الأربعاء، 17 كانون2/يناير 2018

board

طيارة بدون طيار

> أيها الناس ماهو موقف المريخ من الكوتش محمد موسى؟
> أنا غايتو لو سألوني بقول
> المجلس يجدد الثقة في المهندس كمدرب عام للأسباب التالية:

> أولاً محمد موسى قضى فترة كافية مع اللاعبين أهلته لتفهمهم جيداً وخلقت لهم إلفة ومعرفة للتعاون معه.
> ثانياً انضباط محمد موسى ودغريته مطلوبة ومرغوبة و مفيدة في حال عمله مع مدير فني أجنبي.
> ثالثاً استمرار محمد موسى كمدرب عام مع خبير أجنبي يزيد موسى خبرة ويصقله أكثر.
> الأمر الذي يؤدي لإعداد مدرب وطني من أبناء النادي وشاطر يغنينا عن الاستعانة بالخبرات الأجنبية مستقبلاً بالذات والدولار بالطريقة دي بعد سنة ممكن يوصل السما.
> رابعاً إن محمد موسى هو أكثرنا ألماً لما حدث في آخر مباراتين وأكثرنا علماً بالأسباب التي أدت الى ذلك.
> يبقى الراجل أحق الناس في شغل المنصب إن كنا نريد الاستفادة من تلك العثرة.
> عشان كده أناشد مجلسنا بالعقلانية في ملف محمد موسى
> المهم
> في ناس ما بتتحمل الجرعات الزائدة
> عشان كده بتحصل البشتنة ورقاد الواطاة ورقاد المستشفيات
> للعمر أحكام
> واتنشطي واتبشتني واترقدي
> المهم
> تمت التسوية في واحد من أهم مشكلات سوداكال
> إن شاء الله يوم شكرك ما يجي يا ود بانقا يا أخوي
> فضلت إشكالية واااحدة وبسيطة وموعدها الأحد
> وبعد داك يبقى القمر طالع نلاقيهو يوماتي في الشارع
> مرقة مع بداية التنقلات
> مرقة بتمرق الجرجير
> والله قال ليك فيهو جرجير من زمن أب صلعة الفي الدولار مخنفس
> قاااعد في الحفظ والصون
> عليك الله ياسوداكال
> ما تجيب لينا شرائح ما منشطة
> شريحتين من المنشطات ديك
> واحدة صغيرة وواحدة كبيرة
> يعني واحدة دفع مقدم وواحدة خط
> في الآخر الشريحتين ببدن بي صفر
> واتصفري
> المهم
> جابت ليها هتلر كمان؟
> نازيون جدد؟
> وحريق؟
> هو في موية شراب لمن تجيب ليها موية مطافي؟
> بعد تلك المأساة رجعت البيت
> إسلام كانت حاضراها في التلفزيون
> سألتني
> إنت يا بابا الراجل الراسمنو ناس الهلال أبو نص شنب ده منو؟
> قلت ليها ده عمك هتلر أب نيران
> قالت لي مالوا؟
> قلت ليها حرق ليهو سبعطاشر مليون إنسان حي
> قالت لي إنت جادي؟
> قلت ليها فيهم المسلم والمسيحي وفيهم اليهودي
> قالت لي و الكلام المكتوب ده شنو ؟
> قلت ليها مكتوب هولوكوست
> قالت لي ده دواء؟
> قلت ليها أبداً
> ديل الناس الحرقهم هتلر وحرق معاهم فشفاش اليهود لي الليلة
> قالت لي والهلالاب مالهم مع اليهود؟
> اليهود ديل موش كانوا جيران الرسول صلي الله عليه وسلم
> وموش بينهم وبينو كان في تعامل وعهود؟
> قلت ليها كان
> قالت لي وعلاقة هتلر وحريق الناس حيين بالرياضة شنو؟
> قلت ليها الفهم كده يا بتي
> قالت لي أسي في داعي للمشاكل دي؟
> قلت ليها الله يستر
> قالت لي ده الكلام البجيب الطيارة بدون طيار
> الطيارة المابتغشى المطار
> وسوق البصل حايبقى حدو الجنوبي جامعة ام درمان الإسلامية
> واتبصلي
> المهم
> بمناسبة ذلك
> مريخابي مبدع في القروبات
> شاف في القروب الصورة وتعليق واحدة من منظمات دعم الإنسانية على الموضوع
> قال أنا ما بعرف إنجليزي
> لكن الخط المكتوب بيهو الكلام ده معناهو الهلال موضوعو استحمى
> المهم
> حدث الساعة تفجره تريعة البجا
> وحقو الاتحاد عشان يخرج من هذا الحرج
> و عشان يخرج من حرج عقوبات الفيفا المتوقعة بإيقاف نشاط نادي الشماته على الهولوكوست
> حقو الاتحاد يضرب عصفورين بحجر
> يقول للفيفا جمدينا كلنا
> منها نادي الشماته على الهولوكوست مايزعل
> ومنها بلوة تريعة البجا الجابتها دي الاتحاد يلقى ليهو مرقة منها
> أيها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> ماعارفين أي حاجة بقينا
> نقصنا ولا تمينا
> عمرنا ولا حجينا
> ضحكنا ولا بكينا
> ثبتنا ولا جرينا
> سخنا ولا حرينا
سلك كهربا

ننساك كيف والكلب قال لو فهمتوا حاجة أبقوا قابلوني.. وهزا ضنبو ورقد مافاهم اي حاجة
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018