الثلاثاء، 27 حزيران/يونيو 2017

board

نغطي قدحنا ونفكر في التانية

>  ود العم برجع السيرة.
>  السيرة تمرق عصر بي زغاريدها ودلاليكا.
>  ولما تصل اهل العروس.

>  ود عمها يرجع السيرة ويقول قدحي وداير اغطيه.
>  ورجعت سيرة اهلي القاهرة وتبعتها سيرة زمالك مصر.
>  ود عمها اب شنب رجع سيرتين ودق صدرو.
>  هييييع.
>  غطاي القداحة وقضاي الغرض اب زرد.
>  ايها الناس.
>  لازم نعمل بجد ونضع هدفاً واضحاً نضحي من اجله.
>  واذا اهملنا الحكاية دي صدقوني سيرافق سانت جورج النجم الساحلي ونكتفي نحنا بنقاط القدح.
>  امامنا اطناشر نقطة مضمونات اذا قصدناهن.
>  ستة من سانت جورج وستة عند ابو القدح.
>  وتلاتتنا بتاعة النجم بالقلعة الحمراء مضمونة.
>  فقط نعمل بجد ونركز على الهدف بشدة.
>  يا ناس.
>  مجموعتنا فيها حمامتين.
>  يعني الصعود منها معروف لي منو ومنو.
>  واحد سوداني وواحد تونسي والاتنين مسجلين في لوح الشرف الافريقي.
>  فقد نالا هذا الشرف مسبقاً.
>  ناس مرقنبو قرنبو وكأس الكنغو وناس سانت جورج ليهم افريقياً فقط شرف المشاركة.
>  لكن لوح شرف نهي كرتا باجا روشا
>  أيها الناس.
>  مريخ حي الوادي ومريخ نيالا خوفنا.
>  ولكن أملنا كبير في صحة تحليلنا للأمر.
>  الخواجات ديل بستفيدوا من تجاربهم.
>  وقد يكون غرزة قد قصد الاستفادة من تجربة 2015م التي انهار فيها الفريق افريقيا في الخواتيم ومحلياً آخر الموسم.
>  فلم يصدق الناس ان الفريق الذي تألق ضد مازيمبي ووفاق سطيف واتحاد الجزائر واقصي الترجي ينهزم بثلاثية أمام اهلي مدني بالمناقل.
>  وقد يكون ذلك سببه قصر نفس اللاعب السوداني وقلة خيارات غارزيتو في ذلك الموسم، لذا اصر الخواجة على تأهيل أكبر عدد من اللاعبين هذا الموسم تداركاً لخطأ 2015م.
>  نأمل أن يكون هذا التحليل صائباً، ويكون هو ما قصده غرزة من اشراك اكبر عدد، واعطاء الاجانب اجازات قبل فترة الاعداد للمجموعات التي تطول قفلتها.
>  ايها الناس.
>  النجم الساحلي بنعرف ليهو.
>  وفيروفيارو ده كأس كنغو ساي.
>  وكأس الكنغو زبوننا.
>  عشان كده مفروض نقفل المجموع.
>  فيرو فيارو زي روشا وهلالو صفر بس.
>  المهم.
>  نغطي قدحنا حتى نفكر في التانية.
>  هي غطية قدحنا هينة.
>  خمسين في المية من تأهلنا للمرحلة المقبلة في غطية قدحنا دي.
>  فطومة لخي الحنة.
>  محاسن جيبي المحلبية.
>  وقولن جق.
>  عريسنا ورد البحر قطع جرايد النخل وجرايد المكتبات ذاتها.
>  المهم.
>  سؤال بسيط.
>  غياب أعضاء المجلس عن المقصورة في المباراتين الاخيرات سببو شنو؟
>  المهم.
>  إذا لم نأخذ القصة بجدية سيرافق سانت جورج من مجموعة اخرى النجم الساحلي من مجموعتنا ويصعدان.
>  اصلو مجموعتنا ما فيها زول بصعد غير النجم والمريخ اذا بقي جاد.
>  وحتى ولو انسحب النجم والمريخ من المنافسة لن يصعد فريق من المجموعة للمرحلة المقبلة.
>  بعد النجم والمريخ البفضلن كلهن فيرافيروهات ساكت.
>  عشان كده يا نبقى جادين يا نبقى مارقين.
>  أيها الناس.
>  بالأمس فاز اشبالنا على اولاد النيل بهدف.
>  اولاد محمد موسى وبدر الدين بخيت يقدمون مستويات رائعة وثابتة ويؤدون بقوة وفتوة وغيرة.
>  لا ينقصهم شيء سوى رؤياكم الغالية.
>  فشفوت المدرجات يهملون مساندة شفوت الغد.
>  لفت نظر صغير عله يقودنا جميعاً للمدرجات لنصرة الأشبال في المباراة القادمة.
>  على الأقل حتى يدرك الأشبال أنهم انتموا لأمة تحميهم ولا تدعهم يقاتلون لوحدهم.
>  الدعوة للجماهير ولكل التنظيمات الجماهيرية وجميع الاولتراسات برغم وجود البعض، الا ان تضافر جهود الكل احلى.
>  مبروك محمد موسى ومبروك بدر الدين بخيت ومبروك اولادنا.
>  ايها الناس.
>  إن تنصروا الله ينصركم.
>  أها.
>  نجي لي شمارات والي الخرتوم.
>  كان شفت يا والينا.
>  واحد بتاع بحر من عندينا.
>  راكب الحافلة البتدودر بينا.
>  في الصينية ضغطت عربية سايقاها واحدة سمينة وثمينة.
>  ووقعت الشمطة.
>  ما شايفني ولا ما شايفني ولا ما بتشوف.
>  وجات الشرطة.
>  انا داير الف يا جنابو.
>  انا ذاتي دايرة الف.
>  واحد سأل عن الحاصل.
>  واحد زهجان قال ليهو قوم لف يا أخينا.
>  صاحبنا بتاع البحر كحل كافتريا والبحر بجوع يا والينا.
>  انقطع وطلب ساندوتش.
>  السوري قال ليهو
>  بالعييييش ولا بالفطييييره؟
>  بتاع البحر قال ليهو بالفطيرة يا بلدينا.
>  السوري فرش الفطيرة وقعد يلف يا والينا.
>  وبتاع البحر يموت من الضحك.
سلك كهربا
ننساك كيف والكلب قال البلد كلها بتلف… ناس تلف وتدور وناس تلف الصينية وناس تلف الفطيرة وناس تلف المصلاية… لف شديد.
والى لقاء.
سلك