الخميس، 19 تشرين1/أكتوير 2017

board

كلو زول يموت بي زول

> بسم الله ابتدينا
> الموسم ده بسم الله على أوله وبسم الله على آخره
> وزي ما قولة والله تعذب المؤمن
> قولة بسم الله بتفتح الدرب

> وترد كيد الكائدين عليهم
> بسم الله ابتدينا
> وبدايتنا هذه الموسم زي بداية الشمس
> من الشرق نبدأ
> ونرسل خيوط الحياة على سيقان قمح الإبداع ليكون الإيناع شعاراً لدقيق فينا بالمطار جايينا
> و يكفينا
> وندي منو الجيران الماعندهم دقيق فينا جاييهم بالمطار
> كلو زول يمد كسكتتو نملاها ليهو دقيق
> يعملو قراصة يعملو لقيمات ما فارقة معانا
> بداية نتمناها جيدة تبعد بعض الخوف من قلوبنا
> بداية نتمناها جيدة لتطمئننا على المدرجات ونحن نجلس القرفصاء
> بداية نتمناها مقنعة لشفوت الشرق الذين يشتاقون للزعيم من زمن
> أيها الناس
> الاستقرار هو أهم أسباب النجاح
> وفي أي موضوع هو مظهر من مظاهر النجاح
> فاستقرار الدولار مثلاً في بلد
> يعتبر مظهراً من مظاهر حسن الإدارة في ذلك البلد
> ويعبر عن إنتاج قومي ناجح ناتج عن تخطيط سليم وتنفيذ جيد وأمانة في التعامل مع المال العام و شفافية بين الحكومة و المواطن و احترام متبادل بينهما واحتراماً مشتركاً منهما بالوطن الأب مع قناعتهما بأن الوطن ملك للجميع حكومة وشعب
> أما اذا كان الاستقرار غائباً عن سعر صرف الدولار في بلد ما
> فإن ماقلتو فوق ده كلو بكون مافي
> وحتي ينجح المريخ الوطن علينا بنبذ الخلافات لنخلق استقراراً نستطيع من خلاله أن نوفر للمريخ الوطن كل فرص النجاح
> فتلتقي قلوبنا لنلتقي بالمطار
> أيها الناس
> فلندع أي زول يعشق الزعيم بي طريقتو
> ونلتقي جميعاً في حب الزعيم بصوفية راياتها المحبة والاحترام والوئام والسلام
> طالما نشترك في حب حبيب واحد
> الاختلاف والخلاف في شنو؟؟
> إخوتنا الأهلة الخلافات أوصلتهم لدرجة تسجيل أب ستة وإخفاء إصابة شيبوب بالإبقاء عليه بالكشف وإخراجه من الكشف الإفريقي
> وإعلان الفرح بضم إبراهومة الشبل
> وأجبرتهم على إبعاد فطومة أختي لوظيفة في قناة هم يعلموا أنها لن تتخطى محطة البوستر المرسوم عليهو شعار عصمت ده
> أيها الناس
> لكل رأيه
> ورأي الأغلبية قرار
> وقرارت المجلس أوامر
> لأنه المفوض لإدارة شؤون الدولة المريخية
> لا نقل سمعاً وطاعة ونكتفي بها
> بل نقول الرأي مسبباً ورغم ذلك نمتثل لرأي المجلس إن رأى خلاف ما رأينا
> نحن قوم محترم
> وهيك يكون سلوك المحترمين
> المهم
> عندنا خمسة وعشرين لاعباً
> وعندنا اتنين وتلتين إدارياً
> شيل جمال يفضل واحد وتلتين عضو مجلس وخمسة وعشرين لاعباً
> رايكم شنو لو كلو زول مات بي زول
> يعني لو كلو إداري مات بي لاعب
> يكون مسؤول من راتب اللاعب وحوافزو وعلاجو
> ونخلي للوالي الجهاز الفني
> وموت الإداري باللاعب ما من طرف ساي
> يعني الإداري البموت بجمال سالم مثلاً بتكلف أكتر من الإداري البموت بي بخيت مثلاً
> حسب النجومية واستمرارية المشاركة وبالتالي استمرار تلك الحوافز
> لكن بالفهم ده أنا خايف المجلس كلو يقول داير صديقي بخيت خميس عشان مصاب وما بلعب والتكلفة بسيطة
> صديقي هاشم الزبير حايموت بي نمر ويقول لي غرزة ركز على أمير والنيجيري وضفر في الدفاع
> اذا عملنا كده
> واستمرينا في مجلس الشرف ودعم القروبات
> عليهو دخل المباريات
> صدقوني السنة الجاية الشاف ميسي في القلعة الحمراء ما كضب
> الستة أعضاء الفضلو نديهم المراحل السنية ويا دار ما دخلك شر
> آها
> الوادي نيالا حقق فوزه الأول على أهلي شندي
> طبعاً الجماعة حايقولوا مكدكة
> لكن أولاد نيالا لعبوا كورة عديييل كده
> ولو كانت الكواديك بتعمل شيء
> ما كان جد جدي عرس حبوبتي ضرة للزوجة الأولى
> زوجة جد جدي الأولى الحفر الحفرتها في بيت جد جدي ودفنت فيها الكواديك عشان جد جدي ما يعرس فيها أكتر من القبور في احمد شرفي
> المرة دي قال ليك كانت كتابة جنس كتابة
> تكتب من زمن الفكي بصلي غرب وبكتب على ورق البردي
> إنه نصر بعرق أولاد نيالا
> لو الكواديك بتعمل شي ما كان فضل صفر في البلد دي
> الناس كدكت والصفر قاعد
> دقت وبلنجت والصفر قاعد
> كسكتت والصفر قاعد أكبر من أكبر كسكتة في المكسيك
> وسيك سيك صفرك معلق فيك
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> خبر الهداية لي سودانير كمين طيارة أسعدنا يا والينا..
> بس حقو نستصحب معانا
> فكرة انو سودانير الدخلها في الخسارة ما عدم الطيارة
> كان عندها كمين طيارة
> لكن سبب الخسارة سوء الادارة
سلك كهربا
ننساك كيف والكلب قال الرجع لي سودانير الطيارة يرجع ليها خط هيثرو الاتباع يا خسااااارة
والي لقاء
سلك

الأعمدة

د. حسن التجاني

الأربعاء، 18 تشرين1/أكتوير 2017

خالد كسلا

الأربعاء، 18 تشرين1/أكتوير 2017

إسحق فضل الله

الأربعاء، 18 تشرين1/أكتوير 2017

الصادق الرزيقي

الأربعاء، 18 تشرين1/أكتوير 2017

د. حسن التجاني

الثلاثاء، 17 تشرين1/أكتوير 2017

خالد كسلا

الثلاثاء، 17 تشرين1/أكتوير 2017

بابكر سلك

الثلاثاء، 17 تشرين1/أكتوير 2017

إسحق فضل الله

الثلاثاء، 17 تشرين1/أكتوير 2017