الأربعاء، 17 كانون2/يناير 2018

board

ضبيبينة وارغو

> تاني حا اتكلم عن استجلاب الاجانب.
> انا شايف مافي اي داعي لي اجانب في هذه المرحلة اطلاقا.
> اقتصادياً الظروف لا تسمح.

> ولا اتحدث عن اقتصاديات المجلس.
> بقدر ما اعني اقتصاديات الدولة.
> لان امر الاجانب يتعلق بدولار.
> ولا كلمة لنا علي الدولار سواء كنا مريخ او سودان.
> الامر ما بي ايدنا.
> والدولار بقي زي حمى الملاريا.
> بطلع فجأة.
> ولو نزلت بالمكمدات والمسكنات سرعان ما تعود سخانتها تلحم.
> وده واقع لا تستطيع حتى الدولة ان تنكره.
> فدولة مشروع جزيرتها واصل للمرحلة الشايفنها كلنا دي.
> مزارعها ناشفة.
> مصانعها قسموها مخازن.
> كوادرها هربت واغتربت.
> حتى خدمتها المدنية تدهورت.
> لأن التعيين بي زولنا وولدنا وزولي وزولك يجعل مناعة للموظف من المحاسبة حال الاهمال والتقصير.
> وبي بساطة ممكن يقول ليك امشي اشتكيني.
> عشان كده بفطر من عشرة لي اطناشر الا ربع.
> وبمشي الصلاة من اطناشر لي الترحيل.
> وتقفل الخزنة من صبحاً بدري.
> دولة انتاجها صفر قطعاً جنيهها صفر والدولار فيها يبقى زي ليلة القدر.
> عشان كده.
> مافي داعي لي اجانب في المرحلة دي بالذات، واسمنا عند الفيفا بقي زي معتادي الاجرام.
> ضف الى ذلك.
> اذا كان الوطنيون لا يستطيعون ان يصعدوا بنا لمرحلة المجموعات الافريقية.
> يبقى حتى لو جبنا ليهم الاجانب التلاته ما حا يعملوا شيء.
> لذلك ارى ان ندخل الموسم باولاد البلد فقط.
> وعند التكميلية اذا صعدنا لمجموعات افريقيا.
> يبقى في الوكت داك ممكن ندعم صفوف الفريق بالاجانب الذين نحتاجهم ويحققون لنا الفارق الذي ننشده.
> حينها لو وصل الدولار سعر انبوبة الغاز ما كتير.
> لكن نجيبهم اسي عشان يدخلونا المجموعات وجنيهنا يخجل امام عملات العالم.
> يبقى كتير شديد علينا.
> ايها الناس.
> صدحت الأبواق بأن الهلال اكتسح التسجيلات المحلية.
> متوكل النسور.
> حسين أفول.
> محمد موسى مهاجم الاهلى.
> فكانت اختيارات كرواتي المنتخب بعيدة كل البعد عن ناس الابواق ولكنها طالت بعض المغمورين الذين سجلهم المريخ.
> ولو كان كرواتي المنتخب ما كان حا يتخطى في اختيارو للمنتخب اولاد المريخ الجدد.
> انه اول مؤشرات نجاح تسجيلات المريخ.
> ايها الناس
> حتى في التكميلية لما نصعد باذن الله للمجموعات ونجي ندعم الفريق بالاجانب.
> يجب ان تكون استراتيجيتنا النجوم الصغار المغمورين اصحاب الموهبة العالية.
> اول شيء اقل سعراً واوفر مجهوداً.
> يحققون لنا مكسباً فنياً بالملعب وعائداً مادياً عند التسويق وما بودونا الفيفا.
> ولعل التجارب اثبتت ان النجوم الاجانب ما بدونا شيء.
> الحضري نجم عالمي كلفنا من الدولارات ما يعجز ترامب عن سداده.
> وسددنا له غرامته.
> واكرمناهو
> كلو يوم ناطي لي مصر.
> وفي الآخر لم يقدم لنا شيئاً ايجابياً.
> كان سبباً في عدم وصولنا لنهائي الكونفدرالية باستهتاره.
> خسرنا سيكافا لمستواه المتواضع.
> ليظهر علينا مصرحاً بأنه يلعب ضد اتنين وعشرين لاعباً.
> ثم تناول رئيس نادينا بالقنوات المصرية على الهواء بقوله
> لما يتصور معايا بفرح.
> ثم كان النجم النفطي.
> ولم يقدم شيئاً.
> وهيثم مرابط.
> لم ينجح احد.
> ووارغو نجم افريقيا التاني الذي فشل، وسبب لنا الفشل الكلوي والضعف الدولاري.
> ولكن ايداهور المغمور نجح.
> وجمال سالم الرخيص جلب لنا سيكافا بايدو وشديدو.
> لذا عند جلب الاجانب يجب الا نجري خلف الاسماء.
> نجيبهم باستراتيجية تانية خالص.
> وعلى ذكر الاجانب.
> نحمد الله.
> انتهت ضبيبينة وارغو.
> كانت فرقعة في فنجال لم تستطع حتي كسر الفنجال.
> اذكر له في خمسة سنين قون في اتحاد مدني.
> واقوان بورتسودان في مباراة الوداع.
> وبعد ده عندو نفس يشتكي كمان.
> وارغو الماسورة.
> ايها الناس.
> إن تنصروا الله ينصركم.
> اها.
> نجي لي شمارات والي الخرتوم.
> كان شفت يا والينا.
> حل اردوغان ضيفاً علينا.
> جيداً جيت يا اخينا.
> بس اكلمك في اضانك يا والينا.
> عشان ما نتحرج مع راجل عزيز علينا.
> كان قال ليكم ماشي لام درمان.
> قولوا ليهو مرقت يا والينا.
> ما دايرين نتحرج مع الراجل والباعوض والضبان طايرات فينا.
سلك كهربا

ننساك كيف والكلب قال خايفين نحكي لأردوغان قصة الباعوض والضبان يقوم يرسل لينا المبيد نقوم نفقدوا قبل يصل بورتسودان.. بيع سوق ليبيا ده خلوهو زماااان يامان.
وإلى لقاء.
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018