادينا للدرجة التي تليق بمكانة المريخ وشعبه
> مكتبة وصالة للنت وتفعيل لقدرات الاعضاء ومقدراتهم في تقديم الخدمات الطبية والصيدلانية والقانونيه والهندسية والعلمية والعملية للمجتمع عامة ولشعب المريخ بصورة خاصة.
> نريد ان نفعل كثيراً من قدرات الامة لصالح الكيان
> وستبهركم جمعية الحدادين والنجارين المريخاب.
> نريد لاستادنا ضبطاً وربطاً يمضي بالمشاهد السالبة من غسيل ركشات في شرقه وسوء حال جنوب المسجد واباحية للمارة ماخذين منه معبراً.
> لا بد من ضبط المساحة بين السور والاستاد ووضع بوابات لها تمنع الكثير من مظاهر الهمجية والفوضى.
> نريد لواجهة نادينا ان يختفي عن مشهدها ذلك الخور القبيح الذي وصل عمره سنين عددا.
> لنا الكثير من الطموحات
> لا يقوم بها الا شعب المريخ
> ايها الناس
> تحدثت للأخ شمس الدين عضو المجلس في ما يخص مشكلة بائعات الشاي.
> حقيقة أقنعني الرجل بحسن النية ونبل المقصد
> بل بالوقوف الي صفهن ولكن بنظام وتنظيم ومواعيد.
> وخصص لهن المكان المناسب حفاظاً على معانٍ كبيرة وسامية
> فقط نرجو المساعدة علي التطور وابراز الوجه المشرق.
> وأعجبني في حديث شمس ضبط المقصورة والزام الذين اعتادوا الجلوس عليها (ملح) بسداد التذكرة دعماً للمريخ او افساح الكرسي لمن يسدد قيمته.
> كثير من المظاهر السالبة تحتاج لتغيير.
> ويسهل التغيير وسط المجتمعات الراقية بكل سهولة
> والمريخ مجتمع راقي
> ايها الناس
> امس مشيت سوق البصل
> قالوا لي الربع بي اربعين
> قلت ليهم ليه؟ امريكا قالت بعد رفع الحصار الحاجات رخست.
> واحد قال لي امريكا زارعة بصل هنا؟
> نطة واحد تاني قال لي امريكا البتتفاصح دي دولارا الليله بي كم؟
> شلت ملوة بي عشرة ومشيت
> ايها الناس
> ان تنصروا الله ينصركم
> اها
> نجي لي شمارات والي الخرتوم
> شفت يا والينا
> قصة البصل الفوق دي والاتقال لينا؟؟
> احترنا يا والينا
سلك كهربا
ننساك كيف والكلب قال اذا ده سعر البصل بعد رفع الحظر الحصل امريكا حقو تلم جدادها.
والى لقاء.
سلك

الأعمدة

د. عارف الركابي

السبت، 24 شباط/فبراير 2018