الخميس، 24 آب/أغسطس 2017

board

يا نتشفتن يا نتبشتن ــ الطبعة التانية «3»

>  اضحك كثيراً عندما اسمع انهم يطالبون بكشف للمنشطات.
>  ما داير اقول اذا ساءت افعال المرء تسوء  ظنونه.
>  ولا داير اقول الفيك بدربو.

 >   ولا داير اردح واسمعهم صفقة واقول
>  هي وهييي وتاني هييي.
>  المنشطات شوفوا ناسا.
>  والاتقبض مرة  بالثابتة بعمل التانية والتالتة.
>  ونحنا لا بتاعين منشطات ولا بنينا غرفة مخدرات.
>  وهييي وهييي وتاني هييي.
>  وهييي يكا.
>  مالنا بنستعمل مخدرات!
>  مشتهين مطار ولا اصفار.
>  ولا يعني مشتهين مطار.
>  بلاغاتنا في بري ولا بلاغاتنا في بري.
>  ولا بلاغاتنا في بري؟
>  منشطات لي شنو؟
>  اسي الله يسألكم بكري ده محتاج منشطات؟
>  بكري ده لو نشطناهو بدخل النت بي كورتو.
>  والنت بالعربي يعني شبكة.
>  هو برا منشطات اربعة من مواسيركم بي عيونهم ما لحقوهو.
>  تقول لي منشطات وغرفة مخدرات!
>  إنه الخوف.
>  وإنها محاولات لتبرير الهزيمة المرتقبة
>  ولكن لا فكاك.
>  نقاطنا ومصممين نشيلها كاملة تسليم مفتاح.
 >   وعلى الاهلة انتظار وصول كراسي الجوهرة.
 >   أصلها بتصل عقب كل هزيمة.
>  لا مانع لدينا من احضار ناس الكشف عن المنشطات.
>  وناس المكافحة للكشف عن المخدرات.
>  وناس النظام العام لفتح البلاغات في مواجهة اي زول مخالف للادب والذوق والقانون.
>  مع إصرارنا على متابعة البلاغات الفاتحات.
>  الشرطة شرطة.
>  في بري في بتري في عبري.
>  الشرطة شرطة.
>  والشرطة في خدمة الشعب.
>  ايها الناس.
 >   تلاتة نقاط لذيذات يشبعن الذات. اليومين دي بالذات على الشفوت التكفل بها.
>   نلعب كورتنا ونشيل نقاطنا ونترك الانطنة لي ناسا.
>   بالقرآن مريخنا مصان.
>   والله لا يصلح عمل المفسدين.
>   غرزة واولادو عارفين المطلوب منهم واستعدوا لذلك جيداً.
>   الدور والباقي علينا نحنا.
>   شفوت المدرجات.
>   نجي كلنا من عصراً بدري
>   لا توجد قوة تستطيع منعنا من الدخول.
 >   ندخل بكامل قواتنا وعتادنا.
 >   نتوكل على الله ونشجع بقوة.
  >   لنعود بحول الله بالنقاط التلاتة.
>   ايها الناس.
>   لا صوت يعلو فوق صوت معركة المجموعات التي تبدأ يوم الجمعة.
 >   نريد تفرداً جماهيرياً ملفتاً للانظار مثيراً للدهشة كما عودتنا مدرجاتنا.
  >   نريد اصراراً على النصر في أي مكان وأي زمان.
>   فالأرض جميعها ارضنا.
>   والزمان دوماً زماننا.
>    ونحن ملوك الجو.
>   من يتمتع بالثقة الكبيرة في مريخه وبنفسه.
   >   نحتاجه بشدة في معركة الجمعة من داخل الاستاد
>   ومن يتردد لا نمنعه من الاحتفال مع الابطال عند منتصف الليل.
>   على جميع الجماهير بمختلف تنظيماتهم ومسمياتهم ان ينافسوا انفسهم كما فعلوا في الفين وخمسطاشر.
 >   فإفريقيا والعرب ينتظرون منكم ابداعاً وامتاعاً وادهاشاً.
>   فشفوت الأحمر اثبتوا انهم اعظم جماهير الأندية افريقياً وعربياً.
>   وانهم جمهور خلاق.
>   بدليل محاولات تقليد الآخرين لهم.
 >   انها معركتم يا شفوت.
>   اثق انكم في الميعاد.
>   ايها الناس.
>   لقاء جماهيري لتوزيع المهام وتوحيد الهتاف وقنطرة الهدف.
>   ميعاده الخميس بعد المغرب.
>   مكانه نادي المريخ.
>   وحضوره فرض عين يا شفوت.
>   ايها الناس.
>   ان تنصروا الله ينصركم.
>   اها
>   نجي لي شمارات والي الخرتوم.
>   كان شفت يا والينا.
 >   كلمونا وقالوا لينا.
>   انو الحصار الامريكي هو سبب الضنك الفينا.
>   اسي صالحونا يا والينا.
>   لا دنا عزابها ولا حربها علينا.
 >   لكن لسه الضنك بكبر فينا.
 >   يبقى سبب ضنكنا ما حصار امريكا لينا.
>   ولا سبب غلاوة دقيق الفينا.
>   يمكن يكون السبب يا والينا.
>   كترت الوظائف البتحكم وتتحكم فينا.
>   اتنين نواب وستة مستشارين يا والينا.
>   وكمكمية وزير والفمية نائب برلماني يصفق ليينا.
>   خمسين والي يا والينا.
>   بالجد كترتو علينا.
>   وكلو والي معاهو خمسين وزير يحكموا فينا.
>   والكل بي مرتباتو.
>   بي مخصصاتو.
>   بي عرباتو.
 >   بي حركاتو.
>   بي بركاتو يتحكم فينا.
>   باقي ليك بعد نخصم من الدخل القومي تلك المرتبات والمخصصات والفارهات والحركات والبركات يا والينا
>   تاني في شيء بفضل لينا!
سلك كهربا
ننساك كيف والكلب قال رفع الإعصار التكتيكي كان أهم من رفع الحصار الامريكي.
وإلى لقاء.
سلك