الخميس، 29 حزيران/يونيو 2017

board

فطومة الأمورة وفطومة سامورا

>  بالتأكيد حزن الشعب السوداني لمدرسة أولاد يس بريفي  الحاج عبد الله التي لم ينجح منها أحد
>  هذا الرسوب الجماعي يدلل على فشل جماعي تسلسله هرمي
>  فشل من القاعدة العريضة وحتى قمة الهرم البعيدة

>  بعيدة عن كل شيء
>  إلا عن الفشل فهي شريكة أساسية فيه
>  واولاد يس ديل يتحمل يس جزء كبير من إخفاقهم
>  لأنو سكنهم ريفي الحاج عبد الله
>  فلو سكنهم قلب كافوري او ريفي كافوري حتى
>  كان امتحنوا شهادة لندن واجتازوها كمان
>  موش كان درسوا في مدارس خاصة بالإضافة لكورسات مكندشة ودروس خصوصية علنية وسرية؟
>  يبقى كان ممكن يدخلوا السينما ذاتها خليهو الثانوي
>  نتيجة مدرسة اولاد يس لا تعبر عن مستوى الطلاب فحسب
>  فهي تعبر عن هيئة التدريس بالمدرسة والتي قديماً البنات كانن بغنن ليها
>  يا الماشي لي باريس جيب لي معاك عريس
>  شرطاً يكون لبيس من هيئة التدريس
>  بدري الكلام ده
>  وكذلك تعبر هذه النتيجة عن حال مكتب التعليم الذي تتبع له المدرسة مثلما تعبر عن حال المحافظة التي يتبع لها مكتب التعليم كما تعبر عن الولاية التي تتبع لها تلك المحافظة والتي تعبر أخيراً عن اهتمام الحكومة المركزية بالتعليم وإدراكها الجيد لقيمة الإنسان وضرورة الاستثمار فيه بوصفه أهم عناصر الإنتاج
>  ويظهر اهتمام الدولة بالتعليم في أن الشعب كلو أصبح معلم
>  معلم الله
>  والخريجين بقوا معلمين
>  على السقالة او خلف نظارة اللحام او تحت اية سيارة المهم في الموضوع قولة يا معلم
>  وبهذا الاهتمام الحكومي بالتعليم ستقل الأفواج التي تبيع لبان ومناديل ورق وكبابي على التقاطعات
>  وستستفيد الدولة من ذلك الوعي الشبابي المتعلم في نهضة السودان الحديث ووثبته المنشودة على قمة الأمم
>  أيها الناس
>  مدرسة أولاد يس ما براها
>  في كورتنا دي لو شفنا انجازات انديتنا الدولية
>  نجد المريخ فقط على سجلات الكاف
>  أما بقية أنديتنا، فكلها أولاد يس
>  الهلالاب والمورداب اولاد يس
>  لم ينجح احد
>  كوبر والتحرير والسروراب
>  اولاد يس
>  أهلي مدني والسوكرتا اولاد يس
>  حتي التريعة و شرطة القضارف  الصاعدان حديثا للممتاز اولاد يس
>  روشا وخالدونا ومحمد عبد الماجد اولاد يس
>  فطومة اختي بت يس كبيرة
>  ايها الناس
>  البلد مليانة اولاد يس في جميع المجالات
>  المهم
>  التجديد لمجلس الوالي يعني التجديد للعقرب طوالي
>  وتقول الأخبار إن كردنة اتفق مع بكري
>  ولا أظن أن بكري بتفق مع زول ساي
>  زول ما عندو صفة
>  هو بكري كردنة لما كان رئيس الهلال ما اتفق معاهو
>  يتفق معاهو بعد بقي زول ساي ؟
>  وبكري زول دغري
>  ما بحب الزول الدخل السينما
>  لذا الزول الما دخل السينما ولا بدخل السينما هو أقرب الناس للاتفاق مع بكري
>  المهم
>  فطومة اختي
>  الجاتك في مالك سامحتك
>  لكن مالك بالغ
>  تراهو دخل السينما يا فطومة ؟
>  فطومة الأمورة دايرة تسمع صفقة لفطومة سامورا
>  لكن فطومة سامورا طلعت معلمة يا فطومة وما بتاكل من الصفقة ديك
>  سمعتو صفقة من امها
>  عزيزي معتصم جعفر
>  خطاب سامورا بي مغارزو كمان يا فطومة يا أختي
>  الولية ماليه ايدها
>  عزيزي معتصم
>  تقعد في قلبهم لي تلتين أكتوبر
>  وشهر ستة مرسلة ليك وفد يا معصمة
>  عزيزي معتصم
>  ضروري نتقابل في البحرين في عيد الميلاد يا حبة
>  وكلم معاك أصحابك
>  مجدي وسمسم وكل الشلة
>  بالمناسبة يا معصمة
>  في جزء من أصحابك اخترناهم مراقبين في المنافسات
>  درووووري (ضروري ) يجوا يا صومي
>  عزيزي سر ختومتي
>  طبعاً فطومة لما عرفت انو سامورا كتبت في الجواب عزيزي سر ختومتي فرحت
>  قايلاها قاصدة المدهش
>  لكنها يا فطومة يا اختي قاصدة معتصم برضو
>  الساموراي ديل مرات بنادوا الزول بي جدو
>  يعني لما تقول سر الختم بتكون قاصدة معتصم جعفر سر الختم
>  أنا أسي بقولوا لي مستر مكي
>  يعني زي ما تقولي كده زي لقب جدو عندنا
>  لكن الولية مغرزتكم شديد يا فطومة
>  بكرة طلعوها لينا من التمنين في المية كمان
>  مع العلم بإنو التمنين في المية بتاعين الفيفا مشوا مع بلاتر
>  فضلوا ناس العشرين في المية
>  وديل انتوا ما بتنفعوا معاهم
>  المهم
>  أسي بعد قرار العليا ده
>  الأرباب ده يأكل فول كردنة مجاني؟
>  كردنة موش لما قالوا ليهو البطاحات شالن السيخ من الجوهرة  قال الفول فولي زرعته وحدي وسآكله وحدي ؟
>  اها زرعت جوهرتك فول وما اكلتو يا كردنة
>  أكلو الأرباب مجااااااانا
>  منعول ابو السينما ذاتها
>  لكن في الحالتين
>  بي كردنة بالأرباب أولاد يس يا روشا
>  غايتو يا روشا لو بتفتشوا في قائد ما دخل السينما
>  فتشوا في الصافية بتلقوا
>  ايها الناس
>  إن تنصروا الله ينصركم
>  آها
>  نجي لي شمارات والي الخرتوم
>  كان شفت يا والينا
>  مدرسة اولاد يس ماحالة رفيده لدينا
>  العلة منتشره فينا
>  وفي الأكعب من أولاد يس يا والينا
>  في النجحوا وما بعرفوا يقروا يا والينا
>  وفي الاتخرجوا وما سمعوا بعثمان دقنة يا والينا
>  وفي دكاترة قايلين البروستات عند كل المخلوقات يا والينا
سلك كهربا

ننساك كيف والكلب قال وفي ماجستير عربي بعد حرف الجر برفع عااااادي
والي لقاء
سلك