الخميس، 25 أيار 2017

board

درونين تاني الجوهرة بتكتمل

> إخوتنا الأهلة أحلى ناس
> يدرنوا
> يقولوا كراسي الجوهرة وصلت
> يدرنوا تاني


> يقولوا أساسنير المقصورة في بورتسودان
> يتطقطقوا
> يقولوا ترابيز الجوهرة بي طقاطيقم وصلت الخرطوم بي دفار جامبو
> وتكتر طقاطيقهم تطلع لغاليغم
> وبعد كورة وادي نيالا أنا خايف يقولوا كردنة شحن إستاد كامل بي جماهيرو من الصين أسي في الجمارك
> والغريبة روشا بقي يحتجب
> يحتجب زي محمد عبد الماجد
> محمد عبد الماجد لما يعود بعد الاحتجاب بكتب عن عثمان حسين
> ما تستبعدوا روشا يعود من الاحتجاب بالحديث عن هاجر كباشي ودورها الرائد في دعم مكتبة الأغنية السودانية
> ياخ كراسي الجوهرة دي وصلت أربعطاشر مرة
> مرة يوم الانسحاب من الدمازين
> ومرة يوم الانسحاب من دنقلا
> ومرة يوم الاتحاد الليبي
> ومرتين يوم أهلي شندي
> ومرة يوم أربعة التبلدي
> والسنة دي أربعة درونات
> أقصد أربعة مرات
> كراسي الجوهرة دي بتجيبوا فيها كرسي كرسي يا فطومة ؟؟
> لو كده شوفوا عدد الكراسي كم
> لأنو كلو كرسي بي درون وكلو هزيمة بعشرة كراسي
> الموسم ده أتوقع تعادلات بعدد سيخ الجوهرة يا روشا
> حاتحتجب كتير
> والبحتجب بحتسب
> فطومة مكتوبين ومسحورين لسه ولا لقيتوا ليكم فكي شاااااطر ؟
> غايتو عندي ليكم مرة خطييييرة
> بتجرتق الخروف وتكحلوا
> وتفك الجاولي والعدني وسبعة بخاير
> بخاير دي جمع بخاري يا ربي !!
> المهم بعد تجرتق الخروف وتكحلوا ليكم وتبخروا
> تشوف خيطكم شنو ؟
> داخلكم خيط حبش يا ربي ؟
> ناس اللولية
> لولا الحبشية
> ويمكن أحمد البشير
> أحمد البشير ماعم طه علي البشير يا فطومة
> خيط ظار
> ويمكن الخواجة
> لكن الخواجه بلبس ردا
> الكسكتة براها مابترمز للخواجة
> الردا أساسي
> سلفا كير لابس كسكتة وما خواجة
> ويمكن خيطكم الزرق الطوال
> لكن ما أظن
> طوال كيفن مع ناس أوكرا وشيبولا وشلش وإبراهومة وسادومبا
> ديل لو وقفوهم كلهم فوق بعض هد مابشيلوا
> يكون يا ربي أزرق بنده ؟
> ولا خاشيكم خيط جديد اسمو كراسي الجوهرة ؟
> محاسن.. أعملي يومية الخروف مجرتق والبخور راقد والجاولي كاجي والعدني باقي والحمام مضبوح والفشار فشار
> فشار ساااااااي
> أهم حاجة ضبحت الحمام دي
> وفرفرت الحمام بعد ضبحو فيها إبداع
> أثناء ما بفرفر جنحينو بعملن إيقاع بقول
> كراسي الجوهرة جات كراسي الجوهرة جات كراسي الجوهرة جات
> ولما يوقف فرفرة ويمد جنحينو مفرودات بكون تعبير عن وصول أسانسير المقصورة
> أول حاجة حايشيلها أسانسير المقصورة هي جثمان الحمام
> أيها الناس
> فعلاً الهلال مكتوب
> مكتوب كتير
> مكتوب في الصفر المكتوب ليهو ده
> هو ياخ لو ما مكتوب كتاب الهلال في مقال واحد يكتبوا الحكم ظلمهم وجمبها طوالي يكتبوا مكسيم ينقذ أهدافاً مؤكدة
> وبعدها طوالي القائم يصد كرتين للبحير
> اتنين في الحديدة ومكسيم أنقذ أهداف عديدة والحكم ظلمهم
> أسي ده دحين ما كلام زول مكتوب في جناح حمامة وفكوها في الخلا ؟
> جابسون ذاتو مكتوب
> زي شيبوب
> ديل علاجهم عند الشيخ أب ركبة
> لكن محلو بعيد
> عشان ما تمشوا وتجوا وتمشوا تاني
> شيلوا معاكم سحلية خريجة
> وورل مجكس تمساحة
> لازم يكون مجكس تمساحة
> كان مجكس ورلة ما بعالج جنس ركبة جابسون دي
> وكلب زهجان
> لازم كلب يكون زهجان
> وأرنب مفلهمة
> وده ساهل
> معظم الأرانب مفلهمات
> ياخ قال ليك يوم أرنوب ماشي في الغابة مع أرنوبة نظام حب وكده
> الود قاشر ويتقدل
> يعاين للسماء وللشجر وللبحر مالاقي ليهو موضوع
> ماشي بطرف أصابعينو نظام فلهمه وكده
> أرنوبة ساكتة ساي نظام البت خجلانة وكلامها بسيط
> أرنوب مالاقي موضوع
> فجأة شاف ليهو أسد متضايق شديد
> أظنو ماكل ليهو قرد مدتو منتهية
> لواية لواية مبالغة
> الأسد لو ماخجل كان قال واي
> يقرب يقول واي يتذكر إنو أسد
> يقطعها في حشاهو
> وغلبو الصبر
> عملها ليك
> الأرنب شافو
> لقي ليهو موضوع
> أرنب مفلهم شديد
> واتلفت ليك على أرنوبة
> بالله يا أرنوبة دي عملية يعملها ملك الغابة في الشارع ؟
> وين برلمان الغابة ؟ وين المثقفين وحماة البيئة في الغابة ...؟
> بالله ده ملك الغابة
> وين ناس حقوق الحيوان في الغابة دي؟
> دي عملية ما كريمة يا أرنوبة
> الأسد ساااااامعو لكن متضايق شديد
> شال ليك الأرنب الأبيض الجميل
> الأسد طبعاً ما جاب أبريقو معاهو
> استغل الأرنب في ظل اللواية وغياب الإبريق وجدعو ليك
> تخيل منظر أرنوب مع أرنوبة بعد هذا الاستعمال الأسدي ؟
> ده نفس منظر جماعة أصحابنا كده
> نفس الحرج
> بس الأرنب أكلها ومشى
> ما برر
> ما قال كراسي الجوهرة وصلت
> المهم
> تشيلوا الحاجات دي كلها للشيخ أب ركبة وتسوقوا جابسون وشيبوب والشافي الله
> ياخ الهلال لو ما مكتوب مارتن يجيبها من تندلتي ؟
> قون زي ده ما بخش إلا في زول مكتوب
> أيها الناس
> الوضوح هو الخطوة الأولى للعلاج
> مشكلة الهلال ما مدرب
> المدرب ده زي البنا
> تجيب ليهو سيخ وأسمنت وخرصانة يبني ليك بالمسلح عمارة
> تجيب ليهو طوب أحمر او بلك يبني ليك قدر طوبك وبلوكك ده و ممكن كمان يشيلو ليك طابق
> تجيب ليهو طين ساي ببني ليك جالوص
> وناس الهلال بي طينهم ده دايرين المدرب يبني ليهم تلاتة طوابق
> جالوصكم ده مابشيل طابقين يا محمد عبد الماجد يا اخوي
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> قاعدين في عزاء والدة أخ عزيز لدينا
> وحرم مولانا قاضي العليا مدرسة ومرجع لينا
> العزاء بالثورة بيت مولانا الشارع الفاصل بين التامنة والرياض يا والينا
> بيت مولانا يقع بين أكبر تلاتة كوش في الشرق الأوسط يا والينا
> وفجأة سمعنا إنو السيد الرئيس جاي يعزينا
> كل آليات المحلية اشتغلت القرف فينا
> الكوشة الأولى شالوها التقول بالواتساب يا والينا
> سريع وبارحت مكانها الليهو سنين وسطينا
> الكوشة التانية اتلفتنا أثرها ما لقينا
> الكوشة التالتة لي مكانها ذاتو نسينا
> وقشوا الشارع يا والينا
> يعني يا والينا ناس محليتك ديل ما بنضفوا إلا يموت عزيز لدينا والريس يجي يعزينا
> إن شاء الله نموت كلنا والريس يجي يعزي فينا عشان ننضف يا والينا
سلك كهربا
> ننساك كيف والكلب لقى الكوش مافي قال كلاب
والي لقاء
سلك