السبت، 19 آب/أغسطس 2017

board

نحن هنا

> نحن هنا لن نقولها الا اذا حققنا دخلاً مليارياً اليوم.
> نحن هنا لن نقولها الا اذا اشعلنا من حناجرنا زئيراً تهتز له الدنيا بما فيها ومن فيها.
> نحن هنا لن نقولها الا اذا اعدنا ابداعاتنا الجماهيرية على مدرجاتنا التي تفخر بنا.

> نحن هنا نقولها من عصراً بدري.
> حتى لا يأتي النصر ويقول انه حضر ولم يجدنا.
> نأتي قبل النصر لنستقبل نصرنا بأنفسنا.
> ويلا نقولها.
> نحن هنا.
> يلا نقولها المريخ ده فن وكورة.
> ايها الناس.
> الحضور فرض عين علينا جميعاً.
> ومافي حتة بعيدة طالما في زلط.
> مافي حتة بعيدة طالما بالقلب حب وعشق وتفان.
> الفلس ليس عذراً.
> أقيف في الزلط وأشر للعربات.
> الكورة !
> اكيد حا يقيف ليك شفت يجيبك معاهو.
> البرد ليس عذراً.
> فاحضان الزعيم تدفئنا.
> ايها الشفت
> نحتاج لثمن تذكرتك.
> عشان كده كلو شفت يبقي رقيب وهو داخل الاستاد.
> تأكد من أن تذكرتك اتقطعت من التذكرجي.
> واتقطعت من الدخلنجي.
> وخليك حريص مافي زول يدخل قدامك ساي بدون تذكرة.
> القصة دي ما شك في زول.
> ولكنها حرص على حقوق المريخ وايماناً بأن الخطأ وارد.
> ايها الشفت.
> بمثلما نحتاج لثمن تذكرتك نحتاج لصوتك.
> يبقى الداير يجينا يقطع تذكرة ويقعد يتفرج.
> اخير ليهو يحضرها في التلفزيون.
> فنحن نحتاج لخمسين ألف محارب شفت.
> لا نحتاج لمتفرجين.
> واسأل ناس الجوارح جهزتوا الدخلة الطلبتها منكم؟
> واسأل ناس اولمبيوس هل لديكم اصرار على مواصلة ادهاش غرزة كما عهدتكم؟
> واسأل ناس اسود ماذا اعددتم لنا من مفاجآتكم؟
> واسأل اهل تورنيدو بابداعاتكم جايين ناقصين ولا جايننا كلكم؟
> اسأل جميع المسميات التشجيعية.
> تعالوا كلكم بربكم.
> وورونا كيف هي استعداداتكم لموسمنا الجديد.
> ايها الناس.
> اي زول مركزو او بطاقتو او شلاقتو بتدخلو مجاني عليكم الله الليلة يدفع حق التذكرة.
> المهم.
> نقوم بشغلنا على اكمل وجه.
> ونترك للآخرين اختصاصاتهم.
> لو انتهت زي ما بدت متأهلين.
> يبقى شفقة على النصر مافي ليها داعي.
> يجي في اي وكت ما مشكلة.
> بس ما نتلف اعصاب اولادنا داخل الملعب.
> قبل كده ايام كروجر تعادلنا في المغرب اتنين اتنين.
> وفي الاياب بام درمان جينا نمني النفس باهداف مطر.
> مع انو التعادل يكفينا للتأهل.
> فتعالت الصافرات المستهجنة واربكت اللاعبين لمن قربنا نخسر المباراة.
> يبقى لا نستعجل النصر.
> ايها الناس.
> ياحلاتنا لو كنا على المدرجات نلبس الشعار والكابات ونحمل الرايات.
> منظر جميل ومظهر محترم يليق بينا.
> ويلا نقولها.
> نحن هنا.
> ايها الناس.
> إن تنصروا الله ينصركم.
> أها.
> نجي لي شمارات والي الخرتوم.
> كان شفت يا والينا.
> ما بنتكلم في السياسة بقينا.
> ولا بنتكلم في السرقة والفساد الفينا.
> ولا بنجيب سيرة الجوع الطلع عينا.
> بقينا زي النسوان نقطع فيهن يا والينا.
> يوم واحد قال لينا.
> المرة دي بقت زي سودانير قعدتها في البمبر تاني ما بتقوم لو البيت وقع فينا.
> واحد تاني اتحكر وقال يا والينا.
> والله عندي مرة تجي تقوم ترازي في محلها اليوم كلو وما بتتحرك لينا.
> مرة زي المظاهرات دايرة تقوم وما قادرة تقوم يا والينا.
سلك كهربا
ننساك كيف والكلب قال بتقوم … هي القيامة بتقوم… موش سودانير دي بتقوم.
والى لقاء.
سلك