الأربعاء، 17 كانون2/يناير 2018

board

في خوف

> كان عندنا شافع شليق
> يهبش ده ويختف ده ويجر الملاية بعد امو تفرشها
> يكشح الموية الفي الكباية بعد المسح

> لايخلي العطشان يشرب
> لا يحافظ علي نضافة البيت
> يادوبك كان بتعلم في الكلام
> وبعد ده فصيييح ونضام
> نضام جنس نضمي
> هو نضمي نصاح
> يهضرب يهضرب خشمو ده مابسكت
> انا غايتو بتوقع ليهو مستقبل سياسي باهر
> الود ده حايطلع دستوري كبير
> المهم بي فصاحتو دي خواف
> ولا داسيها
> بعد المغرب حته مضلمة مابدخلها
> يقول انا بخاف
> انا هاف
> ياخ مرة قلت بي صوت عالي يا انني
> بالله الشافع قرب يجن
> الود اسي في الثانوي
> لي اسي لو قلت انني يتلفت وينطط عيونو
> الشفع ديل بخافوا من حاجات غريبه و اسماء عادية
> اسي انني دي بتخوف بي شنو؟
> المهم الي الآن ماسكين ليهو عبارتو
> انا هاف
> ايها الناس
> اليومين دي في المريخ في خوف
> ناس كتااار بقولوا انا هاف
> والخوف الفي المريخ مؤكد لا محاله وهو نوعان
> النوع الاول خوف من نجاحات خارقات للمجلس الحالي
> وده ليهو ناسو
> و النوع التاني خوف علي المريخ
> وده برضو ليهو ناسو
> شخصيا انا ما هاف
> لانو النوعين بتاعات الخوف اعلاه انا ماشايف فيهم (انني ) بخوف
> والمريخ في هذه المرحلة يجب ان لا يعرف الخوف
> مجلس الهلال الاستشاري يجتمع في قناة الهلال
> ونحنا لسه في كاسات السد وبلاغات السب ونلوك في الفارغه لبانه
> ايها الناس
> الزول لو اراد بيك ضر
> تنقط ليهو العسل جوه قدومو ده
> يبصق يقول ليك مر
> في شنو ممرمرنها علي روحنا؟
> وليه الشناف الكتير ده ؟
> اسي لو عملنا اذاعة يقولوا كلها دعايات
> ولو عملنا قناه زي بتاعت الهلال العملها كردنه في سنة تانية مجلس دي ونقلنا بيها كاس العالم
> شناف كده يقولوا ليك سمحه لكن شاشتها ما اتنين وخمسين
> فهل مرد خوفنا الحالي هو نجاحات مجلسنا الحالي ام علي المريخ ؟
> والشاعر قال في الاغنية
> من الحاسد والشناف ربنا قدر وربنا شاف
> وضع الشاعر الشناف والحاسد في سرج واحد
> ايها الناس
> لا داعي للخوف
> لا الخوف من
> ولا الخوف علي
> فللمريخ رب يحميه
> وللمريخ شعب يفديه
> وللمريخ جماهير واعيه تفهم تماما وتحلل وتقيم
> ايها الناس
> انهكتنا الانقسامات
> فترنا من المع والضد
> بالله عليكم
> ضعوا سلاح الخلاف والاختلاف جانبا
> جنبووون سلاح
> و صفوا النيه
> اها
> نجي لي شمارات والي الخرتوم
> كان شفت يا والينا
> مشيت البقاله
> قلت ليهو علبة الصلصه بي كم ؟
> ايها الناس
> ان تنصروا الله ينصركم
> قال لي بي خمسطاشر
> قلت ليهو اديني واحده
> طلع ينزلها من الرف يا والينا
> قلت ليهو جيبن اتنين يا اخينا
> جابن ونفضن ودخلن في كيس
> قال لي الحساب تلاته وتلتين يا اخينا
> قلت ليهو قلت بي خمسطاشر يبقي الاتنين بي تلتين يابقالة المدينة
> قال لي انت قلت داير علبه وكانت بي خمسطاشر
> ولما طلبت التانية كانت زادت وبقت بي طمنطاشر
سلك كهربا
ننساك كيف والكلب قال واذا كترت كلامك بتبقي بي تلاته وعشرين اكسب زمنك يا اخينا… اصلو السرطان حمانا واياكم الرحمن بينتشر ويزيد بي سرعة .. حاربوا السرطاااااااان
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018