الأربعاء، 17 كانون2/يناير 2018

board

حكاية أحمد بانقا

> أحمد بانقا ده ما أخو حوش بانقا
> اسم على اسم ساي
> احمد بانقا لابضرب بوري ولا ساكن كافوري

> لكن بكره الدافوري
> اها
> احمد بانقا ده هلالابي كبييييير
> قدرو كده
> هلالابي متعصب
> لكن كتر عليهو
> مكنة القوة المالية الضاربة
> ومكنة الافتتاح يوم حداشر حداشر
> ومكنة سجلنا الأحسن من ميسي
> كل المكنات دي ما قسمت عند احمد بانقا
> ولان احمد بانقا بكره الدافوري
> قرر ترك ناس الدافوري والانتماء لبطل الدوري وسكنة كافوري وضرب البوري
> احمد بانقا رسل لي رسالة يعلن فيها إيمانه التام و الكامل وانتمائه للزعيم
> يقول احمد بانقا في رسالته
> صبرنا علي هلال فطومة الكتير
> وصبرنا فاق صبر ايوب
> انا شخصياً بحب متعة الكرة وبحب الصحة والعافية
> واذا واصلت في تشجيع الهلال حا اكون مريض سكري وعضو في جمعية مرضى الضغط ومؤسس لرابطة الإسهالات المائية السودانية وصديق للصداع النصفي
> من الآن إخوتي الهلالاب الأوفياء أنا مريخابي ومريخابي متعصب كمان
> مالي ومال وجع الراس
> أخي الهلالابي تعال ومعك آخرين الى حيث المتعة الى حيث الروعة الى الانتعاش
> عجوبة خربت سوبا
> أخوكم المهتدي المريخابي المتعصب احمد بانقا
> غايتو جنس غايتو
> بشششتنة
> اها
> أمس السلاطين حافظوا على سجلهم خالٍ من الهزائم على ارضهم في مواجهة الزنطور
> ولو ابراهيما خت الرحمن في قلبو
> صدقوني كان طارق المعتصم غشي شداد جاب لينا الكاس وجا
> علي الأقل نقفل بيهو سيرة كاس السد وتمنو نازل في الميزانية ولا لا
> الأندية الكبيرة ممكن تبيع لاعب مهم جداً اذا مرت بضائقة
> خليهو كاس
> ولأنها أندية كبيرة بالطبع بظهر تمن البيع في ميزانية النادي كإيراد
> وذلك لأنها أندية كبيرة
> دي ما المشكلة
> المشكلة الحصل أمس ده
> كورة صفر
> أخلاق صفر
> نتيجة صفر صفر
> والله الهلال بقى مليار بس
> كلو أصفار
> دي حكاية احمد بانقا
> اما قصة حيدر اب ستة فغريبة جداً
> أب ستة هلالابي قدييييم
> عرف الهلال من زمن بجيب الكورة من ورا الشبكة
> لما الهلال سجل اب ستة
> اب ستة الهلالابي قال لي اصغر اب ستة في البلد دي انا
> وعمري الآن تسعة وخمسين سنة
> ده سجلوهوا ليه
> قلت ليهو يمكن كردنة بعد يتم الفرجة عللا ركبة جابسون بكون داير يتفرج على كالسيوم اب ستة
> باقي اب ستة شدة ما عندو كالسيوم
> اصبعو الصغير فيهو شق تسعة شهور ما جبر
> ايها الناس
> هتفت جماهير السلاطين بالامس
> الليق الليق يا
> يا شنو ما سمعت كويس
> قلت يمكن يا عواجيز
> اسلام قالت لي ما قالوا يا عواجيز
> عواجيز في الميدان امس غير كاريكا وبشة مافي زول
> قلت ليها طيب قالوا يا شنو؟
> قالت لي قالوا الليق الليق يا خوازيق
> قلت ليها امس غير كابو الخازوق منو؟
> قالت لي امس الماخازوق منو بس وريني؟
> قالت لي الخوف ما يكونوا قالوا الليق الليق يا خوازيق
> قلت ليها يعني حايكونوا قالوا الليق الليق يا لواييق؟
> اها
> نرجع لي حكاية احمد بانقا
> قلت ليهو يا احمد القلب بحدث سيدو كتييير قبل اكتمال الهداية
> بتتذكر لحظة الهداية يا احمد ?
> قال لي لما كانت ماشة بنمرة اربعة ومامادو خت ليها الخلف بدون ماتتكسر التروس
> ده اللحظة بتاعت هدايتي الكاملة
> الحمد لله
> ايها الناس
> مهما كان الأهلة الشرفاء ديل أخواننا
> ولذا تجب علينا نصيحتهم
> العلاج يا روشا ويا فطومة ويا شجرابي ويا قسم خالد ويا خالدونا ويا محمد عبد الماجد ويا رمضان ويا صديقي محمد الامين
> العلاااااااج
> وقبلكم وحدكم مرضكم خطير
> العلاج الناجع هو الحل
> والعلاج الناجع هو الكي
> تاخدوا ليكم تشتين تلاتة وبإذن الله تصبحوا طيبين
> لما تتشوا ماتكوركوا تضحكوا الناس فيكم
> أكلوها غميتي
> ايها الناس
> واحد قال لي الكورة انتهت والحكم جاطها عشان يعيدوها
> قلت ليهو ما للدرجة دي
> لكن لو عادوها في مصلحة السلاطين
> بضمنوا التلاتة نقاط
> ايها الناس
> الجوهرة ما تم افتتاحها يوم حداشر حداشر لكن كان حضوراً التعادل رقم حداشر
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> جاتنا موية في الراس ماشكينا
> جاتنا موية في الرئة ما أبينا
> جاتنا موية في العيون سالت علينا
> جاتنا موية في الركب اصطكت كرعينا
> ده كلو ما سألنا يا والينا
> لكن حكاية الموية السطحية الانفقعت فينا دي البتودينا يا والينا
سلك كهربا
ننساك كيف والكلب قال بالموية السطحية ممكن تكون نايم تلقي جمبك سمكة… يجيبوا ليها الزيت من وين دي كمان !!!!
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018