الإثنين، 11 كانون1/ديسمبر 2017

board

كراسي جوهرة هلال الأبيض جات

> يبدأ الزعيم استعداداته بروح معنوية عالية بحمد الله ورضوان الله
> الفي الكنبة والفي التشكيلة وااااااحد
> ما شاء الله حتى الإسبير في المريخ أصلي

> عكس الجماعة
> بولفوا ساااااي
> والتوليف ذاتو واقعين السكند هاند
> وأريتو كان سكند بره
> بكون شوية فيهو روح وبمشي
> سكند البلد دي
> ناس الخرد بشتروا العربية ويجزروها
> يبيعوها كإسبيرات مستعملة
> بتغطي معاهم
> لكن أصحابنا ديل حتى الخرد الاشتروها إلا يقطعوها ويبيعوها صاج
> زي جابسون ده لو جزروهو شيء شغال ما فيهو
> الركب إلا يبيعوها في الوزن
> ورصرص القدم بلي كارو ما بشتغل
> غايتو بيعه بالخسارة
> أما أب ستة
> وشيبوب
> المكبس بس
> مافي شيء شغال
> جماعتنا ديل الفي التشكيلة والفي الكنبة كلو محصل بعضو
> ويعود ذلك للفشل في التسجيلات الناتج عن قلة خبرة وطمبرة إعلامية مصاحبة زينت الخرد وأدتهم رشة بوهية بالمسدس فشرب الأهلة الشرفاء المقلب ولكن بشروهم بوصول كراسي الجوهرة
> كراسي جوهرة هلال الأبيض أمس وصلت
> موش اتعادلوا مع شرطة القضارف؟
> يبقي كراسي جوهرتهم وصلت
> الأهلة ديل أصلهم كده
> ما تقول لي زول فيهم إن شاء الله قيامتك تقوم
> لو داير تزعلو بس قول ليهو إن شاء الله كراسي جوهرتك تصل
> طوالي بعرف القصة يا درون يا مغلوب
> والسنة دي كراسي جوهرتهم حاتصل كتييييير
> والغريبة يوم تتشحن من موريشيوص
> اليوم داك بتتشحن معاها الجماهير البتقعد فيها
> كراسي الجوهرة تصل بي جماهيرها
> محاسن كتري الكسرة وأفركي البامية كتيييرة
> مضيوفين يا أختي
> آها
> أمس منتخبنا الأولمبي كراسي جوهرتو اتشحنت
> درن مع السنغال
> خطوة أولى جيدة
> مع تمنياتنا له بالتوفيق و المضي قدماً
> المهم
> إعدادنا يجري على قدم وساق
> ومعنوياتنا في السما
> ونسمح للناس الكراسي جوهرتهم وصلت يجوا يستمتعوا معانا من خلال مبارياتنا
> باقي كيسا فاضي ما عندنا
> والركب سليمة
> أيها الناس
> قالوا الهلال اشتكى بعض الحكام وقال تاني ما داير وشهم ده
> تحت تحت قالوا الحكام ديل هم حكم مباراتهم في كادقلي التعادلية وحكم مباراة مريخ البحير التعادلية وحكم مباراة أهلي شندي التعادلية
> ونعلم أن مباراة الأبيض برضك كانت تعادلية
> فهل اشتكي الهلال أب شنب ولا سقط سهواً؟
> محاسن نزلي الراية القال ليك نزار أوف منوووووو
> أيها الناس
> اذا اشتكى الهلال حكماً فاعلم أن كراسي الجوهرة وصلت
> واذا سافر الهلال موريسشيوص فاعلم بقرب افتتاح الجوهرة
> وكان الأرباب ختَّ رجلو في البلد دي
> محاسن أجري
> أيها الناس
> نعيش استقراراً كبيراً يجب ألا نفسده بأمور هامشية
> رئاسة البعثات تكليف وليست تشريف
> والأنسب هو الأدري بالبلد التي تتوجه لها البعثة وصاحب العلاقات الواسعة بها
> لكن بيني وبينكم لو تركنا أمر قيادة جميع البعثات للمعلم غرزة يكون أحسن
> ويمكن أن تضم البعثة أي إداري يرغب في مرافقتها على نفقته سفراً وإعاشة وإقامة وبعد إسهامه في تكاليف نفقات البعثة ذااااتها
> أيها الناس
> نحن في حالة رائعة
> والمتصفح لصفحتنا يجد الحالة فرح وسرور وانبساط
> وحالة غيرنا تضحك
> دخلت صفحتهم لقيت حالتهم
> كراسي الجوهرة وصلت وجمبها صورة وش حزييييين
> وحتى نحافظ على الحالة يجب علينا أن نترفع عن الصغائر لنمضي في درب السعادة
> نتقبل الآخر بصدر رحب
> نضع الزعيم مصلحة عليا
> نرتفع بطموحاتنا الى قمم الهملايا
> ونقدم السبت
> نسدد اشتراك مجلس الشرف
> نعترف بالآخر ولا نسلبه حقه في اعتناق رأي ولا في التعبير عنه
> ونهتف جميعاً
> أوووو أووو مريخ
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> النفايات مشتتة غطت زلط المدينة
> و الحشرات بكل أنواعها حايمة فينا
> وتمن الدواء صعب علينا
> تمرضونا ومابتعالجونا يا والينا
> نخت كيس النفايات للعربية المابتجينا
> ولو جات مواعيدها ما معروفة لدينا
> الكلب يجي يشتتها علينا
> شماسي يكشحها ويشيل الشوال يا والينا
> ولا بتاع خرد يفرفرها ويخليها لينا
> ما في فكرة غير قصة عربية النفايات دي يا والينا؟
سلك كهربا
ننساك كيف والكلب قال مافي فكرة غير المحليات دي يا نااااس؟
والي لقاء
سلك