السبت، 19 آب/أغسطس 2017

board

خطأ طبي

> تتعدد الأسباب والموت واحد
> قد يكون سبب الموت خطأ طبي
> برغم أن المرض ما بكتل

> بكتل اليوم
> إلا أن الموت يمكن أن يكون لسبب خطأ طبي وبسبب خطأ طبي
> مثلاً زول عندو ضغط
> قبل ما يعرفوا العندو من الماعندو يقشطوهوا ليك دربات ملح يودوهوا الآخرة قبال مواعيدو
> وكلنا يتذكر النكتة بتاعت الزول المات ودفنوهوا
> في القبر مالقوا ليهو أي اسم على صفحات الموتى
> لدرجة سألوهوا اسمك منو؟
> قال ليهم حيدر مصطفى
> قالوا ليهو حيدر مصطفى منو؟
> قال ليهم مصطفى حسين
> فتشوا الدفاتر سما أرض اسمو مافي
> عندك في الدنيا اسم غير ده؟
> قال ليهم أبداً
> قالوا ليهو آخر مرة في الدنيا كنت وين؟
> قال ليهم كنت في مستشفى ام درمان
> فتشوا تاني
> قالوا ليهو حيدر مصطفى حسين قسم السيد؟
> قال ليهم ايوووووه
> قالوا ليهو والله دكاترة السودان ديل لخبطوا علينا شغلنا كلو ..انت مفروض تجينا هنا بعد اطناشر سنة وأربعة شهور
> بتحصل في كل العالم
> سمعتوا بي عمك المشي الدكتور ووراهو صورة الأشعة
> الدكتور رفعها وعاين ليها مسااافة وقال ليهو
> ما شاء الله يا حاج جمجمتك تمام مافيها أي شيء
> عمك قال ليهو جمجمة شنو يا ولدي ? يا دكتور دي صورة ركبتي
> القصة دي بتحصل في الدول البتقبل طلاب طب بنسبة خمسين في المية وممكن تنزل بشرط الرسوم المية مليون ما بتنزل ولا بتتقسط
> والأخطاء الطبية في العالم شائعة
> مثلاً طبيب يكتب لي حاجة طاعنة في السن فحوصات معينة لأنه يتهمها بالبروستاتا
> وكمان ظهر الموت لخطأ هندسي كسبب جديد من أسباب الموت
> مهندس يشيد ليك في خشم الحلة زلط بارتفاع مترين ونص عن الحلة دون أن يستعين بي ناس تخطيط المدن عشان يورهو مجاري المياه الطبيعية ومصارفها كي يعمل حساب الكباري على المجاري
> يجيب الردميات ويردم ويمندل ويكشح ليك الزفت ويسلم الشارع
> يجي الخريف
> وتحتاج السيول للتجمع بارتفاع تلاتة أمتار كي تتجاوز زلط المهندس لتعبر الى النيل
> التلاتة امتار دي كفيلة بإغراق الحلة كلها وتهدم منازلها
> البموتوا غرقاً او نتيجة سقوط منازلهم عليهم يكونوا قد ماتوا بسبب خطأ هندسي
> ومهما بررت الحكومة أسباب الموت وأرجعتها لاستعمال السكان لمواد ضعيفة في البناء
> فإن الحقيقة تبقى كما هي
> موت بسبب خطأ هندسي
> وقد يكون الموت بسبب خطأ وظيفي
> موظف يمشورك آلاف الكيلومترات جيب التصديق الفلاني والوصل العلاني وتعال بكرة وبعد بكرة والشبكة طاشة والختم ده ما ظاهر
> هنا يمكن أن يحدث الموت غيظاً
> والغيظ بسبب خطأ وظيفي كان يمكن وضع جميع المكاتب المرتبطة بخدمة واحدة جوار بعضها
> وقد يكون الموت بسبب قانوني
> كأن تسري قوانين قديمة وبالية دون مراجعتها لتتواكب مع متغيرات الحياة
> وقد يكون الموت بسبب قوة راس
> وقد يكون الموت بسبب خطأ قضائي يوديك المشنقة وأنت أشرف الناس
> تتعدد الأسباب والموت واحد
> أمس متنا في كسلا بالقضروف بسبب خطأ طبي كالعادة
> دخلنا نعاني من وجع عين
> بتروا لنا رجلنا الشمال
> حبينا نزيل كلانا الشمال الضامرة
> فاستأصلوا لنا اليمين الشغالة وحولونا للغسيل
> العيب ما كان في دكتور هاي براهو
> العلة كانت في السيستم كلو
> في الطاقم الطبي و الإداري
> لان الاستهتار الذي شهدناهو في جيبوتي إن كان سببه هاي
> استهتار أمس ده برضو سببو هاي؟
> أين المعد النفسي الذي سمعنا عنه؟
> موش تم فتح باب التقديم لوظائف بعينها من ضمنها مدير تنفيذي ومعد نفسي؟
> خلاس الموضوع مات؟
> المعد النفسي كان عشان الطنقعة الفي الفارغة دي تروح
> عشان الناس المخلوعة بالنجومية دي تعرف انو مافي اي أسباب للخلعة والطنقعة
> وأن الأمر شغل وأكل عيش
> تركيا دي قابلوا فيها مهند ونور ولا مشوا لي شنو؟
> لا لياقة ولا (لياقة) في الخصم
> ومع احتراماتي لجيبوتي ولشرطة القضارف
> الاتنين ما محتاجين مدرب
> محتاجين فقط غيرة و إصرار و شعور بالخجلة عند الخسارة
> ولو عندنا مجرد كابتن يتمتع بروح القيادة كان الأمر اختلف
> ولكن كباتننا اهتمامهم كلو بتلك الحلاقات الكريهة والمشي بطنقعة وكأنهم أتوا إلينا بكأس العالم للأندية
> أيها الناس
> العيب في المادة الخام
> في لاعبيننا ديل
> فالغيرة وحدها هي من صنع رولاندو
> وميسي لم يعتمد على مهارته ولكنه أضاف إليها غيرة و إصرار ورفض للهزيمة
> يسك ويقالع ويشاكل و ينزل مع المدافعين
> أيها الناس
> نحتاج أسمنت يحل محل الجبص الغاشينا ده
> المهم
> أدمنا الموت بأخطاء طبية ومتنا غرقاً تحت الأنقاض بأخطاء هندسية وكان موتنا غيظاً لأخطاء إدارية ومتنا كمداً بسبب قوة الرأس
> فمتى تتركونا نعيش حتى تكمل المعدودة ونموت موت طبيعي في المكان والزمان المحفوظان على اللوح المحفوظ؟
> أيها الناس
> القشرة والتباهي والاهتمام بالمظاهر والشكليات فقط لن تصنع أبطال إطلاقاً
> قابل أحدهم صديقة ووجده حزيناً
> سأله
> مالك يا جعفر؟
> جعفر قال ليهو مرتي حزينة عشان مشت تقص شعرها بتاعت مركز التجميل قصتو ليها شديد لما وصل نص ضهرها بس
> الراجل ضحك وقال
> أسي سبب حزنك وحزن مرتك إنو شعرها وصل نص ضهرها بس؟
> جعفر قال ليهو أيوة
> الراجل قال ليهو صدقني يا جعفر إنت ومرتك فاكنها في روحكم ساي ومبارين المظاهر
> علي الطلاق يا جعفر أنا مرتي كان رقدت في الواطة شعرها ما يصل الواطه ونحنا أسعد اتنين في العالم
> هل من المعقول نحزن ونتعس لأنو شعر مرتنا اتقص شديد وصل نص ضهرها ويسعد الناس النسوانهم لو رقدن في الواطة شعورن ما تصل الواطة؟
> السعادة شعور وليست شعور
> القصة ما قصت شعور طويلة وقصيرة ولكنها قصة شعور عميقة تبحث عن السعادة في البساطة وبشفافية بدون شوفونية
> آها
> تش يل من كلامنا حتة يا إنت ولا تجبرنا نلبس الكسكتة؟
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> للموسم بدينا
> فكانت سمسم القضارف أول أغانينا
سلك كهربا
ننساك كيف والكلب قال من وين نجيب ليك العذر
والي لقاء
سلك