الأربعاء، 17 كانون2/يناير 2018

board

سبب الريدة

< دردشة جميلة جمعتني بالاخوة في قروب الديناكوردات.
< كعادة الدردشات في القروبات المريخية.

< كانت دردشة موضوعية قالبها كوميدي تناولت الأمور في كيان جمعنا حباً واحتراماً ويجد منا قدسية.
< إنه المريخ.
< كان موضوع الدردشة المجلس ده وما المجلس ده والمجلس داك.
< لكن ما كان في وما المجلس داك.
< بدأنا الدردشة بسبحان مغير الأحوال.
< فبعد أن كانت داعماً للمريخ.
< يبقي يا أخواننا
< حقو نعمل بالمثل القائل
< كان ما لقيت البتريدو.. ريد البتلقاهو
< ومن طرائف الدردشة
< واحد من الديناكوردات قال لي انت يا سلك كنت لما تنتقد مجلس التسيير الاخير بتقول بص المالية
< ليه اسي ما كتبت بص سوداكال؟
< قلت ليهو بص الوالي كعبارة في المقام الاول كانت ملاطفة ومداعبة لاعضاء المجلس في ذلك الوقت فكثير منهم تربطني به علاقات المحبة والاحترام. وحثاً لهم على المزيد من العطاء (المادي بالذات)
< لانو في الوكت داك وفي كثير من الاحايين وعند ما تحل ضائقة
< كان تلفون جدة يردد
< الو الو الو
< حول.. حول.. حول
< المهم
< قلت ليهو في بص الوالي الكمساري لما يطقطق بقولوا ليهو قدام
< لكن في هايس سوداكال ده
< ابو السوس زاتو لما الكمساري يطقطق ليهو بقول بعدين
< موش في ناس كده جيوبهم ضيقة ما بقدروا يدفعوا الا بعد ينزلوا؟
< بأخروا الناس
< تلقي الحافلة كلها شاماهو وهو واقف يدخل في طرف اصابعينو جوه جيبو وما دايرات يدخلن.
< بعض مرات في جيوب كده اضيق من الجيوب الانفية
< المهم
< كان النقاش مثمراً
< ولا غرابة
< فقروب الديناكوردات جميع اعضائه وجلهم متعلمون ومثقفون وقيادات في اماكن عملهم وأعلام في محلات سكنهم
< تطرق النقاش للعضوية
< ولسلبية الجماهير في استخراج العضوية لأن الاشتراك الشهري يشكل دعماً كبيراً بالذات اذا كانت العضوية بحجم الجماهيرية التي يتمتع بها النادي
< وتطرقنا في الحتة دي ضمناً وعلناً للقانون في الرياضة
< ما داير اقول في الحتة دي اننا وجدنا القانون زي البنطون
لا مرسى لا ميناء ولا يحزنون
< ولكن افتكر انو اعتبار النادي ولائياً دي مرحلة انتهت
< احترافية الاندية تستوجب قومية العضوية وعالميتها
< فاشتراط الاقامة داخل الولاية لنيل عضوية نادي في الولاية
< ده زي قانون الرفق بالحيوان
قبل ما يحصل ليهو تعديل
< كان عاملت الحصان معاملة قاسية ولم ترأف به الغرامة مليم
< مليم بالما!!!!!
< اذا رجعونا لي زمن المليم
< بنقبل بالعضوية الولائية للنادي
< نحنا في زمن المليار
< والفين وطمنطاشر دي ماشين علي الدشليار
< تقول لي عضوية الاندية شرطها الاقامة في الولاية؟
< طيب الستين في المية من السودانيين الطفشوا ديل ما يشجعوا كورة يعني؟
< الواقع يقول ان صديقي نصر الدين كديس مقيم بنيويورك وجوازو امريكي وبقول (آي قوت إت ) ومريخابي
< والاخ الحبيب الخبير السر جعفر مقيم بتكساس وجوازو امريكي ومراجع قانوني قدر الكتلة وهلالابي
< زي ديل يحرموا من عضوية اندية عشقوها ليييييه؟
< وتحرم تلك الاندية من دعمهم لييييه؟
< عشان عايشين بره الولاية؟
< طيب نيويورك موش ولاية؟
< تكساس ذاتها ما محافظة
< ولاية قديييييمة من زمن الهنود الحمر بجيبوا ( التمباك ) من المكسيك
< ايها الناس
< ننشد تطوراً
< ولكن قوانيننا عقيمة ولئيمة
< حقو نبدأ بيها
< وننقل انديتنا وعضويتنا للدولية والعالمية
< اسي انا مريخابي مولود في العرضة وساكن في العرضة من زمن بشق شعري
< لو مشيت استقريت في بورتسودان
< تسقط عضويتي بنادي المريخ
< وابطل تشجيع العقرب
< واشجع حسن ترب هدل مثلاً؟
< ايها الناس
< غيب الموت زوجة الكابتن الفاضل سانتو في الاسبوع الماضي
< الفاضل سانتو غني عن التعريف
< هو ذلك الفنان الذي اطربنا ردحاً من الزمان
< هو اول من ضمن الاهداف من الكرات الثابتة خارج المنطقة
< هو متحفنا وملهمنا زماناً طويلاً
< نشاطره الاحزان ونتمنى للفقيدة رحمة واسعة
< ايها الناس
< شكراً لقروب الديناكوردات الملهم على الندوة ( الواتسابية ) المفيدة التي اداروها بوعي وحنكة
< ونواصل إن شاء الله
< لأن ما دار بتلك الدردشة لسه ما انتهى
< أيها الناس
< إن تنصروا الله ينصركم
< أها
< نجي لي شمارات والي الخرتوم
< الباعوض يا والينا
< اذا كانت محافظة زي محافظة امبدة
< دولة عديل كده
< مساحة تمتد من غرب صالحة حتى غرب وادي سيدنا
< ومن الأبيض حتى كوبري ود البشير
< عدد سكانها عشرون ضعف عدد سكان قطر والبحرين والامارات بي هنودهم
< مساحة كبيرة وكثافة سكانية عالية
< إذا كانت محافظة زي دي بهذه المساحة المهولة والكثافة السكانية الخيالية
< اذا كانت هذه المحافظة تتعقب الباعوض وتقوم برشو بيت بيت
< حارة حارة
< زنقة زنقة
< مفروض محافظ أم درمان يرشها بالكلونيا يوماتي
< والتحية لمحافظة أمبدة ومعتمدها الشاب الذي يعمل بعيداً عن الاضواء لتسطع الاضواء على شعب امبدة
سلك كهربا

ننساك كيف والكلب قال تعقب الباعوض!!! محلية امدرمان لما تنتهي من تعقب ستات الشاي اول بعدين تشوف موضوع الباعوض لو فضل ليها جهود ومواطنين وقتها.
وإلى لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018