الأربعاء، 18 تشرين1/أكتوير 2017

board

فيش وتفييش

>  عدالة القضاء السوداني قررت قبول طعن الأرباب ضد الحبيب كردنة
>  هذا ما تناقلته مجالس المدينة بالأمس
>  ويعني هذا القرار فراق الطريفي لي جملو

>  ولكن في هذه الحالة الجمل زعلان أكتر من الطريفي
>  لان الجمل يعرف جيداً أن طين الطريفي البلاهو ده زول غيرو بتمو مافي
>  والوسط الرياضي والهلالي انقسما  ما بين فرحان للقرار وزعلان من القرار
>  ولكن نحن المريخاب زعلانين شديد
>  فكردنة الحبيب كان اكبر مورد للمواهب من الهلال للمريخ
>  ويشهد على ذلك آدم
>  آدم بتاع يا آدم جيب تمنية وعشرين داك
>  فعقرب من ذهب كانت هدية من كردنة لن ننساها له ما حيينا
>  حاولنا أن نجد طريقة تعيد كردنة للكرسي وللتصريحات التي أحببناها
>  فلم نجد لان القرار صادر من المحكمة العليا دائرة المراجعة وهي آخر مراحل التقاضي
>  تاني الشكية يا كردنة إلا لي أب إيداً قوية
>  يعني لو داير تشتكي الأرباب إلا لي رب العباد يا كردنة
>  إنه الفيش والتفييش
>  ما بنسي أصلو
>  المهم
>  كاردينالابي كسكتابي جوهرجي كبير أحزنه قرار المحكمة العليا دائرة المراجعة النهائي
>  قال المحكمة رفضت رئاسة كردنة ليه؟
>  واحد بسيط قال ليهو ببساطه الأرباب طعن وقال كردنة طالع من السجن ما بصح ليهو رئاسة الهلال
>  التاني قال ليهو والأرباب طالع من السينما يعني !!!!!
>  وهنا تدخل مريخابي وقال ليهم
>  ما مشكلة
>  لحدي ما تلقوا ليكم زول يقودكم يكون ما طالع من السينما
>  بتطولوا وتاخدوا مدة
> ولذا حا نكلم ليكم العمرو ما دخل سينما ولابدخل سينما يرأس الهلال مع المريخ
>  فطومة اختي قالت كردنة حايجيب سرالختم
>  آها يا فطومة يا اختي
>  كردنة مشى يجيب سر الختم الاتنين ماجو
>  الدايم الله يا اختي
>  فارشين وين ؟
>  في إستاد الخرطوم برضو؟
>  قلبي معك يا فطومة الفقد جلل
>  وده كلو من الفيش والتفييش
>  والله يستر من عواقب التفتيش
>  لكن لو دايرين نصيحتي يا روشا
>  فتشوا ليكم عن زول ما دخل السينما عشان يقودكم
> ماتمشوا تلقطوا ليكم زول دخل السينما الدورين
>  المحكمة العليا دائرة المراجعة بترفضو ليكم
>  أقول ليك يا خالد
>  يوم انتخاباتكم جيبوا شريط للراحل المقيم زيدان ابراهيم وشغلوهوا
>  وجيبوا المرشحين واحد واحد قدام المسجل
>  لو زيدان قال
>  ليه يا سمير ما جيتا
>  حرموك ولا نسيتا
>  اووووووووك
>  دخل السينما
>  الزول ده طوالي استبعدوهو
>  الفيش كعب والتفييش صعب
>  والأصعب من كده حالة فطومة أختي
>  المهم
>  نصيحة لمحمد عبدالماجد
>  القرار نهائي
>  أقبلوا بأمر الله وتموها شوالات محل المظلات
>  جيبوا الشوالات التقاااال
>  الخفاف ديل الشمس بتقدقدن
>  ولكن السؤال
>  بعد قرار المحكمة العليا دائرة المراجعة
>  ناس الدكاكين الشرقية بتاعين قرار النائب العام حايعملوا شنووووو؟
>  ايها الناس
>  إن تنصروا الله ينصركم
>  آها
>  نجي لي شمارات والي الخرتوم
>  كان شفت يا والينا
>  كنا بنتناقش حول قرار العليا دائرة المراجعة الفي النت انتشر لينا
>  إسلام تسمع سااااي يا والينا
>  قامت قالت لي أسي الكلام داير درس عصر وتلاتة سنين تمر علينا ؟؟
>  قلت ليها كيفن يا والينا ؟
>  قالت لي يعني نحنا و كل درجات التقاضي الحتة دي كانت فايتة علينا ؟
سلك كهربا
ننساك كيف والكلب قال مرات كتيرة مابنشوف تحت كرعينا عشان كده بنعتر كتييير
والي لقاء
سلك

الأعمدة

د. حسن التجاني

الثلاثاء، 17 تشرين1/أكتوير 2017

خالد كسلا

الثلاثاء، 17 تشرين1/أكتوير 2017

بابكر سلك

الثلاثاء، 17 تشرين1/أكتوير 2017

إسحق فضل الله

الثلاثاء، 17 تشرين1/أكتوير 2017

الصادق الرزيقي

الثلاثاء، 17 تشرين1/أكتوير 2017

خالد كسلا

الإثنين، 16 تشرين1/أكتوير 2017

إسحق فضل الله

الإثنين، 16 تشرين1/أكتوير 2017