الأربعاء، 17 كانون2/يناير 2018

board

الليلة راس السنة

> بدت السنة
> وعدت سنة
> وفاتت سنة

> وبين كلو سنة وسنة
> في راس سنة
> تمشي سنة وتجي سنة
> وأنا
> ماااا أنا
> ياربي ده شنو البحصل هنا؟
> بلى يخمهم ويخمكم ويخمنا
> عشان نبدا سي جديد مع بداية السنة
> لا عيشة تخوفنا ولا ننوم شايلين همنا
> لا ندفع لي مدارس
> ولا الكراريس من دمنا
> المستوصفات الخاصة تبور
> ويشتغل مستشفى الحكومة حقنا
> مجاااني يعالجنا ويداوينا ويدينا كمواطنين كل حقنا
> بداية جديدة مع بداية السنة
> لا تعال يا زول بي جاي
> لاشرطة ساكة ست شاي
> والكلمة وااحدة نحنا
> لا فرقة لا إنت ولا أنا
> وياربنا يا ربنا
> مشروع جزيرتنا يدور
> بي حقنا
> الصينيين يبعدوا مننا
> نزرع نتيرب أرضنا
> وياربنا يا ربنا
> قطرنا يعود يعيد مجدنا
> وتبقى البلد هي كل همنا
> البتهمنا
> موش أمنا؟
> إنت وأنا
> لازم ندور مصانعنا الواقفة قبل يقيف الحال حقنا
> يدور للبلد
> لا أنا ولا أنا لا أنا
> لا إنت لاهو ياجنا
> كل همنا
> إنو البلد دي تهمنا
> تصلي بينا تؤمنا
> تدعي لينا ربنا
> ويا ربنا
> يا ربنا يا ربنا
> تحقق لينا كل المنى
> وتفوت من حلاقيمنا وحلقنا
> العبرة الواقفة هنا
> إنت وأنا
> وربنا
> يا ربنا يا ربنا يا ربنا
> أيها الناس
> كل سنة البلد والأهل طيبين
> الوطن والمواطن طيبين
> النيم والنخل طيبين
> النيل و المطر طيبين
> الأرض و الحجر طيبين
> الجراد والحشر طيبين
> الليل والنهار طيبين
> الشمس والقمر طيبين
> وكل نجوم وطني ونجيماتو طيبين
> وكلنا نبقى طيبين ونرجع طيبين زي ما كنا طيبين
> النيل الاتملى طين
> النيل و الطين طيبين
> أيها الناس
> لا أحب الجهوية ولو كانت فئوية
> ولكن مقترح الشفت الأخ محمد لعوتة من الديوم وظف الجهوية والفئوية لصالح الزعيم
> فكرة رائعة لو تم تنفيذها على أرض الواقع الواسع
> يقترح لعوتة أن يلتزم كل مريخاب مدينة براتب لاعب
> مثلاً ربك راتب السماني
> الدويم راتب التكت
> مريخاب مدني راتب العقرب
> وهكذا
> نفعل دور مريخاب المدن والولايات
> نخلق مواطن مريخي إيجابي
> والفئويين للكبيرة
> مثلاً أطباء المريخ مع الكشف أبو خمسمية ده يدفعوا راتب المدرب
> المهندسين أهل المعمار من بين غابات الأسمنت الهمجية يدفعوا رواتب الأجانب
> وهكذا
> نخلق من الفئوية تنافساً شريفاً ودعماً عفيفاً!
> ومن الجهوية نصنع تسابقاً على دعم الزعيم
> ويتفرغ المجلس لسد النقص والقيام بالاستثمارات اللازمة لدعم خزانة النادي
> الفكرة رائعة يا ناس
> من يتبناها من المجلس يا طارق لينطلق قطار تغيير سلوكنا نحو معشوقنا من جابوا لينا لي جبنا!
> أيها الناس
> نعيش أيام الاستقلال
> فهل نستغل الاستقلال لنستقل نهائياً ونملك قرارنا؟
> وهل يتأتي لنا ذلك ونحن ننتظر دعومات الداعمين ودعوات الفقراء؟
> كي يتأتي لنا ذلك لابد من إيجاد مصادر دخل
> استثمارات
> وساااهلة
> الموضوع ما خطير
> الممتاز فيهو طمنطاشر فريق
> طلع الخمسة بتاعات العاصمة
> الباقي طلطاشر
> الطلطاشر ديل أي فريق منهم بجي الخرطوم تلاتة مرات للتباري
> التلاتة مرات فيهن مرتين بقيم أسبوع
> يبقى أي فريق من الطلطاشر ديل محتاج لفندق أو إقامة
> تفتكروا بلقى فندق أجمل من نادي المريخ البتميزو عن بقية الفنادق ملعب التمارين وملعب الخماسيات وحوض السباحة والقرب من الإستادات التلاتة وكلو بي حقو
> يبقى لو حولنا نادينا لي فندق بنكسب كتير
> وده من الاستثمارات قريبة المدى سريعة العائد مضمونة الربح
> القصة ما خطيرة
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> لي الليلة مافي زول قادر يفرق لينا
> بين الاستقلال والاستغلال الواقع فينا
سلك كهربا

ننساك كيف والكلب قال هذه الأرض شنو كده ماعارف
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018