السبت، 19 آب/أغسطس 2017

board

نسابتنا ما احترمونا

> الاخبار تتحدث عن سوء معاملة من سوني الغيني.
> اظن الكرم في غينيا ما من شيم الناس النبيلة.
> ونحنا طبعا بنعامل الناس بأصلنا.

> لمن يجونا هنا نحترمهم آخر احترام.
> ونجيب ليهم بص مكندش واتنين دفار ابو طيرة لزوم الحراسة وسارينا تفتح ليهم الشارع.
> كريمين لمن عورة نحنا .
> قبل كده في ناس برضك جات المعلومات انهم عاملونا كعب.
> بعد داك اتضح انها معلومات ساي.
> الحمد لله ما عاملناهم بمثلما سمعنا عن معاملتهم لينا.
> الغريبة مازيمبي العاملنا كعب.
> في المطار وفي الفندق وفي التمرين وفي الطريق للاستاد وجوه الاستاد.
> لما يجينا برضو بنعاملو كويس.
> كريمين جنس كرم غايتو نحنا.
> المهم.
> الانباء تقول ان نسابتنا ما احترمونا.
> عشان كده حقو نسمعهم صفقة في صيوانهم.
> لازم يعرفوا حاجة.
> نستبسل ونقاوم وتدمي كلومنا على صدورنا ونقول لمحاسن جيبي صبغة يود وشريط جروح لنواصل المشوار.
> والفريق الغيني مهما كان شكل تعامله معنا فهو فريق هين ولين ولا يقارن بنا.
> رصيده من بطولات الكاف صفر قدر ده.
> وسجله في مشاركاته في بطولات الكاف ليس بأفضل من رصيد الفشنكات الزامبي وكم كم الزنزباري والغزالة التشادي .
> وفريق زي ده مفروض من بلدو نحسمو.
> نقول لي نسابتنا ادونا عروسنا نجرتقها عند اهلنا.
> محاسن جيبي الضريرة وسوي العديلة.
> المهم.
> نتيجة مشرفة تعلن تأهلنا نتوقعها اليوم بعون الله.
> المهم .
> الحبيب جداً معاوية الجاك تناول موضوع عقد غارزيتو.
> وأرجع الحبيب معاوية عدم توقيع العقد لبعض التفصيلات التي وردت فيه ويرى غرزة انه لا داعي لها.
> ويقول ابو الجاك هناك امور الشفاهة فيها ملزمة.
> وهنا نختلف معك يا الحبيب .
> شفاهة تاني مادايرين.
> الشفاهية ما زي الشفافية.
> الشفاهية بتجيب الضبابية .
> والضبابية هي مرتع الحصل والما حصل .
> وارض خصبة للقيل وللباع.
> عشان كده ما دايرين اي شفاهة.
> شفاهة كيفن وحسب كلام معاوية غرزة وولدو ساكنين الفندق لي الليلة.
> تقول لي شفاهة.
> الم يك نالخواجة حكيما في اصراره على انتظار جمال واعتباره لما ورد على لسان الريس عقداً مكتوباً موثقاً ومعترفاً به غير قابل للنكران !
> الخواجة يا معاوية يا اخوي عارف وكت الطقطقة الحساب قدام.
> يبقى يطقطقها من الكنبة الاخيرة لييييه ولي شنوووو ؟
> ولكني اطرح سؤالاً يا معاوية .
> العقد الذي جهزه المجلس ده بالشروط الدقيقة جداً دي.
> خت معاهو مقدم العقد للتسليم عند التوقيع.
> ولا التوقيع هنا ومقدم العقد برضك قدام؟؟
> القصة دي ذكرتني تسوية عملوها في السوق بين نفرين.
> وقفلوا حساباتهم علي انو احمد يدفع لي محمود واحد وعشرين مليون ويتنازل محمود عن الدعوى التي يقيمها علي احمد.
> جابوا اقرار مكتوب فيهو انا محمود الفلتكاني بطوعي واختياري وبكامل قواي العقلية وتمام اهليتي للتصرفات بهذا  اقر باستلامي مبلغ واحد وعشرين مليون من احمد الفلاني نظير تنازلي عن الدعوى التي اقيمها في مواجهته بالرقم كذا امام محكمة كذا الجزئية وهذا اقرار مني.
> قالوا لي محمود وقع
> قال ليهم هنا موش مكتوب بكامل قواي العقلية؟
> قالوا ليهو ايوه مكتوب
> قال ليهم كيف قواي العقلية كاملة واوقع وانا ما استلمت مليم؟
> قالوا ليهو قروشك عند محمد لما يجي ملتزم يديك ليها.
> قال ليهم وقلمي البوقع برضو عند محمد.
> يجي محمد يجيب القريشات والقلم.
> اقبض واوقع.
> هكذا تكون قواي العقلية كاملة.
> المهم .
> محمد عبد الماجد قال لما يخسر الهلال الشافع ما بسمع الكلام.
> والسرير بضربو في اصبعو الصغير.
> بالطريقة دي يا محمد شافعك ده السنة دي بقول ليك ابيت عديل كده .
> والسراير بتكسر اصابعينك العشرة.
> بالذات السنة دي سراير الحوش في الحتانة مفرشة من بدري.
> ارقد فيهن الاتنين يا اخوي
> نحنا ما بلزمننا السنة دي .
> غايتو مع ناس الصيني ديل شافعك ده حايقول ليك مالك مالي.
> ياخ ده مع ركبة جابسون دي ممكن عادي تلقاهو سافي.
> قوة رأس شديدة
> انت عارف يا ابو حميد اي درون تاني شافعك ده ممكن قوة الرأس تخليهو يسيب الروضة ويغترب.
> بي طريقة الهلال دي يوم غايتو حاتلقاهو سجل ليك محل اغاني وردي اغنيات قلبا قلبا قلبا.
> وتسألوا يقول ليك سيب الكلام الكتير وقول لماما محاسن كبي جنزبيل.
> لو داير شافعك يسيب قوة الرأس السنة دي شجع هلال ابراهومة يا حمادة.
> ايها الناس.
> ان تنصروا الله ينصركم.
> اها.
> نجي لي شمارات والي الخرطوم.
> كان شفت يا والينا.
> خمسة وعشرين الف جنيه قيمة اقل سلطة تتباع لينا.
> سلطة يا والينا.
> بالطريقة دي كيف حاتقتسموا معانا السلطة قول لينا.
> ما دايرين ثروة يا والينا.
> ولا دايرين نحكم ولو دقيقة وتتحسب علينا ونتحاسب بيها يا والينا.
> دايرين سلطة تسد رمقاً فينا .
> طماطمايات وعجيجيرة وجريجيرة وجزيرة يابسة وليمونة فاقدة سوائل.
> اول مرة اشوف ليمون بدرة يا والينا.
سلك كهربا
ننساك كيف والكلب قال الليمون جفن دموعو بقي (سايلنت ) قدر ما تعصر نقطة ما بتنزل… .ليمون  ولا منفاخ يا كافي البلا.
والى لقاء.
سلك