الجمعة، 20 نيسان/أبريل 2018

board

استحملوني الأسبوع ده  (٧)

قسيمة طلاقنا من الفيفا

> الزوجة المزعجة كأنها تستعجل طلاقها وخراب بيتها 

> بتجيب أخلاق أجعص حليم في رأس نخرتو 
> تجبرو على اتخاذ وتنفيذ قرارات ما كان بفكر فيها 
> يتهرب من نقنقتها وإزعاجها بتقوية علاقاته الاجتماعية 
> ويبقى من أنشط الناس في العمل الطوعي 
> أي شيء بأخرو بره البيت بعملو 
> وبعد التأخير ده كلو ممكن وهو متوجه نحو البيت حيث المرة النكدية دي 
> يتمنى بطاح من بتاعات السيخ البتجي حايمة بالليل دي تهرسو هرس تريحو من المرة الشوم دي 
> ولما ما يلقى بطاح يدهسو بيضطر لاتخاذ القرار الصعب 
> طلقانة يا أم قدوم 
> ووب علي أنا ? 
> وبالتلاتة كمان 
> أيها الناس 
> ده البنعمل فيهو مع الفيفا 
> أزعجناها شديد 
> يا لجهلنا 
> وإما لقوة راسنا 
> أو لشيء في نفس يعقوب 
> شيء شكاوي محترفين ومتأخرات 
> وشيء حاجات تانية حامياني نتج عنها التحكيم الهجين 
> وشي اتحادين وأمر إخلاء بالقوة الجبرية 
> مهانة لدرجة سفر الاتحادين السنة الفاتت لمقابلة الهانم 
> والفيفا أخلاقها جات مننا هنا 
> موش لو شاركنا في تأسيس الاتحاد الأفريقي 
> لو امتلكنا الاتحاد الأوروبي الفيفا ما بتتحملنا بعد كده 
> قوانين الفيفا واضحة 
> الجدل في شنو ???
> وإلزامية قوانين الفيفا ليست محل نقاش 
> والماعاجبو يعمل فيفتو براهو ويخت ليهو حجار ويلعب دافوري 
> وإلزامية قوانين الرياضة الدولية وتأثيرها المباشر على قوانين الرياضة الخاصة بالدولة أمر لا جدال حوله 
> الفيفا تبحث عن التطور والتطوير 
> ما عندها زمن للنقة الفارغة 
> لذا أتوقع أن ترسل لنا الفيفا قسيمة طلاقنا بالتلاتة وترتاح 
> لاتتمنى يطلع فيها بطاح سيخ ولا تدهسها شاحنة أسمنت عطبرة (إحدى شركات الراجحي). 
> علي الطلاق ماعرفت أسمنت عطبرة العملوهوا قبل أن يولد الراجحي ذاتو 
> أصبح شركة من شركات الراجحي 
> يا قوووووووووش 
> المهم
> شداد لو قال الحق بطلقونا 
> ولو ما قال الحق بطلقونا 
> المخرج الوحيد أن يطلب شداد مهلة 
> مع العلم بأن حكم الطاعة هو الحكم الوحيد في الدنيا الذي لا ينفذ جبراً
> آها 
> مجلس المريخ يعلن مجيد مدرباً والضو مساعداً 
> مجلس المريخ يجتمع بالمغربي 
> دحين المغربي ده ما صاحب خالد عزالدين الكان بقعد معاهو في تفاحة ? 
> ولا ده مغربي تاني ????
> والخلاصة تخبط المجلس حتى على مستوى المنسق الإعلامي الذي يعلن مدرباً قبل أن يوافق ذلك المدرب 
> زي الزول البقول ليك أنا خطيب تماضر 
> وهو لسه لا كلم تماضر ولا مشى لأهلها ولا في زول أداهو 
> ده مجلس شنو ده يا أسد المابعرف يعلن الخبر متين ? 
> دي حاجات لا دايرة جرجير ولا دايرة موافقة وزير ولا بتحتاج لي خبرة
> والفيفا لو سمعت بي كده 
> صدقني يا قريش حاتكرم اليسع وتسمي كأس العالم البعد قطر بي اسمو ويتلعب كمان في السودان والمباراة الختامية بإستاد الجبل كمان
> أيها الناس 
> إن تنصروا الله ينصركم 
> آها 
> نجي لي شمارات والي الخرتوم 
> كان شفت يا والينا 
> عن امتحان التربية الإسلامية في امتحانات الشهادة واحد حكى لينا 
> كان يعتقد إنها زوجتو قال لينا 
> ما استغربنا يا والينا 
> لأنو قبل كده اتشالت غزالة من شعار برنامج تلفزيوني لأنها مثيرة 
> والله ده الحصل يا والينا 
سلك كهربا 
ننساك كيف والكلب قال  السؤال ما واضح يا أستاذ.. هو معتقد.. هي برضك معتقدة ???ولا عملت رايحة !!
والي لقاء
سلك