الخميس، 19 تشرين1/أكتوير 2017

board

القيل والقال وكثرة السؤال

> عندما يعيش المجتمع علي القيل والقال يبقي مجتمع فشل في ادارة دفة الامور
> والقيل والقال تصدر دائما من الناس بتاعين كثرة السؤال
> فالذين تحسبهم اغنياء من التعفف لا يمارسون القيل ولا يعيرون اذنا للقال

> وكثرة السؤال بتعمل اكتر من كده
> وهناك حكمة مفادها ان من قال لك قال فيك
> ويظل الرجل يمشي بالنميمة بين الناس حتي لا يبقي له من صفات الرجال غير جلباب يدمن الدهنسة والتودد والتقرب للساده
> ايها الناس
> مجتمع المريخ بدأت تظهر فيه هذه الصفة اللعينة
> فان اقمنا عليها الحد وهي في مهدها أمنا شرها
> وان اهملنا الحكاية فالنبشر بسقوط سقوفنا علي رؤوسنا
> لانها خصلة تشبه (الارضه) تأكل الخشب من الداخل و تبقي علي القشرة لتخدع الناس بسلامة السقف والذي حتما سينهار عليهم جميعا
> اقول قولي هذا لان النمل الابيض قد حاك قصة غريبة ومخجلة ومضحكة
> فشر البلية مايضحك فعلا ايها النمل الابيض
> قالوا (والعياذ بالله من قولة قالوا ) ان هناك تنظيم سري للمعارضة يضم عبد الصمد ورمرم وفاضلابي وسلك
> وانهم اجتمعوا و قرروا الافصاح عن التنظيم عند اول هزيمة للمريخ
> لن ادافع عن صمدو ولا رمرم ولا الفاضلابي ولا عن شخصي القوي والذي يستمد قوته من المدرجات الشعبية لاكثر من اربعين سنة
> ولكني لم ابايع بعد محمدا رجلا
> يبقي لن ابايع رجلا لانشاء تنظيم ايا كان مسماه
> ثم كيف يعلن تنظيم عن ميلاده والمريخ مهزوم ؟
> اما دري صاحب الشائعة ان اقوي لحظات المريخ هي حين يخسر لان جميع ابنائه يلتفون حوله وقتها
> فكيف تكون لحظة الخسارة هي لحظة الاعلان عن التنظيم المعارض يا من تمشي بين الناس بالفتنة كي تتكسب؟
> يا اصحاب الشائعات
> شخصيا لا اتواري خلف الاشياء لابث اشيائي
> والعندي قاعد اقولوا علنا
> نهارا جهارا
> ولن احتاج لاجتماعات سرية او مؤامرات كي اقول كلامي
> فلست من اصحاب المصالح و المكاسب والاستراتيجيات
> ولست من اصحاب الاحلام الاوهام التي اريد ان اصل اليها عبر المريخ او عن طريق نقل القوايل وصنع الهوايل
> فأنا اغني الناس واوسعهم ثراءا
> وثروتي هي محبتي لجمهور عظيم و محبة ذلك الجمهور لي
> فردا فردا نتبادل العشق النبيل
> واؤمن بالمثل القائل اكنز الرجال ما تكنز المال
> وصية للاخ جمال
> الحمد لله علي نعمة المال
> بعد ده اكنز الرجال يا اخوي
> اقول قولي هذا واستغفر الله لي ولكم ولسائر المسلمين
> اها
> نرجع كادوقلي
> قلت لي كاريكا لما جا يشوت البلنت سمع صوت الارباب بقول ليهو ضيعها يا مدثر ضيعها؟
> صوت الارباب جاهو من السعودية في كادوقلي؟
> علي اليمين دي صوت العرب مايعملها
> كاريكا ما ضيعها
> لكن براعة ديدا حارس كادوقلي وابن مراحل المريخ السنية هي السبب
> ديدا قبضها لمن وقعت الكسكتة
> وقبض معاها مهارات اوكرا وامكانياتو التي تفتقت بالهلال
> وقبض معاها نبضات القلوب المغشوشة
> الابيض نقصت من كيس الفرنسي
> وفي كادوقلي اتحت الكيس حت
> المدرب الجديد منو يا فطومة؟
> في مدرب واقع في ابو ظبي جمب بنياس
> كويس والله وشغال
> نفضوهوا وجيبوهوا سريع يا روشا
> بالف دولار بس
> قلت لي صوت الارباب؟
> يعني الكورة الجاية ماكسيم ممكن يسمع صوت طه بقول ليهو خليها تدخل يا مكسيم يدخل فيك قطر
> لكن قطر بالكاميروني شنو؟
> تكون الفجيرة يا ربي !!
> ايها الناس
> انه لا صوت صلاح ادريس ولا شئ
> انه صوت الحق وصوت العقل وصوت الواقع
> الجماعة ديل ما عندهم شئ
> كيسهم فاااااضي
> المهم
> الاخبار تفيد بان معنويات الاولاد بغينيا عالية جدا
> وبرغم غياب العقرب الا ان النصر قريب
> فالمعلم غرزه يعرف كيف يوظف امكانيات اولاده من اجل نصر قادم ان شاء الله
> نتمني للمريخ النصر حتي يتأجل اعلان ميلاد التنظيم المعارض والذي ينتظر هزيمة المريخ ليعلن عن نفسه
> ونتمني انتصارات متتالية للزعيم لمدة عشرة مواسم عشان نشوف التنظيم المنتظر هزيمة المريخ ده حا يعلن عن نفسو متين
> غايتو جنس قوالة
> القوالة ما حبابه
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> اكتر شعب بحمد الله نحنا يا والينا
> فهو الذي لا يحمد علي مكروه سواه هكذا ربونا وقالوا لينا
> اليومين دي الحمد زاد يا والينا
> في البيت في الشارع في المسرح
> اتشووووو
> الحمد لله
> واتشووووووو
> الحمد لله
> وفييييييييط
> نزلات شديدة انطلقت فينا
> نزلتوا سعر الدواء ولا نصبر عليها نعطس ونحمد الله يا والينا
سلك كهربا
ننساك كيف والكلب قال النزلة لو عالجتها بتاخد اسبوع ولو سبتها بتاخد سبعة ايام
والي لقاء
سلك

الأعمدة

د. حسن التجاني

الأربعاء، 18 تشرين1/أكتوير 2017

خالد كسلا

الأربعاء، 18 تشرين1/أكتوير 2017

إسحق فضل الله

الأربعاء، 18 تشرين1/أكتوير 2017

الصادق الرزيقي

الأربعاء، 18 تشرين1/أكتوير 2017

د. حسن التجاني

الثلاثاء، 17 تشرين1/أكتوير 2017

خالد كسلا

الثلاثاء، 17 تشرين1/أكتوير 2017

بابكر سلك

الثلاثاء، 17 تشرين1/أكتوير 2017

إسحق فضل الله

الثلاثاء، 17 تشرين1/أكتوير 2017