الأربعاء، 17 كانون2/يناير 2018

board

الداير الضر بقول العسل مر

> تقريباً ملف الانتقالات على باب يقفل لو ما قفل
> قبل فتح الباب كان الناس يتخوفون من موقف المريخ منها لاعتبارات كثيرة
> الآن المريخ انجز الملف

> الجدد معروفين
> الجددوا ليهم معروفين
> الأجانب معروفين
> والغادروا معروفين
> في هذا التوقيت يمكننا تحليل الملف وإبداء الرأي حوله
> ويكتمل الرأي بالطبع في الميدان يا حميدان
> المهم
> جمهور المريخ حالياً ثلاثي الأقسام
> قسم لو سجل المريخ ميسي بقولوا معطوب وظهرت ليهو كوليرا في الكشف الطبي والكوليرا الارجنتينية دي أخطر أنواع الكوليرات في العالم
> ديل الجماعة بتاعين المثل القائل
> صديقك لو أراد بك ضر تنقط له العسل يقل لك مر
> القسم التاني لو المريخ سجلني انا بعملوا مسيرة
> تأسيساً على شكارتها دلاكتها
> أما القسم الثالث وهو السواد الأعظم من الجماهير
> أنصار هذا القسم يتمنون الخير مطلقاً للمريخ في اي زمان اي مكان
> هؤلاء بحكموا علي النجاح والفشل بعد شوف عين وتمحيص وتدقيق.
> المهم
> على الجدد إقناع القسم التالت بنجاح عملية الإحلال والإبدال على الميدان
> وللمجلس الشكر وأجر المحاولة فيما فعلوا
> المهم
> الرأي عندي أن التجديد لجمال سالم كان بكون خبطة معلم
> بشرط ما يكون للشو الإعلامي وبلوية إيد للمريخ
> فلا نقبل من جمال مغالاة
> ولا نقبل من المجلس تبخيس للرجل
> وأنا ما عارف جمال سالم ده بتطنقع من معسكر تونس الطيرونا فيهو من التنافس الأفريقي لا إيدنا لا كراعنا ليه
> جمال سالم ده من الوكت داك ماياهو
> لكن نحنا أولاد النهار ده
> اذا الموضوع بتعالج وبتلحق في باقي اليوم ده ويوم باكر
> يبقى المجلس ضرب ضربة معلم وخبط خبطة الموسم
> أيها الناس
> القوة المالية الضاربة
> جهزت تلاتة ملايين دولار للمحترفين الأجانب بالهلال
> ماجابوا التكتح
> وصرح كردنه بإنو التلاتة مليون دولار في
> لكن فتشوا مالقوا لاعب بستحقها
> فعلاً قوة مالية ضاربة يا فطومة يا اختي
> وبمناسبة القوة المالية الضاربة
> في اطناشر تسعة ألفين وسبعطاشر
> وصحي استلم الخطاب ابو جبل بحكم منصبو وقتها
> وهو نفس منصبو حالياً
> وصحي كان خطاب الفيفا بقول علي الاتحاد أن يخصم ما بين تلات الى ست نقاط من فريق القوة المالية الضاربة لأنو ضرب قروش كافالي؟
> أسئلة تحتاج لإجابات من أبي جبل
> وتحتاج لموقف واضح من مجلس المريخ
> صحي الكلام ده ياناس القوة المالية الضاربة؟
> غايتو لو بقى صحيح
> يكون كردنه فعلاً قد أطلق الاسم المناسب للقوة المالية الضاربة
> لأنها بتضرب قروش الناس زي كافالي
> صحي مدرب الهلال رقم اطناشر في الموسم المدعو كافالي
> صحي القوة المالية الضاربة ضربتو باقي قروشو
> وقام اشتكى في الفيفا
> والفيفا رسلت لمن فترت
> والقوة المالية الضاربة ضاربة طناش
> قامت الفيفا خاطبت الاتحاد السوداني
> أيها الناس
> حجوة أم ضبيبينة تخلف بكري المدينة عن المنتخب حقو نوقفها
> بكري زول كبير وعاقل وعارف هو بعمل في شنو
> وبالتأكيد ما زاغ
> وبالتأكيد قدم اعتذارو للجهة المختصة
> وبالتأكيد يستطيع أن يدافع عن نفسو
> وبالتأكيد المريخ ما عندو دخل في قرار بكري بعدم السفر
> لأن السبب حسب ما يتردد الإصابة.
> وحتى لو المريخ ماعالجو يفترض المنتخب لو محتاج ليهو يعالجو
> ويخطرو بذلك اذا قرر أن يعالجو
> وبالتأكيد بكري اللاعب المحترف عارف إنو المنتخب ده ذاتو قبل كده أصر على اصطحاب راجي قبل اكتمال علاجو لي مصر
> وتفاقمت إصابة راجي
> وبقت سبب لتدهور مستواه باقي حياتو الرياضية
> يبقى دايرين بكري يسافر مع المنتخب مصاب وهو نفس المنتخب النهي راجي وسكت على رمي شعاره أرضاً في مباراته ضد تشاد بمصر؟
> "إن تنصروا الله ينصركم"
> آها
> نجي لي شمارات والي الخرتوم
> والينا
> الشكية لغير الله مذلة
سلك كهربا
ننساك كيف والكلب قال وكت عارفين كده موش كان ترفعوا إيدينكم لي الله عشان تترفع إيدين من خلق الله !!!
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018