الأربعاء، 20 أيلول/سبتمبر 2017

board

تحية للعرب

>  من تابع مباراة العرب والزبون يقطع بالشك أن الزبون لا يستحق الفوز
>  وقطع شك المستقبل أمام العرب مشرق لان اولادهم صغار جدجد

>  مازي صغرة وليد علاء الدين الذي اكمل سن الصغرة عندنا قبل ما يمشي كادقلي ويلعب هناك ويعود للزبون الذي يتحدث عنه لليوم ويطلق عليه الشبل وليد
>  ولكن لا غرابة فسوق ود نوباوي عمرو مية سنة ولي الليلة اسمو السوق الوليد
>  لذا اسمحوا لي أن أطلق عليه وليد الجديد
>  المهم
>  كل إعلام الهلال زعلان من حي العرب عشان لعبوا ضدهم ضاغط
>  لان السوكرتا صاحب شخصية ولم يكن يوماً تابع ولن يكون في يوم تابعاً وحليفاً ويلعب لصالح الغير
>  وحي العرب صاحب الشخصية القوية والاداء الجميل و القوي يعرف اسرار الحرب التحت تحت عليه كي يسقط من الممتاز
>  فالجماعة يتعاملون مع الأندية صاحبة الشخصية بمفهوم اقتلوهم قبل أن يتكاثروا
>  اين مريخ الابيض الذي كان بعبعاً بالممتاز ضوق ايدو للزبون واجاويدو
>  اين مريخ بورتسودان الذي كان بالممتاز عادي جداً بكسب مباريات الزبون بأم درمان
>  قتلوهما قبل أن يتكاثرا
>  وبالأمس كان التصميم على قتل السوكرتا
>  حي العرب الذي ابتعد خمس سنوات عن الممتاز بالتأكيد لا يريد أن يبتعد من جديد
>  لذا من حقو أن يلعب ضاغط مع اي خصم لصالح ورقو
>  أما الحديث عن العنف القاطعنوا من راسكم ده يا محمد عبد الماجد
>  لو كان موجود ما كان الحكم قصر في طرد من يلعب بعنف
>  وأهو طرد لاعب العرب في أول مخالفة وترك ناس الصيني البعفصوا من كسلا لمن وصلوا بورتسودان
>  ولكن هناك سؤال يا حماده
>  كان وين استنكارك للعنف يوم كسرتوا أولاد أهلي عطبرة حتة حتة دون أن يستخدم الحكم بطاقاته في مواجهتكم ؟
>  كنتوا وين وراية هلالية تنقض هدفاً صحيحاً لأهلي عطبرة اعترف به الكومي وعمل الحي ووب. لمن ناس الكنبة قالوا ليهو ماعدوها ماعدوها
>  الضرب الذي تعرض له الارتريين بتاعين أهلي عطبرة أيام الحرب مع اثيوبيا ماشافوهوا
>  تقول لي لعب بي عنف
>  ايها الناس
>  من أسباب عدم تطور الكرة السودانية هو تصفية الفرق صاحبة الشخصية وقتلها كي لا تتكاثر
>  وحي العرب لا يعرف الخوف ولا التبعية
>  اتوقع أن يصبح العرب (حميدتي) الفرق بالممتاز و يقضي على من يريد أن يقضي على الفرق صاحبة الشخصية والاحترام والرافضة للتبعية
>  ايها الناس
>  للأسف في ناس في الوسط الرياضي لسه بتعاملوا بفكر طائفي إقطاعي يؤخر كثيراً
>  ايها الناس
>  تحية للسوكرتا إدارة ولاعبين وجهاز فني ومشجعين يملوا العين
>  و تضامن الشرفاء مع السوكرتا فرض عين
>  والتعاون مع السوكرتا شرف
>  فنحن نعير أولادنا لكثير من الفرق التي تفتقد للشخصية وتنصاع تحت تحت للتبعية
>  حقو نراجع الحتة دي
> المهم
>  بعانخي اليومين دي ما شاء الله
>  نفسيات في السما
>  الغريبة الزول ده سوداني ونفسياتو في السما
>  ودي شريحة نادرة من السودانيين
>  لأنو كونو إنو يعني ماعندنا حاجة بتمشي السما في البلد دي غير الأسعار والروح
>  وبعانخي أمس بعد التمرين مسك اللاعبين عشان يعلمهم الرقصة الجاية
>  المرة دي اختارها دلوكة وعرضة
>  أحسن زول بعرض
>  ما يعرض كيفن وهو سوداني ابن سوداني جدو سوداني
>  وزمان كان برسلوهو العصر لي ست لقيمات جمب البركل
>  لقيماتها سمحة شديد وكبار
>  الوكت داك عجلات مافي،
>  كان بركب ليهو ديناصور من ديناصورات تهراقا ويكسح
>  تهراقا ما بسألو
>  يسأل ليهو سوداني ؟
>  والله ياهو الفضل
>  المهم
>  الرقصة البعد الجاية مردوم
>  كدارة ما أصلية بتتفرطق حتة حتة
>  من ناحية سوداني مافي شك
>  وكلام ناس خالدونا ده زي كلام المصريين عن حلايب
>  مشاهد مفبركة وصور فوتوشوب
>  وبعانخي مبسووووط،
>  المهم
>  قالوا البايرن اشتكى في رونالدو وفوض المريخ لمتابعة الشكوى
>  يكون يا ربي ناس البايرن ديل برضو قالوا رونالدو ما سوداني ؟
>  المهم
>  شرطة القضارف لا تتبع إلا للشرطة الموحدة
>  والقضارف ما محتاجة مستشفى ولاده 
>  عشان كده الناس تشوف محل ولادتها وين
>  وكان دايرين نصيحتي أرحكم القضارف
>  صدقوني بنجي نغني من القضارف للخرطوم
>  ايها الناس
>  اين مؤتمر عمر النقي الصحافي لتمليك الحقائق ؟
>  حتو يا نقي والشمار فتو قبال فطومة تنط ليك وتقول قتتتو وأنا ستوووو
>  ايها الناس
>  سألني أحدهم
>  مع منو في انتخابات الاتحاد العام
>  قلت ليهو لا خيار بين الفول والعدس
>  ولو لخبطهم أنعم ببوش يا صديقي
>  ايها الناس
>  إن تنصروا الله ينصركم
>  آها
>  نجي لي شمارات والي الخرتوم
>  كان شفت يا والينا
>  مسؤول صغير لم فينا
>  وهاك يا خطب يا والينا
>  الكباري الاتعملت دي اتعملت في منو؟ أقصد لي منو ؟ مافيكم انتوا أقصد ما ليكم انتوا
>  ثورة المياه دي
>  كلو مواطن مسكناهو ماسورة
>  ما ليكم انتو
>  نحنا خلينا أكل الفول والكسرة والعدس ولحم الحمار وأقاشي الكلب
>  خليناهم لي منو ؟
>  ما ليكم انتو
سلك كهربا
ننساك كيف والكلب قال كان تقولوا ليهو أخلاقنا دي الجات في راس نخرتنا دي الجابا منو ؟ ماليكم انتوا
والي لقاء
سلك

الأعمدة

خالد كسلا

الثلاثاء، 19 أيلول/سبتمبر 2017

خالد كسلا

الإثنين، 18 أيلول/سبتمبر 2017

د. حسن التجاني

الإثنين، 18 أيلول/سبتمبر 2017

الصادق الرزيقي

الإثنين، 18 أيلول/سبتمبر 2017