الثلاثاء، 21 تشرين2/نوفمبر 2017

board

كوني النجمة

> كانوا قاعدين مبسوطييييين
> يتفرجوا في ركبة جابسون ويسألوهو

> ركبتك كيف يا جابسون
> وكانوا وقتها غالبين واحد
> أها في الدقيقه اربعين الشوط التاني
> دخلوا جابسون وفقدوا متعة النظر للركبة وفقدوا معها التقدم
> ركبة جابسون خضراء
> المهم
> قالوا العيب في خالد بخيت
> خالد بخيت في آخر تلاتة مباريات او قل آخر تلاتة درونات اشرك كل الكشف عدا اب ستة ومكسيم
> ما فضل ليهو الا يشرك اب كسكتة وفطومة وروشا
> خالد بخيت يجيب ليكم لعيبة من وين؟
> تسجلوا براكم يا روشا
> وتطمبروا براكم يا فطومة
> وتجوا ترموها في ود بخيت؟
> خليتوا الحتانة ومرقتوا في ود البخيت وترموها في ود بخيت !
> القصة ما قصة مدرب
> القصة ما قصة تشكيلة
> القصة قصة مواهب
> والدليل انو الهلال جاب للمواهيم ديل تلتين مدرب ما نفعوا
> وشعب الهلال يردد
> القصة ما مقصورة القصة فن في الكورة
> التششششششش
> في كورة هلال الابيض محمد موسى لقي كورة في خط تلاته
> وداها السما الاحمر
> وكأنه قال ليها كوني النجمة
> محمد موسى لعبوا كلو يوطي الشورت ويعلي الكورة
> الزول ده قولوا ليهو الكورة واطة يا حبيب
> المهم
> طار كيس خالد بخيت كاسلافه من مدربي الهلال
> والبرازيلي خير خلف لخير سلف
> كيسو جيلاني
> خفيييييييييف
> والدنيا شتاء
> والهوا كتير
> البرازيلي ده كلموهو عن التش يا روشا
> عشان ما يتفاجأ
> قولوا ليهو لما يكون التش في المنطقة اقفل كرعينك شديد
> جنى الجداد البرازيلي مرغوب شديد
> المهم
> اتحاد شداد يصر على انهاء الموسم بدري
> على الطلاق يا شداد لو ما الحكام بخطئوا ولا يظلموا
> كان جيت لقيت الدوري ده انتهى بدري
> وهسي نحنا فيها
> قول للحكام قللوا الاخطاء
> على الحلف بعد اسبوعين الدوري ينتهي
> المهم
> تشرفنا بنيالا وهي تشرفت بنا
> وشفوت نيالا يتحرقون شوقاً لمشاهدة مزارع التش للجنى جداد بتاع العون الغذائي
> ننشد عروضاً قبل النقاط
> لأن جمهور نيالا من حقه ان يستمتع
> وحقو جمهور نيالا يكون حقاني
> الواحد فيهم بعد ربع ساعة من بداية الكورة حقو يطلع بره الاستاد ويقطع تذكرة تانية ويدخل
> التذكرة الاولى بتكون كملت
> ففرقة الموسيقار محمد موسى لا تتساوى مع فرقة حسب الله يعلم الله
> معقولة زول يتفرج في التش والسماني وميدو وبيبو وحبيبو والنعسان وبكري وعاطف خالد بعشرة جنيهات؟
> ويتفرج على الدمازين واوتارا وكابو واب ستة وجابسون وبشة وابو عاقلة برضو بي عشرة جنيهات؟
> اذا كانت الفرجة على السماني ورفاقه بعشرة جنيهات
> حقو لما تجي تتفرج على الدمازين والبلدوزر وجابسون واب ستة
> يغدوك ويوصلوك ويدخلوك ويدوك عشرة جنيهات
> لانو ده عذاب مافي زول بتحملو الا يكون هلالابي
> يكون لديهو قوة تحمل صفرية قوية
> المهم
> لدي صديق بوركيني فاسوسي قال لي اسأل لي روشا يا سلك
> وللأمانة انقل ليكم حواره
> قال لي بالبوركيني فاسوسي
> سالووكي عالوكي رابوبي ساؤولي راشودي قاوولي لاهوهي صاحوحي باعودي كاووري كانوني فاووي كاسوري مانوووني طاروفي وهاتوفي ضاضوضي كاسكوتي؟
> يعني سلك عليك ربنا اسأل الرشيد قول ليهو صحي بعد الكورة كان في كسر من طرف وهتاف ضد أب كسكتة؟
> ضاضوضي دي يعني ضد
> قلت ليهو بالبوركيني طبعاً
> كاسوري؟ ساجووومي
> أيها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> بعد نظرة الأمريكان اتغيرت لينا
> وبعد الزمن غيرتوهو لينا
> الترس التقيل ده حقو تغيروهو لينا
> قده مكنتنا يا والينا
سلك كهرباء
ننساك كيف والكلب قال السواقة بي نمرة واحد المسافة دي كلها بتقد المكنة وتغير التروس .. دي ما سواقه دي .. غيروا الـ «…» ولا خلاص.
وإلى لقاء
سلك