الخميس، 19 تشرين1/أكتوير 2017

board

آفة العصر هي المخدرات

> آفة العصر هي المخدرات
> العصر براهو
> آفة اليوم كلو
> والمخدرات أنواع وأشكال
> منها ما يبلع
> ومنها ما يستنشق
> ومنها ما يدخن
> ومنها ما يحقن
> ومنها ما يمضغ
> ومنها ما يجنب داخل الفم
> ومنها ما يسمع
> وهذا النوع الأخير هو أخطرها
> تأثيره سريع وتطول مدة مفعوله
> والمخدرات تذهب العقل
> وذهاب العقل يذهب التمييز
> وذهاب التمييز يجعل الإنسان يتصرف قبل أن يستخير
> وعدم الاستخارة بجيب الخسارة
> الأهلة في تسجيل شيبوب ما استخاروا
> المهم
> التخدير بالسمع صعب شديد
> وتأثيرة كبير وواسع النطاق
> وينتج تحت أسماء تجارية مختلفة
> أشهرها مخدر رفع المعاناة عن كاهل الجماهير
> وده نوع جيد مبيعاتو في ارتفاع خلال الخمسة وعشرين سنة الأخيره
> وفي نوع تاني جيد برضو اسمو وظيفة لكل خريج
> لكن أجودها منتج باسمين مختلفين هما
> ناكل مما نزرع وده مع التخدير بخليك ما تشعر بالجوع
> ونلبس مما نصنع وده من فوائده انو المخدر به والمدمن له ممكن يمشي فرعون ويفتكر نفسو لابس
> المهم
> اليومين دي إخوتنا الأهلة في حزن سببه التسجيلات الكعبة
> تيتيه الله عليه طلع ما تيتيه الله عليه
> طلع تيتيه الخلا
> وفشل في التسجيل أمام فرق الروابط المصرية
> وأب ستة طلع مفتوق
> وشيبوب ما استخاروا فيه معطوب
> والتيم كعب
> ألم الأهلة شديد
> لذا خرج عليهم الإعلام الهلالي الموالي بمخدر يخفف الألم عليهم
> المخدر اسمو القناة
> حبة واحدة تنسي التعب والتيم الكعب
> يستخدم بالأضان
> وهو مخدر قوي أثبت مفعوله
> وقمت فتحت خيال في قناة الهلال وفتحت ليك القناة
> الشعار
> قناة الأصفار
> لا مفكوكة ساي لا مشفرة
> مصفرة
> التردد صفر صفر صفر صفر
> معدل الترميز برضك صفر
> القمر صفر سات
> أفقي لمن أرضي
> الشعار كسكتة تجي طايرة من أول الشاشة يقع منها صفرين
> صفر بالعربي
> وصفر بالانجليزي
> مع أغنية مصاحبة تتعلق بالقناة والغرض منها وهو التخدير
> لذا كانت أغنية الشعار
> الخدير ماني حي النقدو الطير ماني حي
> الغريبة برامج القناة كلها لافيها طيارة ولا بتجيب سيرة مطار
> آها
> في خيالي داك جابو برنامج
> بتقدمو فطومة أختي
> اسمو عجوبة وسوبا
> فكرتو الجمهور يتصل تلفونياً على الرقم الموضح على الشاشة
> رقم التواصل هو
> صفر صفر صفرين تلاتة أصفار زيرو صفر زيرو
> قام واحد في خيالي داك اتصل
> فطومة.. ألو معاي منو
> صوت… معاك أمير خضر
> فطومة… مرحب بيك امير خضر… وطي صوت التلفزيون شوية
> صوت… ده ما التلفزيون ده صوت ركشة
> فطومة ... السؤال
> صوت…. الهلال شال كاس الكونغو في الكونغو ولا هنا؟
> فطومة ضاحكة… الفقهاء اختلفوا… واحدين قالوا في الكونغو وواحدين هنا… لكن جمهور الفقهاء الرياضيين قالوا ماشالو الا ما ظهر منه
> صوت.. ماهو باين في العيون
> فطومة . معانا اتصال تاني
> صوت… ..ألو
> فطومة… يا مرحب
> صوت… سؤالي قون اهلي شندي بتاع الدرون في الدورة الاولى السنة الفاتت اتنقض ليه فطومه… . أسأل ليك عاطف النور يسأل لينا هيثم أخوهو النقض القون
> صوت… . يعني حاندخل في دوامة آنا نقضو ? آنا مانقضو… هذا نقضو
> فطومة… معانا اتصال جديد يا مرحب
> الصوت… السلام عليكم… معاك إسماعيل من تندلتي
> فطومة… مرحب بي ناس تندلتي… أرسالنا واصلكم واضح في تندلتي يا إسماعيل؟
> صوت… . والله زي السينما المتجولة… الصوت براهو والصورة زي الرسمة نصها في الحيطة ونصها في الشاشة والإضاءة زي كشافاتكم شمعة بس
> فطومة… .. إن شاء الله تتصلح… سؤالك شنو
> صوت… .. نحنا أسي في الحلة متغالطين الفريق السوداني الوحيد الجاب للبلد دي بطولة من بطولات الكاف منو؟
> القناة صفرت
> وشخشخت
> وصورة فطومة بقت بالجمبة
> الطرحة وقعت
> الكسكتة الفي الشعار اتفنقلت
> وطشت
> وشخشخت
> شخخخخخخخ
> الطبق اتفنقل
> والرسيفر حرق
> والشاشة كتبت
> لاتوجد إشارة
> الله يجازيك يا اسماعيل طششت الشبكة وقفلت القناة
> وقفلت الخيال
> ثم طرحت سؤال
> نسبة نجاح القناة تمنين في المية ولا عشرين في المية يافطومة؟
> المهم
> امس اجتمع مريخاب بورتسودان بنادي المريخ ببورتسودان للاعداد لاستقبال الزعيم
> عروس البحر عن بكرة ابيها مريخاب
> ويكفي ان عروس البحر هي عروس البحر الاحمر
> ونتمنى لأهلنا بثغرنا ان يستمتعوا بالزعيم
> وان يمسح الزعيم صورة خسارة الهلال من قورماهيا السنة الفاتت في نفس التوقيت
> روشا
> المخدرات بتخلي الناس ماتستخير
> استخرتو للقناة دي ولا سجلتوها ساي زي شيبوب
> وهي شن القناة
> قالوا يوتيوب ساي
> عوض شكسبير عندو واحده
> أسي نشوف الكسكتة نفرز قناة شكسبير من قناة الهلال كيف؟
> نفس الكسكتة ونفس الكلام
> بس عوض انوارو واصلة بدون سلوك
> ايها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> اتنين بتاعين بحر منينا
> واحد قال يا والينا
> حانبنيهو البنحلم بيهو يوماتي
> التاني قال ليهو نحنا قادرين ننوم فيهو عشان نبنيهو
سلك كهربا
ننساك كيف والكلب قال لا للمخدرات أعظم الشعارات يا بشر
والي لقاء
سلك

الأعمدة

د. حسن التجاني

الأربعاء، 18 تشرين1/أكتوير 2017

خالد كسلا

الأربعاء، 18 تشرين1/أكتوير 2017

إسحق فضل الله

الأربعاء، 18 تشرين1/أكتوير 2017

الصادق الرزيقي

الأربعاء، 18 تشرين1/أكتوير 2017

د. حسن التجاني

الثلاثاء، 17 تشرين1/أكتوير 2017

خالد كسلا

الثلاثاء، 17 تشرين1/أكتوير 2017

بابكر سلك

الثلاثاء، 17 تشرين1/أكتوير 2017

إسحق فضل الله

الثلاثاء، 17 تشرين1/أكتوير 2017