الخميس، 14 كانون1/ديسمبر 2017

board

اب عشرين ما زاد ؟

>  نصر كبير اضاعه فريق الشرطة القضارف بسبب محمد الطيب واب عشرين
>  فمحمد الطيب لم يستغل النقص العددي للهلال الذي اذا لعب كاملاً يكون ناقصاً للضعف البين الذي يعاني منه فريق اب كسكتة
>  لم يضبط ايقاع اللعب وهو يتقدم تلاتة مرات

>  اداها زي لعب الحلة بدون استراتيجية فافقد شرطة القضارف نقطتين ما كان لها ان تفقدها ضد خصم ضعيف
>  لكن اب عشرين حيرنا
>  كلو شيء زاد الا اب عشرين
>  كلما نقول تطور وزاد وبقى ابو اربعين
>  تجي كورة ضد الهلال ويتواضع ويبقى اب عشرين برغم الزيادات اليومية
>  الكلام ده من زمن النسور والامير
>  ولعل هذا الامر هو ما جعلني استنكر تسجيلة في كشوفات المريخ
>  معقولة يا اب عشرين كورة تنعكس من الجناح اليمين تصل لي اوكرا في الشمال ويشوتها اوكرا تقلش تدق في واطات الله دي وبعد كدة تدخل قون يا اب عشرين ؟؟؟
>  ايها الناس
>  لتواضع مستوى اب عشرين دائماً في المباريات التي يكون خصمه فيها الهلال فاني اجدد دعوتي للاستفادة من خانة هذا اللاعب وربنا يسهل عليهو بعيد مننا
>  سر ضعف وتواضع اب ستة ضد الهلال بعرفو براهو
>  قد يكون خوف
>  قد يكون رجفة
>  وقد يكون شيء تاني غير ديل
>  ولكن لايلزمنا هذا الحارس
 >  و التحية لاهل القضارف اصحاب الطموح والانف العالية فوق
>  ايها الناس
>  ما اتى به تيتيه هل هو من ادب الهلال برضك يا روشا ؟
 >  ومقدم الاستوديو يحاول ان يجد العذر لتيتيه تبريراً للتصرف الشين الذي أتى به حتي كدنا نعتقد اننا نشاهد المباراة على شاشة قناة الهلال
>  نلفت نظر القائمين على هذه القناة
>  يا شغل بحيادية يا قفلوها
 >  المهم
>  نحن في المريخ امة وأسرة
>  وما حدث عرضاً يوم تكريم محمد الياس لم نتركه يعدي ساي
>  عالجنا المسألة
>  ولا نقبل من اصحاب الاجندة المتاجرة بالموقف
>  مع شكرنا الكبير لكل الاطراف التي قبلت الرأي الآخر بكل احترام والتزام
 >  المهم
>  امس اسلام بتسمع في الكورة
>  سمعت محمد موسى بلعب لي الوك اكيج
>  تاتي سمعت شيبوب لي اوكرا
>  اب عشرين بمرر
>  جابسون بحاول وبقع في الارض
>  حسين محمد (طرف الشرطة اليمين هو لاعب اشبال المريخ السابق ) حسين يفوت من واحد واتنين وتلاتة
>  قالت لي يا بابا تمرين المريخ متلفز ولا شنو !!؟
>  ايها الناس
>  شرطة القضارف تخسر بالتعادل الامس ده
>  لكن التعويض بالخرطوم وارد جداً
 >  ايها الناس
>  اذا في مريخاب في قائمة الفريق المدهش الذي ادهشنا بحضوره لتتويج الهلال نهاية الموسم الماضي برغم موقف المريخ الواضح
>  المريخاب الفي القائمة ديل بنافسوا في الانتخابات مريخاب اختارهم الكيان وكلفهم بخوض الانتخابات
>  هل نطلق على الطرفين مريخاب ؟
>  اعتقد انو الحتة دي مفترق طرق و جهاز دهب بكشف لينا مين هم الدهب ومين هم الضهب
>  ايها الناس
>  لم نجد سبباً يلغي هدف الشرطة التالت
>  قدر مافتشنا لي سبب لم نجد
>  قمنا سألنا عمك قوقل
>  قال لينا السبب الحكم خجل للجماعة
>  لأنو لو حسبو عمك حسبو كان شتت قصبو
>  نقطة هدية من التحكيم الذي نقض هدفاً الكمبيوتر قال انو هدف صحيح
>  ولكني احترم احد الذين ينتمون للفريق المتعصب حينما ذكر في مأتم قريب ده ان علاقته بالمريخ قد انقطعت
>  واحترمه اكتر اذا اعلن ذلك في الاعلام
>  ولو مشغول مع الفريق سأعلن عنه انا
>  عشان امة المريخ تعرف انو الزول ده اتجنس وبقى ما مننا
>  علي الرغم من قناعتي بان العمل الجليل الوحيد الذي قدمه هذا الرجل للمريخ هو قراره بالانسلاخ من المريخ
>  ولكني سأعود لقصص كتيرة و مثيرة
>  يجب أن تعرف الأمة كل الحاصل
>  وصدق الريس حينما قال له لن اكرر اخطائي بالمريخ وادعك تستمر
>  والقصص كتيرة
>  وحجيتكم مابجيتكم هو عنوان لسلسلة تلك القصص
>  ايها الناس
>  إن تنصروا الله ينصركم
>  اها
>  نجي لي شمارات والي الخرتوم
>  كان شفت يا والينا
>  حتي التزاماتنا الاجتماعية مابنقدر عليها بقينا
>  العربية مابنقدر على بنزينا
>  وبالمواصلات بنشلونا وتبقى فينا
>  والناس ذاتها خجلت من تمشي تدلدل ايدينا
>  في بكا كده واحد ما قدر يمشي يا والينا
>  قال ماعزموني
>  وعندنا اخوا لينا
>  مرضان يا والينا
>  قالوا نمشي ليهو الراجل مننا ولينا
>  دخلت يدي في جيبي يا والينا
>  لقيت ستة جنيه الفاضلة لينا
>  قلت ليهم ما ماشي
>  قالوا ليه يا اخينا
>  قلت ليهم نحنا ماناس عمرة ناس حج عدييييل يا والينا
سلك كهربا
ننساك كيف والكلب قال قبل كده جيراننا فرشوا قلنا ما سمعنا… .الزول بعيبو جيبو
والي لقاء
سلك

الأعمدة

د. عارف الركابي

الخميس، 14 كانون1/ديسمبر 2017

خالد كسلا

الخميس، 14 كانون1/ديسمبر 2017

بابكر سلك

الخميس، 14 كانون1/ديسمبر 2017

عبدالمحمود الكرنكي

الخميس، 14 كانون1/ديسمبر 2017

محمد عبدالماجد

الخميس، 14 كانون1/ديسمبر 2017

الصادق الرزيقي

الخميس، 14 كانون1/ديسمبر 2017

كمال عوض

الخميس، 14 كانون1/ديسمبر 2017

خالد كسلا

الأربعاء، 13 كانون1/ديسمبر 2017

د. حسن التجاني

الأربعاء، 13 كانون1/ديسمبر 2017

بابكر سلك

الأربعاء، 13 كانون1/ديسمبر 2017

كمال عوض

الأربعاء، 13 كانون1/ديسمبر 2017