الخميس، 24 آب/أغسطس 2017

board

ياي بدون مساعد ببرد

>  العربية فيها يايات
>  عشان تخفف كتير علي الركاب
>  و عشان تمتص الوقعات في الحفر الكتيرة البتقابلها علي قارعة الطريق

>  والياي مهما كان قوي ببرد اذا اشتغل بدون مساعد
>  واذا برد الياي بشق البودي
>  وتبقي العربية زي الرق تكشكش كلها
>  واذا العربية كشكشت الناس بضحكوا علي البركبها
>  خصوصا وانو ثقافة الناس اتجهت نحو العربية النضيفه المحافظه بصرف النظر عن النوع او تاريخ الصناعة
>  وفي فلهمة جديدة كمان
>  في عربات ما اكتفت بالياي و مساعد الياي بس
>  جابت ليها مساعد مساعد كمان
>  وزيادة خير مساعد المساعد
>  لكن لو مساعد المساعد مابتولف
>  واذا ربطتو بضايق المساعد في القاعدة
>  يبقي حايمرق ليك المساعد الاساسي بره اللعب
>  ويشتغل الياي بدون مساعد
>  و مساعد المساعد ما بقدر يقوم بي شغل مساعد الياي
>  يقوم الياي يبرد والبودي يتشقق والكركبة تبدأ
>  وشق الشاسيه بعيب العربية >  وممكن تبقي (توتال لوست)
>  ايها الناس
>  الياي بحتاج لمساعد
>  و مساعد المساعد اذا بعاكس المساعد في الرباط علي القاعده
>  حقو مانبوظ الياي ولانفقد مساعد الياي ولانهدر جهود مساعد المساعد
>  مساعد المساعد ممكن يربط في عربية تانية قاعدت الرباط فيها واسعه وبتتحملو
>  وفي الحاله دي بجيب تمن غالي
>  لانو مساعد المساعد مرغوب في موديلات اخري كثيرة
>  لكن اللتيق بفقدنا الياي والمساعد و مساعد المساعد
>  ايها الناس
>  هل صحيح ان غرزه اشتغل تمرين الاحماء بكنانة بالتلفون مع انطونيو ???
>  لو بقي الكلام ده صحيح
>  يبقي جنينا وقولنا عييييييك
>  دي حالة اخير منها العرس
>  نريس ونتيس علي كيفنا
>  والعندو الحنة بتحنن وكت داير
>  والماعندو الحنه بحنن
>  بحنن اي زول
>  كان اديتو قرش بحننك
>  وحنانه نسي اهلو ما نسانا
>  المهم
>  كورة امس كانت جميلة لانو كان فيها ندية
>  ومستوي مريخ كوستي طمأننا علي بقاء الرهيب ضمن اندية الممتاز
>  واذا مريخاب كوستي وقفوا حول فريقهم وقفة رجل واحد
>  صدقوني الموسم المقبل الرهيب حايكون ممثل كوستي الوحيد في الممتاز
>  والسنة البعدها حايكون واحد من الفرق التي تمثل السودان في التنافس الافريقي
>  شدوا الهمة يا مريخاب كوستي
>  ايها الناس
>  هل سيلحق انطونيو بالزعيم في كنانة ولا خليها تتكسر وتتكشكش ونحنا زاتنا نكشكش !
>  ايها الناس
>  دائما نقتل استقرارنا بايدينا
>  ثم نكرر العبارة التي تقتل كل مجهوداتنا ونجاحاتنا
>  الموضوع ده مافي داعي للكلام فيهو حفاظا علي الاستقرار !
>  وبعد داك ننساهو ومانتكلم فيهو برضك حفاظا علي استقرار هو اساسا غير موجود في الواقع
>  ايها الناس
>  الجهاز الفني يحتاج لمراجعة وقوة وفهم في اصدار القرارات المتعلقة به
>  ولما الزول يجيب بنا حقو يخلي المعلم يختار الطلب البشتغل معاهم
>  والجهاز الاداري الرياضي (القطاع ) يحتاج لمراجعة
>  فمن يظن ان المدرب باع كورة مازيمبي مثلا لا يكون هو الملائم للعمل مع نفس المدرب الذي اتهمه بالبيع
>  ومراجعة وظائف اخري مهم جدا
>  حتي ولو كانت ضرورية هل من يشغلها هو الانسب ام هو الانسب للنقل ارضاءا للمنقول لهم ?
>  مع العلم بان المنقول عنهم مامنقوليين
>  ناقشين و عارفين وكارهين المنقول اليه والناقل الوطني زاتو
>  والاهم من ده كلو كرامة جبرة يجب ان لا نستهتر بها اكثر مما حدث
>  جبرة ماحاير بيهو الدليل
>  ورزقو مامقفول علي راتب المريخ
> المهم
>  الكورة كانت جميلة
>  ومحمد عبد الرحمن قد عين السحر والساحر والحاقد والشيطان
>  والسماني كان نفسه السماني النغمة علي الشفاه
>  ولكن نجم المباراة كان باسكال السوداني
>  الزول ده سوداني لي بهناك
>  من دقنو دي سوداني
>  عينو دي عين سودانيين
>  ياخ من مشيتو دي سوداني
>  مشيتو زي مشية خالد عز الدين
>  ودقنو تشبه لي دقن عائس
>  ولونو قريب لي لون روشا
>  وعيونو بس عينين فطومة اختي
>  وكان خت الكسكتة بياخد منك حته
>   بشبهك يا انت
>  وبعد ده تقول لي ماسوداني؟
>  ياخ باسكال ده زي برج الاتصالات
>  الجنس سوداني
>  الاداء زين
>  الصوت كنار
>  الوصف M T N
>  الM مبالغه
>  الT تموتوا بس
>  الN نجم
>  ايها الناس
>  في ناس مخلوقين يمتحنوا بيهم الناس
>  وفي ناس مخلوقين يمحنوا بيهم الناس
>  وقبل كل شئ الانس والجن اتخلقوا ليعبدوا الله
>  لكن ظهرت مخلوقات اخري
>  لاهي جن ولا هي انس
>  مخلوقات اتخلقت لتحسد المريخ اكثر مما تشجع الهلال
>  والمخلوقات دي بتظهر بشدة في اوقات محدده
>  يعني لما جبنا مانديلا ظهرت بشدة
>  لما غلبنا الريفرز كانت دايرة تموت
>  اسلام قالت لي اقتلوهم يا بابا قبل ان يتكاثروا
>  قلت ليها مابنتسمي بيهم يا بتي
>  بكتلهم الله الخلقهم ده
>  لكن احتمال يكتلهم حسدهم قبل اجلهم
>  قالت لي ديل خطرين يا بابا
>  الشيطان لو قلت ليهو بسم الله بطفش
>  ديل البطفشهم مننا شنو ؟
>  قلت ليها يابتي لكل داء دواء
>  زي ديل اول مماتشوفيهم قولي صفر
>  بطفشوا طوالي
>  قولة صفر دي بتحرقهم في فشافيشهم
>  واتصفري
>  ايها الناس
>  اكتب قبل لقاء المدعوم
>  لو وقف   الدعم المتعه حاتحصل
>  اللهم لاتوفق من يحاول ان يدعم المدعوم بدعم يسرق عرق الناس
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  والينا
>  تفتكر لو عملوا مسابقة لاوسخ عاصمة في العالم وبي باعوضها وجقورها وضبابينها
>  دحين الذهبية ماحقتنا يا والينا ؟
سلك كهربا
ننساك كيف والكلب قال وسخ زي ده اصلو ما معقول ديل شوارع الناس ولاجوه الخور !
والي لقاء
سلك