الإثنين، 11 كانون1/ديسمبر 2017

board

فطومة كبي كنجو كنجو

> اجمل مافي السودان هو اختلاف مناخاته وتباين ثقافاته وتنوع سحناته ولهجاته وسماحاته وشناته.
> فحتى شناة السودان سمحة وجميلة ومعبرة ولها وضعها واحترامها.
> ذلك التنوع والتباين جعل لكل مدينة ملمحاً خاصاً بها.
> واكلة تشتهر بها.

> وعصائر حقتها براها.
> اهلنا في الشرق ناس مخبازة وسلات وصلات طيبة.
> وفوق ده ناس راي وجبنة سااااي.
> والخلال ماركة مسجلة.
> ودبايوا تقالدك من خشم الباب.
> وفي فاشر السلطان الجلنكوي يعتبر. من المشروبات المشبعات المفيدات المدرات للطاقة الجبارة.
> وفي دارفور عموماً حيث يتأصل فن الطبخ نجد عسل البطيخ وعسل النبق غير عسل النحل الطبيعي.
> كل مدن السودان تشتهر بأكلات او مشروبات مميزة وتميزها.
> في عروس الرمال وكردفان عموماً التبلدي هو العصير المفضل.
> وكادوقلي كذلك.
> ولكنها تمتاز بالكنجو كنجو.
> مكوناته بسيطة ومحلية ولكنه مفيد جداً.
> دخن وسمسم وعسل ولبن.
> واذا ضربت الكنجو كنجو في كادوقلي فإنك حتما ستفكر في الاستقرار بها غصباً عن ترامب.
> وجماعتنا في كادوقلي.
> ان شاء الله يكونوا جايبين معاهم كنجو كنجو.
> فطومة.
> كبي كنجو كنجو.
> المهم.
> غادرت بعثتنا لغينيا.
> يغيب عنها اعلاميون.
> شنو السبب في ذلك.
> ده ما وكتو.
> الآن المهم النتيجة التي تضمن لنا التأهل.
> وعشان عمايلنا دي.
> في كثير من الأحيان نبدأ بالتمهيدي.
> ماذا يجري في المريخ يا ناس؟
> ولماذا الاصرار على ابعاد الاعلام من المعسكر والمنافسات.
> شنو هو الداسنو؟
> حيرة تجعلنا نسأل.
> من يدير المريخ حقيقة؟
> وماذا يريد ذلك المدير الفعلي؟
> وما هو موقف بقية المجلس.
> نبقي شيوعيين ولا اخير مدني تغرق؟
> اذا كان هذا هو موقف المريخ من اعلام المريخ.
> فما هو موقف اعلام المريخ من مجلس المريخ؟
> ولا اخير مدني تغرق !!!
> غايتو جنس غايتو.
> اذا كان هذا هو الموقف.
> يبقى محاسن جيبي كسكتة.
> عشان ما تغرق الحتة.
> اها.
> نرجع لمباراة الصفرين الدوليين.
> صفر قابل صفر.
> وكانت هناك ضربة جزاء.
> شاهد عيان قال الزول وقع في الدلنج اتحسبت بلنت في كادوقلي.
> المهم الولاية واحدة.
> وحدة الولاية كفاية.
> ولكن نبارك لاهل كادوقلي مستشفى الولادة الحديث.
> واحد قالوا ليهو ما بلنت.
> قال لو ما بلنت جابسون وشيبوب العوقهم شنو؟
> المهم.
> لسة في انتظار ود الحاج او المجلس.
> دايرين قرار واضح في ما يخص الرابطة المركزية موجودة ولا لأ ؟
> عشان ما نتخطاكم ونسأل المدير الفعلي الحقيقي عن وجود من عدم وجود الرابطة المركزية واثر ذلك على العضوية المحشودة.
> محاسن جيبي اورنيك عضوية.
> ايها الناس.
> الأمور الواضحة تحتاج لوضوح بالذات لو كانت فاضحة.
> والعمل العام وفق استراتيجية مصالح شخصية يفشل.
> والإجماع السكوتي خطوة نحو الهاوية.
> واخاف ان نسمع بقرار يقضي باغلاق ابواب نادي المريخ.
> بعد داك تتعدد المبررات والاسباب والدوافع.
> ولكن الواقع يكون قفل ابواب النادي والطير يمشي يشوف طاحونة تانية.
> فتحوا عيونكم كبييييرة.
> الحفر كتير (بفتح الحاء) والحفر كتيييرة (بضم الحاء).
> والبقع فيها مفقود مفقود يا ولدي.
> والضبابية تضعف النظر.
> محاسن جيبي بطارية.
> ايها الناس.
> اليوم جمعة والأمة مجتمعة.
> دعواتنا للزعيم الكيان بالنصر.
> فالتاريخ يسجل ولا يجمل مواقف الناس.
> وها هو الصفر مسجل على صفحات التاريخ يتلألأ كلما تطاول البعض على الواحد الصحيح.
> متى يزيد الواحد الصحيح؟
> ايها الناس.
> ان تنصروا الله ينصركم.
> اها.
> نجي لي شمارات والي الخرتوم.
> كان شفت يا والينا.
> شكينا.
> ما سمعوا لينا.
> بكينا.
> ضحكوا فينا.
> الناس خجلت من مد ايدينا.
> فايتنكم بالصبر وكم قصر قالوا لينا.
سلك كهربا
ننساك كيف والكلب قال: بي اضافريني ديل أشحد كيف؟ اختف بس.
والى لقاء.
سلك