الخميس، 23 تشرين2/نوفمبر 2017

board

تعادل منطقي جداً

> خسرنا تفردنا بنقطتين خسرناهم بنيالا الساحرة بالأمس
> من وجهة نظري كان التعادل منطقياً جداً

> احصائياً لا ميزة كانت لنا على الوادي نيالا
> حتى الاستحواذ تقريباً متساوي
> بالذات في الشوط التاني
> الأسباب عندي وبدون مجاملة هي كالآتي:
> فشل محمد موسى تكتيكياً في حل شفرة التكتيك الدفاعي القوي لوادي نيالا واصراره على اللعب بمهاجمين فقط وميزة المريخ و قوته التي تجبر الخصوم على التراجع هي الهجوم
> فكان عليه اشراك مهاجم ثالث من البداية
> أما السبب التاني و الأهم هو فشل أولادنا في اللعب تحت ضغط أولاد الوادي
> فلعبوا على الواقف
> محمد عبد الرحمن كعادته استسلم للرقابة المقصية عليه ولم يحاول مجرد محاولة للإفلات منها
> التش استسلم للرقابة الشديدة والضاغطة عليه
> فغابت المهارة
> والغريبة ميزة المهارة هي ظهورها في مثل هذه الأوقات
> فان كان مجرد اللعب الضاغط يوقف مهارة اللاعب المهاري
> يبقى مافي داعي للمهارة
> ومن الأسباب الأساسية إنو التكت ماشي في النازل
> السبب شنو ما معروف
> أيها الناس
> الغرور يجب ألا يقتل روح الإصرار
> ونفسياً نحتاج لإعداد جيد جداً
> سامعني يا أعضاء مجلسنا الموقر ??
> المهم
> من واقع المباراة ما كنا نستحق النصر إطلاقاً
> وليتها تبقى عترة تصلح مشينا لنهاية الموسم
> هاردلك الجهاز الفني
> وهاردلك اللاعبين
> ولكني أجدد النداء
> المعد النفسي يا نااااااااااااااااااااس
> المهم
> أشعر بأن هناك خير كتير قادم وخبر سعيد شدييييييد
> قدر ما أطرد الإحساس ده
> يتاورني من جديد
> اللهم اجعلو خير
> خير كتيييييييير
> المهم
> تمس قالوا الفيفا جابت خطاب تحكي فيهو عن متأخرات وارقو
> وراقو الزماااان داااااك
> بالله وارقو عندو قروش لي أسي عندنا ?
> يطرشنا
> علي العموم قروشو مشت ليهو
> الله بيننا وبين حق الناس
> أيها الناس
> لا داعي للقلق
> فالسكري ضارب بغلة عبد الخير ووقفاتها حاتكتر
> والانسولين البرازيلي ما بعمل حاجه مع عشرة صلايب سكري دي
> القصة اسيتون عديل كده
> وبعدو الضقلمة
> اللهم لاتعولقنا لا تخولقنا أنت مولانا فانصرنا على القوم البقيف في طريقنا
> ايها الناس
> أحر التعازي للأستاذ عبد الصمد محمد عثمان في رحيل والدته التي نسأل الله أن يجعلها من أصحاب اليمين و يصبر أهلها ولايفتنهم من بعدها
> أيها الناس
> ألف حمداً لله على سلامة الأرباب بعد الجراحة التي أجريت له
> حمد لله ألف على السلامة يا أرباب
> يا الحبيب تسبيع
> قلوبنا معك أينما كنت وحيثما كنت
> إلا في داخل الملعب
> نحنا ماناسك
> نحنا حمر شديد
> لكن بره تمتزج الألوان عشان يسود علم السودان
> أيها الناس
> لاتفوتنا تهنئة الحبيب الجميل حافظ الزين الذي لعب ضربة البداية لمراسم زواج ميمون بإذن الله
> ومعاك يا حافظ من هنا لي نهر المسيسيبي موش نهر النيل بس
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> بعد لغيتوا الزمن الكعب ورجعتوا لينا زمنا
> طمعنا
> قلنا إن شاء الله تشيلوا مناهجكم وترجعوا لينا مناهجنا
> تقفلوا مدارسكم وتفتحوا لينا مدارسنا
> تقللوا وظائفكم وترجعوا لينا بعض من وظائفنا
> تشيلوا الفشل الكلوي والسرطان وترجعوا لينا ملاريتنا
سلك كهربا
ننساك كيف والكلب قال يا حليل زمان ملاريا نرقد تلاته يوم و نقوم نحوم… اسي حايم ترقد الرقده الياها
والي لقاء
سلك

الأعمدة