الثلاثاء، 17 تشرين1/أكتوير 2017

board

اهل السلسلة وقضاء القوم و القدر

>  بالامس انتصر القضاء لاحباب الرسول اهل السلسلة
>  اهل نار القرآن المابتنطفي

>  لم يأت القضاء بجديد في قراره القاضي بشطب البلاغ في مواجهة الشيخ العارف بالله الذي يشهد له الناس بالتقوي والورع
>  فقرار القضاء كان عادلا لان القضاء عندنا لازال ينشد عدالة ويعمل بحيادية
>  ولكن القدر قاد القوم لمخافر الشرطة بناء علي معلومة تفيد بممارسة الشيخ العارف بالله للدجل والشعوذه والعياذ بالله
>  بعد المعلومة لاتروي ولا تأكد ولا خوف علي سمعة الناس ولا تقدير لمعتقداتهم
>  فكانت المداهمة وبدأت الاجراءات
>  ويا ليتنا بناء علي معلومة نقدم من اختلس مال الشعب للعدالة مصحوبين بالمستندات والاسانيد التي تخرب بيوتهم و بيوت العينوهم
>  ويا ليت المعلومة تفرغ لموضوعات تنفع المجتمع و تساهم في رفع المعاناة عن كاهل الجماهير
>  ويا ليتنا بناء علي معلومة نقضي علي تجمعات استلام المال المسروق العلنية والتي تختص ببيع مرايات العربات التي تخلع نهارا جهارا والطاسات والعفريته والاسبير المسروقات
>  فلماذا نبني امورنا غالبا علي معلومة لا تقدم ان صدقت ولا تأخر ان كذبت
>  ايها الناس
>  كثير من القوانين تحتاج لمراجعة
>  وكثير من المواد يحتاج لتعديل او شرح او اضافة
>  فمن يمارس الدجل والشعوذة عبارة لاتعرف ماهو الدجل والشعوذة
>  الامر الذي يفتح الباب علي مصرعيه ويوسع من دائرة اتهام الابرياء امام مثل هذه المادة
>  علي كل انتصر القضاء السوداني لاحباب الرسول وهزم القدر السوداني برضو
>  وصاغ مولانا طلال حيثيات تدرس عند مناقشة عناصر المادة
>  وطرحت المحكمة سؤالين
>  يا ليت المختصون بصياغة القوانين يطلعوا علي السؤالين
>  المهم
>  اداء بارد وفاتر وعقيم ادينا به مباراة الامس
>  ولا ادري هل السبب هو الارهاق من التمارين المتواصلة والضاغطة
>  ام طنقعة من اولادنا ؟
>  وعلي فكرة ده لعب الخمسين ما لعب ملايين
>  وهل غرزه قنعان من الدوري ولا البحصل ده شنو ؟
>  اداء ببرود واستهتار ثم استعجال في الخواتيم يجعل كل الهجمات عشوائيه
>  حقا يا غرزه الكمال لله
>  وهذا الاستهتار جعلنا غير راضين عنكم جميعا
>  وماعافيين ليكم
>  فوادي نيالا الذي هزمناه بشق الانفس نتيجة الاستهتار
>  انهزم بالامس بالتنمية من الخرطوم الوطني الجاد
>  يتعثر الهلال فتتعثرون كأن ذلك التعثر لا يعنيكم  في شئ
>  حتي مباريات الارض اصبحنا نفقد نقاطها بسهولة امام كل من هب ودب
>  والله لاتستحقون هذه الهيلمانه ولا هذا الاهتمام ولا تلك التضحيات الجماهيرية
>  لا نريد مكنات بدون قلوب لابتحس ولابتشعر
>  محمد الرشيد لسة يلعب بطريقة ساقية جحا
>  يقلع منك الكورة ويديك ليها
>  واودجو
>  من اين اتي هذا ؟
>  اما محمد عبدالرحمن فأظن ان كردنة كان علي حق لما رفض يزاود عليهو
>  السماني من عاشر محمد عبد الرحمن اربعون مباراة صار مثله
>  شخصيا
>  ولا مافي داعي
>  لكن لن تغفر لكم الجماهير هذه السقطة
>  بدءا من الجهاز الفني وحتي مطر سواق عربة الاسعاف
>  كرهتونا بالدلع الكتير ده
>  ما واجعاني النتيجة
>  لكن واجعني البرود والشرود والطنقعة في الفارغة
>  ونحن كمريخاب لو كنا بنقبل مثل هذه الاوضاع كان بقينا هلالاب من زمان
>  لان الهلال عود اهله علي الانكسار كلما وضعوا املهم فيه
>  والآن انتم
>  كلما وضعنا فيكم امل وضعتم حسرة في قلوبنا
>  محاربكم
>  مخاصمكم
>  وماعافي ليكم
>  اما الجهاز الفني
>  نفس الرتابة في كورة الوادي تكررت
>  مافي شغل بين الكورتين يا خواجة ؟
>  يعني يا يلعب العقرب يا نقعد بالحالة دي؟
>  ماعافي ليكم
>  غرزه اخرج اودجو بعد سنة
>  الخواجة ده قايل الكورة ساعتين ولاشنو؟
>  غايتو ياغرزه احرجتني
>  يمضي الجميع ويبقي الكيان
>  واظن ان الخواجة قد بدأ في فقدان اراضية علي المدرجات
>  دي ترجمها ليهو يا ابي سفيان
>  الخواجه لازم يعرف الكلام ده
>  وقول ليهو لو دايرين العك ده مطفشين هاي مالنا؟
>  ايها الناس
>  ان تنصروا الله ينصركم
>  اها  نجي لي شمارات والي الخرتوم
>  والينا
>  حقو نسمع كلام ببكينا
>  الامة دي دايرة مراجعه لي قوانينا
>  ودايرة مراقبة عند تطبيق قوانينا
>  ودايرة احترام من القوانين للامة ومن الامة لي قوانينا
سلك كهربا
ننساك كيف والكلب قال انتوا قرقوش ده قايلنوا كان حاكم كورة؟
والي لقاء
سلك

الأعمدة