الإثنين، 11 كانون1/ديسمبر 2017

board

اليوم سنتأهل ونستاهل

> لا اجد مبرراً يجعل الناس كسالى من حضور مباراة اليوم بسبب نتيجة مباراة السلاطين.
> فالجميع يعلم كيف اديناها ولماذا اديناها بتلك الطريقة.
> ثم ان مباراة اليوم تأهلنا لمجموعات البطولة العربية.

> وهذه مرحلة في البلد دي مافي زول غيرنا وصلها.
> برانا نشيل شيلة الوطن عربياً.
> وقريبا برانا نشيل شيلة الوطن افريقياً.
> قريباً جداً.
> برغم ان غيرنا بالنسبة ليهو الشغل فكة.
> الا ان تلك الفكة لا تنفع افريقيا حيث الطقوس والكجور.
> المهم
> كعادتنا دوليا نجي كلنا.
> لنتنافس في دعم الزعيم معنوياً وماديا
> ولنزفه عريساً لمجموعات العرب.
> والحردان ما حبابو.
> ابونا المريخ قال نجي كلنا يبقي نجي كلنا.
> فالتشكيلة الرسمية لاوركسترا اولاد غرزة لن تتقاعس باي حال من الاحوال.
> تعالوا لنغني كية للعزابة.
> لنرقص على انغام برانا برانا نشيل السيرة.
> برانا برانا نسوي السيرة.
> ونتوحد ونعمل عملاً جميل على المدرجات.
> ايها الناس.
> عربياً نقاتل وحدنا مهما برر الحاسدون.
> وللسودان سمعة سيئة تاريخياً في بطولة العرب.
> فغيرنا شارك واخد ستة اهداف في الشوط الاول فقط.
> حتى تدخلت الدبلوماسية السودانية وتوسلت للدبلوماسية التونسية والتي بدورها وسطت وزير رياضة تونس للتدخل، مما حدا به للاتصال برئيس اتحاد الكرة التونسي الذي الزم بدوره رئيس الترجي الرياضي بوقف الاهداف في الشوط التاني و الاكتفاء بالدكاترة الستة بتاعين الشوط الاول.
> وكان السوء اكبر حينما ضبط عربياً ورسمياً واثناء البطولة وعند الكشف الطبي، لاعباً من ضمن لاعبي النادي شارك باسمنا وهو منشط.
> منشطات بالثابتة.
> ناس بتتنشط قبل نعرف الشرائح.
> واتنشطي.
> لذا ولذلك ولكل ذلك.
> يقع على عاتق الزعيم عبء مسح الصورة الشينة والمشينة للسودان في البطولة العربية.
> وموش كده وبس.
> عربياً قبل كده عندنا فريق اتغلب اتنين في سوداننا الحلو ده وزاغ من كورة الرد.
> المليون شهيد لي اسي راجين جيتو.
> لكن حبيبنا زاغ.
> محاسن جابت ليها جكة؟
> أيها الناس.
> نجي كلنا من أجل تجميل وجه الوطن عربياً بعد كل تلك الفضائح.
> نجي كلنا لنقول لن ندعك تسير وحيداً يا مريخ.
> نجي كلنا وفي الخاطر احتفاء واحتفال وذكرى مطار.
> بمناسبة المطار دي.
> حقو كردنة يبني المطار الجديد يمكن يجيبوا بيهو شيء.
> المطار القديم ده سكوهوا من زمن طيارات الورق غير الفضائح والخسائر ماجابوا بيهو شيء.
> وطارت الطيارة طارت.
> ايها الناس.
> لمن نتأهل بفضل الله لمجموعات الاسكندرية.
> الفرصة بتكون كويسة للقاء رئيس سموحة ودردقتو.
> محاسن زوغي الراجل.
> ايها الناس.
> إن تنصروا الله ينصركم.
> أها.
> نجي لي شمارات والي الخرتوم.
> كان شفت يا والينا.
> الطماطم زي الضغط تنزل فجأة وفجأة تطلع لينا.
> واللحمة زي السكري طوالي طالعة يا والينا.
> والسكر (بضم السين) بقي يزوزي بينا.
> أمال كيف يكون الحال لو انفتحت السين يا والينا.
> راجعوا الأسعار وشكل الحياة لينا.
> لو درتوا تحسوا بينا.
> وعلى كيفكم ما مجبورين يا والينا.
سلك كهربا
ننساك كيف والكلب قال أخير تكون الأسعار كده.. لو فكروا يخفضوها يعملوا ليها لجنة ذات مخصصات مليارية، وانجبروا يزيدوا الاسعار تاني عشان يطلعوا حق لجنة تخفيض الأسعار ومخصصاتها.
والى لقاء.
سلك