الإثنين، 11 كانون1/ديسمبر 2017

board

نقطت

> جماعتنا أمس سحابتهم ربطت.
> ومطرتهم نقطت.
> ولو ما السلفقة.

> كان المطرة لي أسي صابة.
> يكفي ان اولاد الديسكو عندهم عشرة ركنيات.
> يكفي انو نجم الكسكتة كان مكسيم.
> ضغط زي الضغط.
> وكردفان مطرتها معروووفة.
> والابيض ما بعيدة من كادوقلي.
> ولو سحابة كادوقلي ملت صدرها.
> حانشوف مطرة حدها النخرة.
> أب شنب بدل يرجع الخرطوم ويودوا حكم غيرو كادوقلي والخريف ما مضمون.
> حقو من الأبيض يمشي كادوقلي طوالي.
> واهو توفير واختصار لاي شيء.
> ايها الناس.
> قولوا واحد.
> مكسيم اخد كرت.
> لما يتموا تلاتة حايقولوا اتنين.
> من الليلة سجلوا.
> مكسيم عندو كرت في كورة الابيض.
> المهم.
> خلونا من المحلية.
> نجي للدولية.
> اكتب قبل لقاء بطولة العرب.
> اتوقع نصراً كبيراً واداءً قوياً وجميلاً من بطل السودان في مواجهة بطل جيبوتي.
> وبطل جيبوتي تأهل للمشاركة في هذه البطولة بي حقو.
> وبالطبع بطل جيبوتي أخير من الجماعة البرة الحلقة.
> اخير من اي محلي.
> اتمنى النصر للزعيم ليفرح هذا الشعب الذي اضحى يبتسم بدون سبب.
> الواحد ماشي براهو يبتسم.
> يتعتر يقع يبتسم.
> تشاكلوا وتسيء ليهو برضو يبتسم.
> تعاين ليهو يبتسم.
> حتى كدنا لا نعرف.
> على من نضحك.
> على من أدخلنا في هذه الكوميديا.
> ام على الزمن النقص ساعة.
> ام على انفسنا نضحك.
> ام من شر البلية نضحك.
> المهم نضحك وبدون سبب.
> وحتى يكون لضحكنا سبب.
> نتمنى أن ينتصر المريخ ليفرح كل الشعب.
> فلا أعتقد أن من بين حملة الرقم الوطني يوجد من لا يفرح لانتصار الزعيم.
> لو قابلكم زول زي ده راجعوا رقمو الوطني.
> معلوماتو بتكون غلط.
> يا رقمو الوطني حبشي ساي.
> أيها الناس.
> إن تنصروا الله ينصركم.
> أها.
> نجي لي شمارات والي الخرتوم.
> كان شفت يا والينا.
> نتبسم ساكت بقينا.
> يا عوره يا والينا.
> يا خارشينا.
> يا جنينا.
سلك كهربا
ننساك كيف والكلب بي سنونو الكتار ديل فيهو حلاة بسمة.
وإلى لقاء.
سلك