الأربعاء، 17 كانون2/يناير 2018

board

آهـ يا تمهيداب

> أعجب من طيش مستني توزيع الجامعات
> معقولة زول طلع طيش مجموعتنا
> وطيش المجموعة التانية

> وطيش المجموعتين بتاعات الكونفدرالية
> وداير يخش طب
> حيرتونا ياروشا
> نحنا لو لا حركات الشفع العملوها ناس الاتحاد إياه
> والتي أدت لإبعادنا عن التنافس الإفريقي
> كان الليلة في كورس الجراحة
> لأنو فتحية وقتها أعلنت موقفها
> وهي لو عملت فتحية او ما عملت ما فرقت
> في الحالتين الطيش
> واتمهدي
> المهم
> المريخ يحلحل في ديونه
> المريخ يسجل وفق رؤية فنية
> المريخ يسدد في رواتب الموظفين المتأخرة
> المريخ لاسمعنا بيهو عجز عن معسكر
> ولا سمعنا بيهو قطعوا منو الكهرباء
> ولا ضرب تلفون لي زول عشان يدفع حق إقامة الحكام بهولدي فيلا
> وبعد ده يتحدث الناس عن أزمة في المريخ
> أزمة بالزا؟
> ولا بالكوريك ؟
> أيها الناس
> المريخ يحتاجنا
> يحتاجنا تعني ألا نضخم الأشياء البسيطة
> وفي هذه المرحلة بالذات
> التي تحتاج لالتفاف حول المجلس المنتخب
> وكم سرني عندما طالعت بالأمس ما يخطة يراع أستاذي الكبير أبو شيبة
> فعلاً سوداكال يمكن أن يصبح رئيس شعبي بعطائه
> حتي دون منصب
> حتي آخر مراحل التقاضي
> لو بقت الكأس او كأس الكؤوس ذاتو
> واذا بقى رئيس شعبي بعطائه يا روشا
> بالتأكيد سيصبح زعيم في القبيلة يسطر اسمه بالنور الى جانب زعماء أسماؤهم تتلألأ إنجازاً في لوح شرف القبيلة
> لكن هل نكف عن الرجل شوية وندعمه معنوياً على الأقل ليتفرغ للعطاء!
> علي كل كلام أستاذنا أبو شيبة كان حكمة وخارطة طريق اذا سلكه أخونا آدم أجزم بأنه سينجح فيه نجاحاً تتغنى به الحكامات
> المهم
> شيخ أمير
> او أمير خضر صالح
> أخ كريم و صديق قديييم
> أزرق شدييييد
> برميل كريمات ما بغير زرقتو
> شيخ أمير هذا صاحب نوادر وطرائف
> همو كلو يبقى كبير من زمن كنا طلاب صغار
> عشان كده بتشالق ويقع في المشاكل
> بعد التخرُّج تم تعيينه في الضرائب
> بعد شهر شهرين صادف وفاة والد اخ لنا في الشلة
> شيخ أمير جاب الصيوان
> شيخ أمير جاب الخرفان
> جاب الخضار بالشولات
> الزيت جركانات
> التلج بالبوكس
> البهارات جابن بي سحانتن
> ما خلي شيء
> البكا كلو يشكر في أمير
> ناس قالوا باع إجازتو
> وناس قالوا شال مرابحة
> لكن الجميع اتفق على إنو شيخ أمير ما قصر
> موية الصحة دي جابها
> فرشنا تلااااته يوم
> خمج يا عمك
> بعد الرفع فضل تموين كتيير
> قلنا بنفع
> وشيخ أمير وسطنا يتضرع
> ويتجدع
> بي حقو
> زول جاب الجيب ده كلو من حقو يتضرع فوق عديلو
> المهم رفعنا
> تاني يوم جا سيد الصيوان داير حقو
> سيد الخرفان كان حضور وقال عندو باقي
> سيد الخضار قرب يشتكي أولاد المرحوم في المحكمة
> ناس الزيت والدقيق والبصل ورونا عروض
> بتاع البهارات جا بي عسكريهو
> وناس التلج
> أسكت بس
> أولاد المرحوم على أساس شيخ أمير قام بي كلو شيء كشف ما قبلوهوا
> واتزنقوا
> غايتو دخلنا واسطة وصبرنا الدائنين
> طلعنا إعلام شرعي سريع وبعنا نص بيت المرحوم عشان نسدد حقوق الناس الاتصرفت على الفراش
> وشيخ امير اختفى.
> لكن من ديك زول في شلتنا أداهو فرصة في حاجة زي دي مافي
> بعد داك محمد شبو والدو اتوفى عليه الرحمة
> قال لينا ماتكلموا شيخ أمير لمن نشهل نفسنا
> باقي بيت ناس شبو لو اتباع إلا يرجعوا البلد
> كتااار ما شاء الله والبيت ضيق
> ما بتحمل
> أيها الناس
> الأمر بيد المجلس
> وإحباط الهمم لا يقدم شيئاً
> على الأقل في هذه المرحلة
> نفرض المجلس ده أسي استقال
> تتوقعوا شنو من المفوضية التي نصبت كردنة رئيساً برغم طعن مسنود بمستند مختوم
> ومن تعيينات يقوم بها وزير وفقاً لتوصيات أمانة شباب كلنا لن ينسى لها باي حال اهدار حقنا في التنافس الإفريقي.
> ومن مجتمع مريخي لم يقدم فرداً منه للرئاسة والباب وقتها فاتح ضلفتين
> خلينا عاقلين شوية ومحايدين
> ننظر في الضو وبي عيوننا الاتنين
> النظر من زاوية ضيقة يضيع عليى العين الكثير من المشاهد الجميلة الزاهية
> وما في زول بغمض عين ويركز بالتانية إلا خلف بندقية ليركز على هدفو ويضمن دقة التنشين و إصابة الضحية
> حقو نفتح عينا التانية لنرى في الوجود شيئاً جميلاً
> ايها الناس
> أعجب من عبارات تقول
> إن مستوى طموح الجماهير قد ارتفع
> ارتفع كيف يعني؟
> يعني جماهير المريخ بقت تحلم بي كأس العالم للدول؟
> جماهير المريخ طموحها عالي من سنة تسعة وتمنين عندما حقق المريخ إنجازه بالظفر بإحدى بطولات الكاف
> قولوا طموح الجماهير رجع لي تسعة وتمنين
> كان بقت مبلوعة شوية
> ايها الناس
> حقو ما نجرِّد كيانا من حاجاتو البتميزو
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> الباعوض والضبان ما مخلينا
> وكان قلنا بغِم يا والينا
> البمبان ما بخلينا
> نعاهدكم ما نقول بغِم يا والينا
> عشان تلموا تمن البمبان وبيهو مبيد تجيبوا لينا
سلك كهربا
ننساك كيف والكلب قال كلو مواطن قصادو تلتين الف باعوضة..دولار بس.. آهـ يا مواطن ياغالي!!
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018