الجمعة، 18 آب/أغسطس 2017

board

أشهر تجليات التاريخ

>  عدنا بعد الراحة التي منحها المعلم.
>  عدنا للتنافس المحلي ولكن هذه المرة على كأس السودان.
>  عدنا اكثر استقراراً ومحبة وثقة.

>  معنوياتنا في السماء بفضل الله، برغم شكوى الريفرز للمريخ في قانونية مشاركة بكري المدينة.
>  وللحقيقة اخاف من قبول الشكوى.
>  وبالتالي اعلان اقصاء المريخ عن المجموعات.
>  لأن شكوى ريفرز قوية.
>  صاغها محام فرنسي ضليع.
>  وارتكز فيها على حقيقة لا اظن ان المريخ يستطيع مقارعتها.
>  ارتكزت شكوى ريفرز للمريخ حول عدم قانونية مشاركة بكري المدينة.
>  وكانت الأسباب تقوم على عدم صحة تسجيل المدينة في كشف المريخ ابتداءً (دي غلطة مجلسنا في الزمن داك ).
>  وعللوا ذلك بأن الشرط الاول للتسجيل سواء للوطنيين او الاجانب هو بني آدمية اللاعب.
>  وان بكري المدينة ثبت انه ما بني آدم.
>  فهذه القدرات تفوق قدرات اولاد آدم جميعاً.
>  دي ما قدرات بشر طبيعي.
>  وليست بقدرات سكان الارض.
>  الزول ده مخلوق من كوكب تاني.
>  مخلوقات ومخاليق الكواكب التانية الفيفا لا تقر بمشاركتهم في نشاط كرة القدم في العالم.
>  عشان كده يبقى تسجيله ما صحيح.
>  اضف الى ذلك انه يهدد المدافعين بالموت المفاجئ نتيجة الهبوط الحاد او قطع النفس في حالة محاولة المدافع سك بكري المدينة.
>  عشان كده الناس ديل بكسبوا شكوتهم ويطيرونا من المجموعات.
>  المهم.
>  في المجموعات قد تقدم ضدنا شكاوى عديدة.
>  السماني ده ذاتو ما ظنيتو من الارض دي.
>  الارض تجيب زي ناس بويا تجيب زي ناس الطاهر الحاج وزي ناس شعفوف ولا اسمو منو الاحتياطي القدام داك، وتجيب ناس حالتهم شلش ساي.
>  لكن زي السماني ده بكون من كوكب تاني.
>  السماني عليك الله.
>  من كوكب تاني عليك الله.
>  ايها الناس.
>  غداً الأحد اشبالنا يقابلون اولاد الجماعة.
>  كي تكتمل المتعة وتنعدل الصورة حضورنا كلنا في غاية الاهمية.
>  تعالوا شوفوا الفرق الحقيقي بين الاتنين.
>  تعالوا لتطمئنوا على مريخ باكر.
>  الجماعة دايرنها تتأجل.
>  ونحنا دايرين الاحد يجي سريع ويستعجل.
>  لازم يعرفوا حاجة.
>  وكلنا حضورا مبكرا.
>  المهم.
>  يحفظ التاريخ تجليات لا ينساها اطلاقاً.
>  من اشهرها تجلي القمر في ليلة (١٥) عربي.
>  وتجلية عمار الدمازين بموريسشيوص.
>  فعندما يتجلى القمر لا ينافسه الا الدمازين لما يجلي.
>  وتصريج بويا لا ينافس تجلية الدمازين ولو صرجت ودخلت غرفة المخدرات.
>  المهم.
>  الأهلي والزمالك اتفقوا ولا لسه مختلفين؟
>  الفراعنة ديل في الاربعطاشر فريق الدخلن المجموعات ما ضامنين حمام غيركم يا فطومة يا اختي.
>  ولا سانت جورج ما حمام زيكم.
>  حقو الكاف يفتح البرج عشان الحمام يطير وتقعد الاتيام.
>  ووقتها حا يختلف الاهلي مع الزمالك برضو.
>  الاتنين حا يقولوا ما دايرين المريخ في مجموعتنا.
>  حا يقول الاهلي المريخ؟ المدينة؟ طب ليه؟ انا عملت ايه؟ انا أخاف من نمل يطلعلي عقرب؟ يا خراشي
>  اما الزمالك لو وقع مع المريخ في مجموعتو حا يقول
>  ايه ده؟ مين العمل القرعة ديت؟ مستأصدني يعني ولا مستأصدني؟ العقرب؟ كان مستخبيلنا فين ده كلو؟ أأول لكم حاجة؟ حلايب سودانية بس اعفوني من مجموعة فيها عقارب وكهارب؟ يا عمي ده انا غلبان.
>  ايها الناس
>  اليكم انجازات الفرق التي تأهلت لمجموعات الابطال بالكاف ونالت كأسات الكاف حسب لوح الشرف الإفريقي.
>  وهي على النحو التالي:
>  الاهلي القاهري (٨) ابطال (٤) كأس الكؤوس او الاتحاد الافريقي او الكونفدرالية.
>  الزمالك المصري (٥) ابطال وواحد كأس الكؤوس.
>  النجم الساحلي التونسي واحد ابطال وواحد كؤوس وواحد كونفدرالية.
>  صن داونز الجنوب افريقي واحد ابطال.
>  الترجي التونسي واحد ابطال اتنين كأس الكؤوس.
>  الوداد المغربي واحد ابطال واحد كأس الكؤوس.
>  المريخ السوداني واحد كأس الكؤوس.
> اتحاد العاصمة الجزائري صفر ابطال صفر كؤوس.
>  القطن الكاميروني صفر ابطال صفر كؤوس.
>  فيتا كلوب الكنغولي صفر ابطال صفر كؤوس.
>  اهلي طرابلس الليبي صفر ابطال صفر كؤوس.
>  سانت جورج الاثيوبي صفر ابطال صفر كؤوس.
>  زناكوا وكابس يونايتد وفيروفيارو التلاتة صفر ابطال صفر كؤوس.
>  الهلال السوداني صفر ساااااي يا زول.
>  صفافيرك تعبر عن حمامك وطيرك.
>  الهلال السوداني صفر ابطال صفر كؤوس صفر اتحاد صفر كونفدرالية صفر سيكافا.
>  صفر يا زول.
>  الهلال محل ما تهبش يصفر.
>   تسعين سنة بصفر.
>  عربية مطافئ يا كافي البلا؟
>  ده تاريخ وانجاز الفرق المتأهلة لدور مجموعات ابطال الكاف.
>  لو شلنا الهلال بره ودخلنا بدلو ولد طايع او زينة من موريتانيا او دخلنا بدلو الزوبعة او القطن من تشاد او دخلنا بدلو بيت المال او الاحرار من السودان او شلناهو وما دخلنا بدلو زول فإن الحال لن يتغير.
>  يطلع صفر ويدخل صفر نفس الحال بالاصفر قيمة ما اسم، ولذا لو شلنا الهلال وما دخلنا بدلو فريق فإن مجموع الانجازات الافريقية للفرق، الدخلت دور مجموعات الابطال لن ينقص انجازاً على الاطلاق.
>  فاي قيمة لما تشيل منها صفر لا يضيرها شيء.
>  ومع ملاحظة ان عدد الانجازات الخاصة اليها فرق المجموعات كما موضح اعلاه عددها تمنية وعشرين انجازاً
>  شيل الهلال بره واجمع الانجازات تلقاها برضو تمنية وعشرين انجازاً.
>  لكن لو شلت المريخ مثلا
>  ستجد ان عدد الانجازات نقص الى سبعة وعشرين.
>  واذا سألت الترجي مثلاً يصبح عدد الانجازات خمسة وعشرين.
>  يمكن رياضياتنا ضعيفة.
>  شيل الهلال بره واجمع الانجازات التمنية وعشرين يا روشا شوفها كم؟
>  يمكن بي حساباتكم بتنقص.
>  انا غايتو خايف باخراج الهلال التسعة وعشرين انجازاً يزيدن.
>  فطومة خليكم مع المظلة تظلكم من هجير صفركم ده.
>  لكن انجاز افريقي ده شعراً ما عندكم ليهو رقبة.
>  ايها الناس.
>  ان تنصروا الله ينصركم.
>  اها.
>  نجي لي شمارات والي الخرتوم.
>  والينا
>  ليه يعني للباعوض مخلينا؟
>  غلبك ولا فترت ولا محافظنا ما شغال بينا؟
>  شارع العرضة يا والينا.
>  المجري الموازي للبيوت وطالي علينا.
>  طول السنة مليان موية لي هنا.
>  والباعوض يخطب ويعرس ويلد ويزغرد فينا.
سلك كهربا
ننساك كيف والكلب قال بلد ده الباعوض بطلع رقم وطني.
وإلى لقاء.
سلك