الإثنين، 11 كانون1/ديسمبر 2017

board

التجانية # التجاني الماحي

> سادتنا التجانية أهل صلاح ودين وأصحاب سجادة طال عمرها ويطول هي متسع لإقامة الصلاة وتعلم القرآن والفقه
> مدد يا سادة
> وتحية وإجلال لسادتنا الصوفية أينما كانوا وحيثما قطنوا

> واحتراماتنا لكل من علم الناس حرفاً في أمور الدين
> المهم
> آخر ما توصلت ليهو فطومة أختي هو توجيهها لكردنة ليستعين بسادته التجانية في إخراج الهلال من حالتو الصعبة دي
> ونحن نضم صوتنا لصوتها
> الحاصل في الهلال ده يا التجانية يا التجاني الماحي
> ياهو البجنن
> أربعة درونات وأربعين مدرب؟
> ده ما ياهو البجنن ذاتو
> كلمناكم قلنا ليكم شيبوب وجابسون وأب ستة وبخاري بخلوا حالتكم شلش
> تمشوا تجيبوا شلش ذاتو؟
> شوفي يا فطومة يا أختي
> لو التجانية ماعالجوكم
> وماعندكم تأمين يدخلكم التجاني الماحي
> علاجكم تاني يا فطومة إلا عند الأرباب
> ديل من ناحية بعالجوكم بعالجوكم
> لكن علاجهم حاااااار
> كية من نار وبتر
> جرعة عسل مافي
> ببتروا ليكم جميع الأعضاء الضارة بالهلال حسب فهمهم
> القصة علاج ماتزعلوا
> غايتو يا محمد عبدالماجد لو بقيت من المبتورين يا حليلك
> حاتوحشنا
> لكن بصراحة الهلال محتاج تكريم يا فطومة
> لأنو فريق بمستوى زي ده وعدم استقرار فني زي ده وتصريحات لقيماتية خنفشارية زي دي
> وكلما يظهر بمظهر سيء كردنتو يلبس كسكتتو ويزور جوهرتو ليعطي ميعاد جديد للافتتاح
> المدرب البجيبو اول يوم خبير وكبير وصائد بطولات وبعد شهر كيسو يفضي وما يصيد مع الهلال غير صيانة المستشفيات الولائية العامة وتشييد مستشفيات الولادة
> ده مدرب ولا اختصاصي صحة إنجابية يا فطومة؟!
> فريق بكل تلك الصفات ولسه قاعد يحتاج لتكريم ياروشا لا لعلاج
> يا التجانية يا التجاني الماحي
> الجن بنداوى
> المهم
> من الجانب الآخر
> تصل البلاد فجر اليوم بعثة النصر المريخية الظافرة قادمة من موريتانيا تحمل تلاتة نقاط
> تلاتة نقاط دي الهلال بجيبها في تلاتة مباريات في حالة ارتفاع مستواه وإفادته من أخطاء التحكيم الطبيعية الشائعة
> المهم تعود البعثة الظافرة المنتصرة بهدف راموس جعفر الرأسي من ركنية السماني كوفي
> أوكرا كيف؟
> غيرتوهوا في نيالا مالو إن شاء الله خير؟
> غرزة قال ما نافع يبقى الكسكتة شربت المقلب
> المهم
> يقابل أبو الهل وادي أسامة عطا المنان
> ولا نظن أن علاقة صديقي محسن الجيدة بصديقه الديبة ستكون سبباً لتراخي أولاد الوادي
> أولاد الوادي يطمعون في النقاط بالكامل
> ومن حقهم
> الخصم ضعيف جداً
> الأرض أرضهم
> والجمهور جمهورهم
> ونيالا لا تحتاج لمستشفى ولادة
> فطومة
> أمشوا التجانية بعد كورة الوادي
> باقي ناس الوادي ديل هم برضك تجانية كباااار وقدااااام
> وكان غلبكم الصبر
> في وداعية شاااطرة بتشوف بالبخور أحد وأربع
> طالما أيمانكم بالحاجات دي وصل الدرجة دي
> في زول في الجبل بحوط
> أمشوا ليهو يحوط ليكم شبكة مكسيم البتستقبل أقوان من بره الإستاد دي
> رغم أني زمااان قلت ليكم ماكسيم شعارو البره الخط بره العقد
> الدليل قون علاء الدين يوسف
> ولو زول الجبل قال ليكم الشبكة دي مابتتحوط لأنها الشبكة الأوسع
> في زول في مايو شااااطر
> لكن أول حاجة تحولوا ليهو رصيد وتدوهوا اسم أم مكسيم ويبيت ليكم في الخيرة
> لما الواطة تصبح تكون واطاتكم أصبحت تقوموا ترجعوا للتجانية
> جنيتوا يا فطومة يا اختي
> جن عدييييييل
> سمعنا قالوا الازيرقاب بدوا الجني
> لكن أول يوم نسمع بالتجانية بدوا القون
> دي جديدة يا فطومة
> أيها الناس
> يا ناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الباعوض السارح فينا
> ولاشغال بينا
> لابقرصنا ولابعضينا
> قال قايلين روحكم بشر
> تخيل يا والينا
سلك كهربا
ننساك كيف والكلب قال حتي الباعوض سفهكم! نودي وشنا وييييييين عاد!
والي لقاء
سلك