الخميس، 29 حزيران/يونيو 2017

board

يا نتشفتن يا نتبشتن .. الطبعة التانية (2)

> الذين يظنون أن حظوظ المريخ بمجموعات البطولة العربية ضعيفة واهمون
> الزعيم لا يخشى الكبار لأنه أكبرهم
> فالهلال السعودي ذاق من الزعيم هزائم بمختلف الموديلات

> والترجي بعرف حمامو وين
> آخر لقاء لنا بالترجي أقصيناه
> الكبير نحنا ما الكبار هم
> ونقول للذين يقولون وقعة المريخ سودة
> نقول له سودة وقعت الفرق الوقعت مع المريخ في مجموعة واحدة
> وأبشركم بأن ختام كأس العالم العربي وادي نيلي بحت
> ولا أظن أن الأهلي المصري سيكون طرفاً في ذلك النهائي
> ونحنا فيها
> كما نقول لهم
> قول المريخ دخل مجموعة صعبة في بطولة العرب
> انتوا دخلتوا وين ؟
> حقو نسوقكم معانا مصر تدخلوا السينما
> ايها الناس
> الشفت لا يهاب الدواس
> فلسنا على الأعقاب تدمي كلومنا
> وآخر عهد جماعة كده ببطولات العرب كان هروب من سطيف الجزائري أحرجنا مع الجزائريين
> لمن جونا يوم الفاصلة بينهم وبين المصريين ما عرفنا نودي وشوشنا منهم وين
> وعهدهم قبل آخر عهدهم ببطولة العرب سداسية من الترجي أجبرت طلابنا بتونس على تجميد السنة و الهروب للسودان
> طبعاً ده غير الثابتة بتاعة المنشطات
> برضها كانت في بطولة العرب
> فلا تاريخ للناس ديل في بطولة العرب
> مثلما لا تاريخ لهم في بطولة العجم
> برغم محاولاتهم من زمن الدولة الفرعونية السودانية المتحدة
> المهم
> البطولة العربية ليها وكتها
> ولكل وكت رجالو
> الآن نخاطب رجال الليلة
> رجال المجموعات الافريقية
> رجال الجمعة الجامعة
> نريد ثلاث نقاط بالتمام والكمال
> لن تأتي اذا لم تعمل المدرجات على اقتلاعها بحناجرها منذ الدقيقة الخامسة
> وتحميها حتى الدقيقة خمسة وتسعين
> غرزة وأولادو جاهزين
> نحنا في المدرجات لازم نجهز تمااام
> التنسيق مهم جداً
> ووضع خارطة طريق الشفوت نحو النقاط الثلاثة مهم
> لذا للشفوت موعد تنسيقي بدار النادي يوم الخميس المغرب
> دايرين نوزع المهام ونرفع التمام
> حتى مسيرة الفرح بعد الكورة المتجهة للقلعة الحمراء إن شاء الله
> دايرين نرسم لها الطريق
> ونحدد هتافها
> ونختار أغنياتها وأناشيدها
> ونسير حتى دار النادي لنسلم المجلس أول ثلاثة نقاط في دور المجموعات
> هدف واحد يومها للعقرب
> حتى لو ما اتشقلب
> يجعله هدافاً للبطولة حتى هذه المرحلة
> ويجعل ناس الكسكتة يتفرتقوا حتة حتة
> ويخلي آدم يهرب
> عشان تاني لما يقولوا ليهو يا آدم جيب تمنمية وعشرة
> يجيب طمنطاشر مليار
> ايها الناس
> لاتوجد قوة على الأرض ولا قوات محمولة جواً تستطيع أن تحيل بيننا وبين مناصرة الزعيم من ديار الفول فول كردنة
> حانجي كلنا
> ونناصر
> ونشجع
> ونحمي
> بأدب شديد
> فالمقام مقام أدب
> ولكل مقام مقال
> المهم
> في قروبات أصحابنا الأهلة (طبعاً انا عضو في معظمها )
> في تلك القروبات لقيت مقال رائع لافي يشكر في السيد اشرف سيد احمد الكاردينال
> افتكر الكاتبو  زول اسمو عزيز الخير
> هذا العزيز كتاااااااب
> كتاب جنس كتب (بكسر الكاف والتاء)
> ومقالة هذا جاء في وقتو
> فنحن نعاني من سخانة الف
> بالتأكيد نحتاج للتلج الدقاق
> بارك الله في اخي عزيز الخير البرد علينا الجو
> وفي مقال عزيز شرح لسبب تسمية اشرف بالكاردينال
> عزيز قال الكاردينال ده طائر في امريكا الجنوبية صوتو جميل
> واشرف عملو شعار لمجموعة شركاتو  ومن هنا جاء اللقب
> غايتو يا عزيزي عزيز أنا سمعت بالكناري كطيور صوتها جميل
> لكن اول مرة أعرف انو الكاردينال طيرة
> نشكرك على المعلومة يا اخوي
> ايها الناس
> الخميس كل القوة النادي جوة
> عشان الجمعة الجماعة يجيبوا من جوة
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> يوم واحد في الشهر بتكمل مواهينا
> ويوم اتنين الحاجة تبدأ تهيننا
> يوم تلاتة لو ربك لطيف يا والينا
> مفروض،الهموم حتماً تودينا
سلك كهربا
ننساك كيف والكلب قال بركة الشهر فيهو تلتين يوم بس
والي لقاء
سلك