الخميس، 19 تشرين1/أكتوير 2017

board

بورت لويس موريشيوص كديس

> أسي ده اسم فريق ولا غلوطية ؟؟
> زي دخل القش وما قال كش
> سخلي وسخلك دخلو السلخانة سخلي سلخ سخلك يقدر سخلك يسلخ سخلي زي ما سخلي سلخ سخلك

> سخلي دي ممكن تقولها بسرعة عشرة مرات
> لكن ما أظن في زول بقدر يقول بورت لويس موريشيوص كديس مرة واحدة صاح
> بتجيبوا الفرق دي من وين يا محمد عبد الماجد !
> ما علينا
> نعود لمباراتنا ضد الغيني
> عظمة الجمهور أعلنت عن نفسها
> ويا جمال وروعة المشهد المعبر حينما عانق مونس الجوارح واحتضن الجوارح مونس
> ويا لدهشة المشهد حينما عانق الساساب مونس
> ويا لروعة الانصهار حد الانبهار وسط الشفوت
> جمهور جميل وواعي ومبدع وخلاق ويعرف كيف يعبر عن ما يريد
> جماهير المريخ سيدة و جمالها فريد
> خلقوها زي ما تريد
> و غيرنا يقلد وبس
> اذا هتفنا مريخ. .مانديلا
> بكرة نسمع هتاف تقليد من الجانب الآخر
> هناي. .مانديلا
> جمهور المريخ عموماً
> جمهور المساطب الشعبية وشاخور شرقية لوحة إبداعية
> قيمة حماسية
> وقفة قوية
> و طموح عالٍ
> ونعيب على رواد الجانبيات الغيابات افريقياً
> وبالطريقة دي مابنسوقكم معانا المطار
> تقعدوا زي الاصفار ما تشموا ريحة المطار
> والعايز يمشي المطار يسجل حضور داخل الاستاد لا من خلال القروبات او من خلف الكي بورد
> شرف لا يضاهيه شرف حينما تكون أحد أسباب النصر
> لأن وجودنا على المدرجات يدعم الكيان
> مجرد نفسنا يعتبر دعم للاعبين
> دي فاتت
> بتاعت جيبوتي فاتت
> ولكن لن تغفر لكم غياباتكم يا رواد الجانبيات في الجايات
> نريد مقاتلين لا مجرد منتمين
> ولكن لوحة الشفوت الجماهيرية تظل دوماً حدثاً مدهشاً و حديثاً رائجاً
> وهل ننسى توجية إعلام الجزائر لجماهيره أن تتعلم من جمهور المريخ !
> وهل ننسى تصوير لاعبو اتحاد الجزائر ووفاق سطيف لجمهور المريخ ؟؟
> إنها الدهشة
> أيها الناس
> جمهور كهذا لا يعرف الانقسام ولا الانشقاق
> وما يدور من إرهاصات في قطاع الجماهير يجب  ألا يشغل الجماهير المبدعة عن إبداعها في تشجيع الزعيم
> نحتاج لمزيد من الحب
> لنرسم لوحة أدهشتنا عند عناق أولمبيوس والجوارح
> وسرتنا حين زحف أنصار ساس بجحافلهم وراياتهم نحو مواقع القتال الأمامية الخاصة بمونس
> دعونا نحب بعضنا لنمارس العشق النبيل
> وهل هناك عشق أنبل من حب الزعيم؟؟
> المهم
> الكسكتاب زعلانين من قون بكري الأول
> قون مزج فيهو بكري بين الأسكروا واللوب
> ختاها محل برك الطير
> القون ده واجعهم شديد
> لدرجة إنهم هربوا من الحديث عنه بالغلاط
> الرابع جابو ضفر ولا بكري ؟؟
> لو ضفر خلاها كان خشت ولا كانت دقت في الحديدة ؟؟
> أقعدوا يا روشا أبحثوا عن الجاب القون الرابع ضفر ولا بكري لمن تلقوا روحكم في المحاولة رقم تسعين للخروج من الصفر الكبير
> بورت كديس سخل شنو ؟؟
> أيها الناس
> أكتب قبل لقاء الصفراب بالأرباباب
> تحكيم جدير ولافاني كيسو يطير
> ولا أعتقد أن شندي تحتاج لمستشفى ولادة
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> المنهج ده لي قدام مابودينا
> كنا أكثر الشعوب ثقافة يا والينا
> لأنو منهجنا زينة وكان بودينا
> ليه مسكننا والدنيا من حولنا و البحر من خلفنا يا والينا ؟
> ليه سطر علوم وسطر تاريخ والجغرافيا ضمير بستتر علينا ؟
> لا الطالب عارف شنو الهدف من المادة يا والينا
> ولا أمو البتراجع معاهو فاهمة شيء عشان تقريهو لينا
> كلامه كلو بري..  بري جنس ده ما قرينا
سلك كهربا
ننساك كيف والكلب قال حليل بلد البت والولد البقت بلد لبع لغف لبد
والي لقاء
سلك

الأعمدة

د. حسن التجاني

الأربعاء، 18 تشرين1/أكتوير 2017

خالد كسلا

الأربعاء، 18 تشرين1/أكتوير 2017

إسحق فضل الله

الأربعاء، 18 تشرين1/أكتوير 2017

الصادق الرزيقي

الأربعاء، 18 تشرين1/أكتوير 2017

د. حسن التجاني

الثلاثاء، 17 تشرين1/أكتوير 2017

خالد كسلا

الثلاثاء، 17 تشرين1/أكتوير 2017

بابكر سلك

الثلاثاء، 17 تشرين1/أكتوير 2017

إسحق فضل الله

الثلاثاء، 17 تشرين1/أكتوير 2017