الخميس، 25 أيار 2017

board

أنا قايل ضفر مرقا من قونا

> ما يدعونا للتندر والسخرية في مباراتنا ضد زينة كتير
> صديقي سليمان كانت له طرفة جميلة
> يوم الكورة كان مضيوف

> معاهو جماعة مهمين من البلد ومتعشين معاهو
> عشان كده ما دخل الكورة
> التلفزيون الجوة شغال
> بحكي لي سليمان
> قال لي اول دقيتين اسمع ليك قون
> زغت من الضيوف براحة اتقدل
> بمجرد ما اديتهم ضهري جريت جري للتلفزيون
> لقيت كلتشي جاب قون
> صلحت جلابيتي و رجعت للضيوف شايل تربيزة نظام الود مشى يجيبها
> قعدنا شوية اسمع ليك قووووون… العقرب.. بكري المدينة يخرب بيت زينة
> ولافي زول جوة ناداني
> قمت قلت
> نعم… جاي
> و مشيت
> أول من أديت الضيوف ضهري قمت جاري على التلفزيون
> و يواصل صديقي سليمان
> لما وصلت التلفزيون لقيت ليك بكري راكب المارشال ومعاهو كلتشي والتكت
> قلت الليلة بنخرب كل الزينة
> اطمأنيت
> وطيت صوت التلفزيون وصلحت الجلابية و مشيت على الضيوف
> الدور ده شايل جك موية
> يا هلا شرفتونا والله
> وهاك يا ونسة
> بعد ساعة كده دخلت أجيب العشا
> غشيت التلفزيون
> القى ليك ضفر مارقها من خط القون والمعلق بهرج
> قلت في سري عافي منك يا ضفر
> كنت قايل ضفر مارقا من قوننا
> لكن تاني يوم لمن عرفت ضفر مارقا من قون زينة
> زعلت على عفوي الراح ساي
> ايها الناس
> بصرف النظر عن قبول الناس او بعضهم بالحقيقة او رفضهم او بعضهم للحقيقة
> لابد من قولها
> البحصل ده كلو سببو هباب تركيا الاعدادي ده
> وتعود بنا الذاكرة لذلك الوقت و يظهر على شاشتها قرار منع الاعلام من مرافقة البعثة وتغطية المعسكر
> بعد الشفناهو ده
> هل كان القرار خجلة مما يحدث في المعسكر قبل ان يبدأ من اخفاقات كبيرة اكبرها في اكتساب اللياقة البدنية لان مصدر القرار على علم بعدم وجود معد بدني بالبعثة ولا كان قرار ساي تزامن مع افتقاد البعثة للمعد البدني ؟
> وهل لذلك علاقة بابتعاد حكيم سبع ؟؟
> ولا حكيم اتخارج براهو بدون ادنى علاقة لذلك الفشل بهروب حكيم؟؟
> وهل ايام البرد الشديد كان التمرين بتلغي حقاً؟؟
> يقطع المعسكر التركي لأبو النبق الفارسي ذاتو
> أيها الناس
> العيب لافي جهاز فني ولا في لاعبين
> والدليل على ذلك ان الاداء الذي بدأنا به المباراة كان قمة التكتيك وفائق التطبيق و اجمل المهارات والتي اجاد في عزفها السماني الموهوب
> وفي الشوط التاني أدينا بنفس الجهاز الفني ونفس اللاعبين
> ولكن غابت اللياقة البدنية فغابت معها الذهنية وتغير الحال
> نخلص الى أن الجهاز الفني كان حضوراً وكذلك اللاعبين
> ولكن غاب الوقود (اللياقة)
> فأضحى التكتيك وتطبيقه عبارة عن سيارات فارهة قاطعه بنزين تقبع في مكانها يوصفوا بيها
> وده كلو بسبب معسكر حريم السلطان
> يقطع السلطان ومهند ونور ذاتهم
> أيها الناس
> شوط آهـ وشوط لا وأبداً ولا يمكن كمان
> بقينا زي الزول الماشي مدني وعندو صندوق سجاير غيرو ما عندو
> من اتحرك من الخرطوم بدأ ينفخ بي سبب وبدون سبب
> آخر سيجارة طفاها في الكاملين
> وبدا الجرسة
> من ام دقرسي بقى يتمنى السفرية تنتهي ويصل مدني
> في اب عشر لمح كوبري رفاعة افتكروا حنتوب
> في قرية الصداقة فقد المنطق
> لما وصل الحصاحيصا قايلها مدني
> وقعد متضايق لمن وصل مدني
> لو اتأخر دقيقة كان الخرم كتلو
> ده حالنا
> ننفخ الشوط الاول بدون حساب
> وفي الشوط التاني الخرم كتلنا
> بدل نموت متكيفين قربنا نموت متقريفين
> والله يجازي الكان السبب
> هو في سبب غير معسكر تركيا؟؟؟
> قرار صائب يقضي بوقف التصريحات الصحافية للإداريين والفنيين واللاعبين
> أراه صائباً حتى ولو كان القصد منه التعتيم على أسباب انحطاط مستوى اللياقة البدنية
> فالمرحلة مرحلة عمل فني و نفسي ونحن على منعرج خطير
> حتى الجماهير
> بعد ده دايرة شغل نفسي
> ولكن نسأل
> هل قرار منع الاعلاميين من مرافقة البعثات يسري على بعثتنا المتوجهة لنيجيريا يا مجلسنا الهمام؟؟؟
> وسمعنا استنكار الرجل لتأجير الحوش كموقف للشاحنات المعروضات بالأقساط
> إذن.. من أجر الحووووش ؟؟؟
> راجعين للموضوع
> بجبج موجود والنور مقطوع والزد واي في الحوش ؟
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> الليلة شفعنا ممتحنين لينا
> ربنا يوفقهم أجمعين يا والينا
> مافي شيء نورثهم ليهو عدمانين الملينا
> تركتنا الوحيدة ليهم علم في ريسينهم يأهلهم وينقذهم من حياة فرضها البعض علينا
> وبعدين في إعلامنا الشرعي لما نموت يا والينا
> حاينكتب إنو لا توجد تركة ظاهرة لدينا
> لكن التركة العظيمة والمستترة الما ظاهرة للناس يا والينا
> لما يكون مكتوب المرحوم والد الدكتور فلان وخبير الذرة فلتكان وأستاذ الجامعة سليمان الحائزون على جوازات كل الأوطان
سلك كهربا
نساك كيف والكلب قال والعظمة بي تمتعهم بجوازات كل الأوطان تمسكهم بجواز دولة السودان
والي لقاء
سلك