الأربعاء، 17 كانون2/يناير 2018

board

عايرة يا شداد

> قرار لجنة البلولة وأشباه البلولة حول استئناف أهلي عطبرة
> والذي تزين بإرجاء النظر في طلب رابطة كوستي

> والذي شابه قرار لجنة الانضباط حول جمال سالم وإهمالها للخمسة بلنجات التي أداها أوتارا لدراج لاعب نفس أهلي عطبرة
> كلها قرارات مخجلة تثبت انو سن المعاش الخواجات ماعملوها ساي
> فلجان شداد تثق في أن شداد يقوم يا الله ويقعد يا الله بدليل أنه تلقى تهانئ الفوز قيام راقداً
> لذا استشرت مثل هكذا أمور وقرارات
> وعارت
> عايرة يا شداد
> وتأكدنا من إنها عايرة بمجرد تعيين البلولة وأشباه البلوله في أهم لجان الاتحاد العدلية
> لكن غلطان الفكاها غارت ولا اللقاها عايرة أداها سوط؟
> الرأي عندي غلطان الفكاها عارت
> المريخ هو الفكاها عارت
> لذا ناس البلولة وقعوا فيها سيطان
> والغريبة سعادتو عامر قاعد جوووه الاتحاد
> والمريخ يهان ثم يهان ليهان من جديد
> فكيناها عارت
> لأننا تناحرنا وانقسمنا وجعلنا ولاءنا للأفراد و نسينا المريخ فنسينا البلولة وأشباه البلولة وأمثال اتحاد شداد
> أيها الناس
> علي عاتق مجلس المريخ يقع عبء تصحيح الأوضاع وإعادة الأمور لجادة الطريق أو الحريق
> أول حاجة نسك قصة البونيات الخمسة بتاعات أوتارا على وجه دراج
> وبعدها ندلف للعمل القانوني حول قضية باسكال
> فإذا كانت لجنة البلولة وأشباه البلولة قد اعتمدت على رد رئاسة الجمهورية بأن جنسية باسكال قد تم سحبها بناء علي طلب من نادي المريخ
> فإن هذا الاعتماد يقوم على مخالفة دستورية كبيييييرة
> فلا يحق قانوناً لأي شخص طبيعياً كان أو اعتبارياً أو هيئة ان يطلب إسقاط الجنسية أو سحبها من شخص يتمتع بها إطلاقا
> ورئاسة الجمهورية طال عمرها لما سحبت أو أسقطت جنسية باسكال بناء على طلب المريخ هل أخطرت مقدم الطلب؟
> منين يا حسرة إذا كانت وزارة الداخلية صاحبة الجلد والراس لا تعلم!
> ده كلو خليهو هل تم إخطار باسكال بذلك حتى يمارس حقه الدستوري ويطعن دستورياً وفقا لبنود قانون الجنسية؟
> ده كلو ما حصل طبعًا
> افتينا يا بلولة ارتكزت على شنو غير الهلالية في هذه القضية؟
> واسألوا لينا معاكم رئاسة الجمهورية عملت شنو في طلب المريخ لسحب جنسية جابسون؟
> ولا طلب زي ده ما بتسكوا قرارو؟
> أيها الناس
> نريد شخصية فقدناها بتجاهل الكبائر والتفرغ للتناحر الداخلي
> وإذا كان مجلس المريخ يهمه التأييد الجماهيري
> عليه أن يقاتل في هذا الشأن ويستعيد كل أراضي وحقوق المريخ المسلوبة علناً وحمرة عين
> حتى ولو وصل الأمر لمقاطعة التنافس ولو يقرروا ينزلونا درجة تالتة
> خلاص طهقنا
> أيها الناس
> هل تم منح أوتارا الجنسية؟
> طب لييييييه!
> المهم
> كلو شيخ وليهو طريقتو في الإدارة
> يرى بعضهم أن الاستثمار في التيم
> ويرى البعض الآخر أن الدكاكين هي ضرب من ضروب الاستثمار
> ولكن يتفق جميع الشيوخ على ضرورة الاستثمار
> ويعمل بعضهم بمقولة بالدين نسوي الزين
> وبعد داك يحلها الحلال
> هي نظرية ممكن تنجح في أي زمان أي مكان إلا في هذا الزمان في السودان
> فدين مية دولار الليلة لو بي مية جنيه
> بتحلو السنة الجاية بمليون ويمكن مليار والمية دولار ياها نفسها المية دولار لكن (المي هاااار)
> شخصياً أحب العمل بمقولة فقران من دين غنى
> لذا أنا شايف ما في داعي لأجانب يدخلونا الفيفا
> بيهم وبراهم بنطير في مراحل معينة
> تسجيلات هدوم العيد دي ما حبابها
> طالما عندنا الغيار الأنيق والنضيف البنقشر بيهو في العيد
> ما في داعي للشوفونية والمديونية والحيرة
> أيها الناس
> غيب الموت عنا الكابتن الفنان الخلوق كمال نوار
> كان مدافعاً حريفاً ماهرا في زمن الدفاع فيهو شلاليت
> لعب للمريخ موسماً أهله للتربع داخل قلوب المريخاب العمر كلو
> كان حنين جداً
> لذا لم يستطع فراق الأهل والأحبة والإقامة بالخرطوم
> فعاد لعروس الرمال حنينا
> تعلقنا به وتعلق بنا ولكن قدر أراد شقاءنا
> له ألف رحمة ونسأل المولى له الجنة
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> بقينا نخاف على البامبرز أكتر من فلذات كبادينا
> الشافع كان انشرط ببره يا والينا
> لكن البامبرز لو انشرط ووووووب علينا
سلك كهربا
ننساك كيف والكلب قال الحل في التأصيل عودوا للبربحه والمشمشه والأحجار وتوب حبوبة
وإلى لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018