الأربعاء، 17 كانون2/يناير 2018

board

باسكال السوداني اسد النزال

>  لاصوت يعلو فوق صوت المعركة
>  وان كانت اسلحتها غير متكافئة
>  فللمريخ اسلحة فتاكة علي شاكلة المدينة عابر القارات

>  وسلاح الجو الجكساوي
>  وسريع الطلقات موديل الصاوي
>  وباسكال العفصاوي
>  البارجة باسكال يستطيع لوحدة ان يملا الوسط تماما
>  سريع
>  وقوي
>  وسوداني
>  خلاف بقية الاسلحة المريخية
>  ويقابل تلك الاسلحة كمية من المواسير مختلفة الاحجام
>  لكن عدم احترام المواسير والاستهتار بها بعوقنا
>  الماسورة تستطيع ان تكسر الجمجمة اذا غفل صاحب الجمجمة
>  والاسلحة الفتاكة يمكن ان لاتحقق نصرا علي المواسير اذا لم تكن خلفها قلوب شجاعة وقوية وتهدف لنصر كبير واحتلال ورفع علم علي ارض العدو
>  لذا نطالب اولادنا باحترام المواسير
>  وقطع قلب المواسير بالمشاوير
>  والعمل علي ابادتها ابادة جماعية
>  حتي لا تتعلل تلك المواسير وتفرق بين حبية الطلاب الودية والقتالية الافريقية
>  لتخرس السن المواسير التي رددت بان مباراة الطلاب ودية
>  ومابهتموا بيها
>  ايها الناس
>  المنطق يقول النصر لنا
>  ولكن النصر لنا ماساي
> بالايمان  والاخلاص والعمل
>  نخذ القصة مخذ جد
>  لانستهتر بهم
>  ولانجفف عرقنا الا بعد نهاية المقابلة والنيل منهم
>  وعلي جماهيرنا ان تعلم بذلك
>  وان تعمل علي ذلك
>  وان لاتستعجل نصرا هو الاقرب لنا اذا قمنا بواجبنا كاملا
>  معا لحرق الانطنة
>  معا لمحاربة الدجل وابادة الشعوذه
>  معا لنجلس كلو زول في علبو
>  نحن الافضل
>  اذا قمنا بواجبنا كاملا
>  ونترك لرمضان عجب الفرصة كسلاح دمار شامل
>  لازم عجوبة تخرب سوبا
>  فقط نحترم كل المواسير
>  ونقوم بواجباتنا علي اكمل وجه
>  بختك ياصديقي عماد الطيب
>  مواسير كتيرة جاياك في المغلق
>  المهم
>  بالامس كتب صديقي يس بتاع زفة الالوان
>  اشتهر يس بالمنطقية غالبا في كتاباته
>  لكنه بالامس كابر
>  لعله الخوف ياصديقي
>  الخوف بفقد المنطق
>  والمريخ بخلي العاقل يطقع والمجنون يهبش
>  والكسكتة بعد قرار العليا تكنكش
>  وتطرشق انتخابات المدهش
>  انه المريخ ياصديقي
>  فنحن لانتحدث عن صفر
>  ولا ننادي علي آدم ساكت
>  واذا الكاف بوافق
>  حقو كورة الجمعة يعملوها لينا بي ستة نقاط
>  يلموا لينا كورتين في كورة
>  ورانا بطولة عربية ومجموعات ولقاء مريخنا الكبير برصفائه الكبار ناس الترجي والهلال السعودي والاهلي القاهري والزمالك المصري
>  بالمناسبة
>  المريخ والاهلي القاهري والترجي التونسي والزمالك المصري بكونوا جايبين ليهم زي الفين قون كده في الهلال
>  الترجي براهو جايب ليهو ستة واربعين قون في الهلال
>  ياخ زيكو بكون جايب ليهو زي كم وستين قون في الهلال
>  المهم
>  اذا الكاف بقبل عصفورين بحجر
>  ايها الناس
>  التحكيم الافريقي معروفة قصتو
>  بالذات مع الناس البتراوضو
>  ناس الحقنة وبلنت محل الحقنة
>  ناس اللابتوبات والجلكسيات
>  وناس جنوب افريقيا ماديين جدا جدا جدا
>  والموقف هنا يدعو الناس ليشتروا المجد باغلي ثمن
>  لذا نريد تشددا ورقابة من المجلس
>  ورقابة ميدانية من الشفوت
>  فالناس المابتختشي ممكن تخاف
>  عالم تخاف ماتختشيش
>  ولكن جمهورنا الغول. وام بعلو بخوف الضلمة زاتها
>  ايها الناس
>  كشافات استاد الهلال غير قانونية
>  شدة الاضاءة فيها اقل من الحد الادني المطلوب قانونا
>  لذا نوصي المجلس بتقديم احتاج وشكوي منذ الاجتماع التقليدي وقبل المباراة
>  دي ماضلمة لعب
>  وعلي غرزه ان يمرن الاولاد التمرينين الاخيرين بنظارات اللحام كي يتعودوا علي تلك الظلمات
>  غايتو تاني المريخ لما يجي مسافر دولة افريقية يشيل احذية المطر معاهو
>  ولما يجي يلعب في استاد الهلال يتمرن بي نضارات اللحام
>  ايها الناس
>  اللقاء الجماهيري الخميس بعد المغرب بالنادي
>  نجي كلنا نعرف دورنا ونتحمل اعبائنا
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  كان شفت يا والينا
>  بعد الشفناهوا والنت نقلو لينا
> اشرف المدارس مدرسة اولاد يس لقينا
>  نعم لم ينجح احد
>  لكن لم يكذب احد يا والينا
سلك كهربا
ننساك كيف والكلب قال وانا اقول الشفع ديل بجيبوا مجاميع قدر دي وقسطنطينية مابعرفوا يكتبوها كيف بس!
والي لقاء
سلك

الأعمدة

خالد كسلا

الإثنين، 15 كانون2/يناير 2018

بابكر سلك

الإثنين، 15 كانون2/يناير 2018

إسحق فضل الله

الإثنين، 15 كانون2/يناير 2018