السبت، 29 أبريل 2017

board

عقرب ويتشقلب وغرفة ومخدرات

>  اليوم كان سبت بعد جمعة
>  الأمة جات مجتمعة
>  الأمة الماقدرت تدخل الإستاد تلاتة أضعاف الأمة المحظوظة الدخلت الإستاد


>  القلعة الحمراء امتلأت عن آخرها
>  حتى المقصورة (حدث ولا حرج) اتملت
>  الحمامات اتملت
>  الممرات اتملت
>  بس للأسف ماعندنا غرفة مخدرات
>  كان عندنا ما كان اتملت
>  لأنو شقلبة العقرب بتعدل المزاج
>  معقولة
>  العقرب بعد القون يتشقلب
>  ما قلنا شيء
>  كمان جابت ليها شقلبة قبل القون؟
>  دي مغارز منك ياعقرب
>  الناس دي مابتتحمل
>  أول أمس وأنت متشقلب طاير
>  ناس قاعدين في بيوتهم طاروا من السراير ركوا في الستائر
>  والكسكتة طارت و رجعت للصلعة براها
>  كفاية مغارز يا عقرب
>  من ناحية تتشقلب حاتتشقلب
>  لكن اتشقلب بأدب ما مغرزة
>  المريخ كان بخوف
>  الشفت محمد ود العمدة جاب ولدو معاهو
>  الولد شدة ماخاف مكنكش في ابوهو لي اسي
>  قال ليهو انا (هايف)
>  المريخ بخوف يا ولدي
> المريخ بخلي المجنون يهبش والعاقل يطقع واب كسكتة يصنقع
>  المريخ شدة ما بخوف خلي الناس تعمل غرفة مخدرات
>  يا لهووووي
>  يا مكافحة
>  ايها الناس
>  الصفوة كانت في الميعاد عشان كده الأحمر الوهاج قدل
>  شفوت لو قابلوا جيوش الروم وجحافل الفرس لانتصروا
>  والراجل الحمش فوق الجمر بمش
>  فوق الجميع بمش
>  و تغيرت مقولة الشفوت من لن ندعك تسير وحدك يا مريخ
>  الي مقولة سنسير أمامك نكسح الأوهام والألغام كي تتقدم في ثقة و ترفع التمام
>  تماااااام سعادتك
>  كل القوة القلعة جوة
>  درس تلاميذه كثر في المقدمة
>  فطومة أختي
>  أحفظي يا فطومة جدول الضرب
>  وماتقولي (أيبعه) قولي أربعة ماتعطشي الراء
>  واحفظي لا مستحيل في عالم المريخ
>  وفي العلوم ركزي على العقرب
>  العقرب ام ضنب ودقن وشنب
>  العقرب البعد القون تتشقلب وقبل القون بقت تتشقلب
>  التلميذ التاني روشا
>  الحصة عربي يا روشا
>  صا صفر
>  قول وراي ماتخجل
>  صا صفر
>  أيوه شاطر
>  عا عقرب
>  بتخاف من شنو؟
>  مابتعضيك
>  بس بتتشقلب
>  قول وراي
>  جا جلاها
>  شاطر يا روشا
>  جلاها يعني شنو؟
>  جلاها زي الدمازين أمس
>  وقعت ليك ولا أكلم ليك بويا يصرجها ليك؟
>  كفاية الصرجها وربك مرقها؟
>  طيب آخر شيء
>  قول تا تكت
>  دي مابتقدر تقولها ؟
>  صعبة بيني وبينك
>  لأنو في واحد زعلان بتكلم مع حاسد
>  الزعلان الجن والدغ وبتكلم بالثاء وبهضرب ساي
>  الحاسد قال ليهو الجاب الرابع منو ؟
>  الالدغ لما نطق التكت رش الواطة كلها
>  الحاسد قال ليهو الحمد لله ما بقيت بتتمتم كان فقدت سوائل
>  قول التكت يا روشا عشان تفقد سوائل
>  أما التلميذ التالت فهو تلميذ نجيب ومهذب وهادئ جداً لكنة يشاغب تحت تحت
>  محمد عبد الماجد قوم حيلك
>  شيل الطبشيرة دي وأكتب على السبورة ألف مرة
>  ريمونتادا
>  ماتبكي
>  أكتب وبس
>  الطالب الرابع
>  ده طالب اتحاد معلمين
>  بابكر مختار قوم فوق
>  جاوب السؤال التالي
>  مع تطور العلم هل توصل العلم لكديسة بتتكلم سبعه لغات وسحلية بتشتغل بالرموت وضب شغال ديجيتال وعقرب بتطير
>  أجب بلا او نعم
>  إن كانت الإجابة بنعم ماهي التركيبة الجينية للعقرب المذكورة أعلاه
>  وإن كانت الإجابة بلا الشفتو يوم السبت ده نسميهو شنو عاد
>  انتهي الدرس
>  الطلبة كلهم جابوا صفر
>  أصفار ساااااكت
>  عيدوا كعادتكم والمرة التسعين ركزوا كويس عشان وزارة التربية زهجت من أصفاركم دي ووزارة المالية قالت لوزارة التربية أديني أصفارك ديل أزيد بيهم الرصيد
>  محاسن
>  كان عملتي شامة وكان ختيتي نقطة بقروها صفر
>  انتي ناقصة
>  المهم
>  خالتي قالت لي بتها جلي لي الحلل ديل
>  بت خالتنا ساعتين تحكحك في الحلل بقن يرقشن
>  خالتنا قالت ليها ده جلييك مع الناس ؟
>  ساعتين تجلي وتطلعيهم مغبشات
>  البت زعلت وقالت يمة أسي جليي ده مالو
>  خالتنا قالت ليها ما شفتي الدمازين بلجيها كيف
>  في لحظة جلاها وخلاها ترقش ومكسيم يفتش
>  قامت البت بي زعلها داك رفعت الحلل في الرف بدون تركيز
>  ختتن في ركن الرف قربن يقعن
>  خالتنا قالت ليها يا بت جنيتي
>  بويا انتي
>  تصرجي الحلل في تمنيات الرف
>  معقولة
>  فريق يجلي ويصرج والعارضة تمرق هدف مؤكد ويتأهل ؟
>  علي الطلاق هلالابي بحضر في خرمجة الهلال الامس دي
>  شاف ناس بورت لويس يدوها لي ناس الهلال
>  ناس الهلال يدوها لي ناس بورت
>  قال دي كورة قدم ولا تنس
>  المهم انو الجماعة اتأهلوا مستفيدين من اخطاء التحكيم المعتادة في هدفين اوف وهدف الاستعانة قبله باليد كانت واضحة وضربة جزاء مسكوت عنها ارتكبها بويا
>  يخطئ ولا يظلم
>  وكفارة لخسارة مجدي للكرسي
>  ايها الناس
>  إن تنصروا الله ينصركم
>  آها
>  نجي لي شمارات والي الخرتوم
>  كان شفت يا والينا
>  الفلس سواها فينا
>  رجعونا لي زمن المقايضة يا والينا
>  عشان نقايض شافع بي دقيق فينا
>  نضمن عيشة أخوانو بدل كلهم يصبحوا فاقد لينا
سلك كهربا
ننساك كيف والكلب قال الخوف تدوهم الشافع مقايضة يدوكم دقيق فينا صيني..  ده لو أدوكم وما شالوا الشافع ومشوروكم
والي لقاء
سلك