السبت، 24 حزيران/يونيو 2017

board

أخبار اللمبي معاك شنو يا البلال؟!

> النقة لسة شغالة ولايكة موضوع التدريب في المريخ لبانة .
> استغرب جداً من عريس ناقي مع العروس الليل كلو بالتلفون قبل العرس سنة.
> وبتقابلوا ليهم تلاتة سنين.
> وبعد العرس بي شهر يجيك العريس يقول ليك العروس ما نافعة معاي.
> عصبية ومتوترة طوالي وما سمحة كمان.
> شينة ومزعمطة.
> نخرينها الكبار ديل شافطة بيهم الاوكسجين كلو.
> الصباح اقوم من النوم راسي لافي من نقص الاوكسجين في دمي.
> ونسأل عريسنا.
> العصبية والتوتر دي ما ظهرت ليك في نقة التلفون الزمان ديك ؟
> قول قصة الاوكسجين دي فاجأتك
> النخرين الزي كرعين الردا ديل ما شفتهن زمان ؟!
> اعذار العريس ما مقبولة.
> واعتذارك ما بفيدك العملتو كان بايدك.
> اتوكل علي الحي الدائم يا عبد الدائم وكلو شيء قسمة.
> ايها الناس.
> تغيير المدربين اثناء التنافس زي لبس هدوم العيد قبل العيد.
> لما يجي العيد والناس تلبس جديد تلقي روحك يا اللبست هدوم العيد قبل العيد شكلك محرج وتقعد بعيد.
> هاي مدرب
> سمح كعب دي بتظهر بعد اعطائه فرصته كاملة ومرور فترة معقولة تسمح بتقييمه.
> صحيح ان مقطوعته الموسيقيه لم تطربنا حتى الآن.
> ولكن قد يكون السبب من العازفين.
> نحنا لسه عندنا عازفين ما بعرفوا يقروا النوتة ولكنهم يقومون بالعزف جربندية ساي.
> زي ديل لازم يخرمجوا الى ان يكتشفهم المايسترو عشان يغيرهم او يفهمهم او يشيل منهم بعض الصولات الخرمجوا فيها.
> والكلام ده ما كفاية عليهو  البروفات.
> لازم حفلات كبيرة يكون اعجاب الجمهور بها او امتعاضه مطلقا صافرات الاستهجان هو الفيصل.
> عشان كده ارى بدل الحديث عن تغيير المدرب.
> ان نعمل على اقامة الحفلات التجريبية الكبيرة لنتيح للمايسترو والعازفين فرصة الاجادة.
> ولا للتغير في هذا التوقيت.
> فمن اعتاد واجاد عزف اغاني الحقيبة قد يفشل في اغنيات الراب.
> الا الآن هن دلوكة دلوكتين الراخيات ومبوظات الايقاع.
> يبقي الصبر مع العقلانية هو المخرج.
> المهم .
> طالعت بالامس علي صفحات دار البلال حواراً للكاردينال.
> وقفت كثيراً عند عبارة لكردنة .
> يقول كردنة انه لاعداء له مع الخرطوم الوطني بل يدعمهم لان والدته احد ابناء الحي.
> وقفت في الجملة وتعثرت على ابناء الحي و اخبار اللمبي معاك اية يا بركة !!!!!
> اها
> اذا عدنا لمباراة الاهلة وشيكوبولا الغاني
> نجد انها كانت اعداداً جيداً لحكام صلاح .
> طمأن الحكام جمهور الهلال بأنهم اعدوا انفسهم للموسم الجديد جيداً.
> اطمأن جمهور الهلال على اعداد الحكام ولم يطمئن على اعداد الهلال.
> ولكن الاطمئنان على الحكام بطمئن كتير.
> واذا عدنا لحوار كردنة بالدار.
> تستوقفنا قصة تسجيل ابراهومة.
> لكردنة خيال فاق كتابات احسان عبد القدوس وحبكة اسامة انور عكاشة وبصمته على شاشة الدراما المصرية.
> كنت بفكر اخطفو.
>
> انا فتحت خيال في الحوار.
> اشوف ليك كردنة.
> قاعد في المزرعة وبزبط في السيناريو.
> كلمت جماعة من المقربين يخطفوهو.
>الجماعة جوني في المزرعة.
> انا قاعد الدنيا حلوة وصااانة.
> موسيقى تصورية خلفيتها الشبكنا يخلصنا.
> جوني الجماعة داخلين.
> مؤثر موسيقي ( دنق تش )
> قلت ليهم في شنو؟
> كلوز على وجه كردنة .
> متوتر والكسكتة ترجف.
> اليوم داك كردنة لابس جلابية لزوم المزرعة.
> لكن لابس كسكتة مع الجلابية لاضفاء مزيد من الكوميديا على المسلسل.
>  في شنو؟؟
> صمت.
> مؤثر موسيقي يبدي توتر الموقف ( تك تك… تك… تك ) بفتح التاء.
> الجماعة بصوت واحد.
> ناس المريخ شطبوا ابراهومة.
> كردنة يقفز من الفرح.
> ويرقص على انغام.
> كان بعيد نادوهو ليا يا ناس.
> وكان قريب جيبوهو ليا يا ناس.
> يوهوووووووو
> تن تش
> جيبوهو اسي
> كلوز على اصبع كردنة اثناء الحديث.
> نهاية الحلقة الاولي من مسلسل ابراهومة والتلتين سنة زعل.
> ونواصل الحلقة التانية غداً.
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> متين تن هو كلنج جايينا؟؟
> تاني من الصباح ني هاو تحية مننا ولينا.
> بس مستقبلاً لا بنلعب باكست ولا بنشيل رأسية يا والينا.
> اي عكسية قون فينا
سلك كهربا
ننساك كيف والكلب قال وووب علينا من السبيبي الجايينا ... نيييي هاو هاو هاو
والى لقاء.
سلك