الجمعة، 18 آب/أغسطس 2017

board

نحن لها

>  ايها الناس
>  يوم وندخل في المعركة
>  نحن لها

>  لأننا نثق بانفسنا
>  ولأننا نثق باولادنا
>  ولأننا نثق بجهازنا الفني
>  ولأننا نثق في ان النصر حليفنا
>  ايها الناس
>  لا تهتموا لطرقعة المواسير مع بعضها
>  فالمواسير لا تستطيع ان تبيد دبابة
>   ولا ان تحطم بارجة
 >   ولا ان تدك مدفعاً
>  ولا ان تسقط طائرة حربية
>  كل ذلك اذا كان داخل الدبابة قلب شجاع
>  وان كان يقود البارجة راجل ضكر
>  وان كان خلف المدفع قلب ينبض بقوة
>   وان كانت الطائرة الحربية تحت قيادة طيار حربي ماهر
 >   نحن من بيننا القلب الشجاع الذي ينبض بقوة وفتوة ومن بيننا الراجل الضكر والطيار الحربي الماهر
>  ايها الناس
 >   لا يوجد ادنى احتمال لعدم انتصارنا اذا احترمنا كل المواسير احتراماً شديداً لنربطها بالمفتاح الجمجم.
>  ونأكد عدم تسريبها بلفها بشريط الموية
>  المواسير اذا ما احترمناها بتنقط وتطين علينا واطاتنا
>  الدايرة نبل ننبلها
>  والدايرة قلوظة نقلوظها
>  والدايرة بلف نربطو ليها
>  والدايرة تي نشبكم تلاتة مواسير في تي واحد
>  واتنين في كوع
>  الغريبة التي بشيل تلاتة مواسير
>  في كورة الطلاب جبنا إكس اسمو العقرب ربط اربعة مواسير مع بعض
>  يومها كتبنا نمرة اربعة جاري بي اربعة وسط اربعة
>  المهم
>  نحترم المواسير ونقرطها صاح عشان نسيطر على كل نقاط الماء
>  لن نفرط في نقطة
>  ايها الناس
>  تاني ايها الناس
>  بوضوح كده من اسباب نصرنا المنشود اولاد الارباب بالتشكيلة
>  فحزنهم على ارجاء اعلان الارباب رئيساً للشقيق الهلال يجعلهم يؤدون بدون غبينة.
>  اذا احسنا استغلالهم نظفر بالنقاط الثمينة
>  ايها الناس
>  اليوم موعدنا
>  اللقاء الجماهيري بدار النادي المغرب
>  كلنا نجي عشان نوزع المهام
>  فنصرنا ينطلق من حناجرنا اولاً
>  والتعبير عن ثقتنا بأنفسنا يكون بالقيام بادوارنا كاملة على المدرجات
>  نجي كلنا بي صمتنا
>  بي عافيتنا
>  بي اصرارنا على النصر
>  قريط المواسير ببدأ بمفتاح المدرجات الانجليزي
>  مفتاحين
>  يلفن عكس بعد تتقرط الماسورة
>  لازم نقرط المواسير مع بعضها حتى تصيح
>  الشبكنا يخلصنا
>  ايها الناس
>  شايف انا حاجة هنا اولها ع ع
>  دي تكون شنو يا ربي؟
>  يا ربي تكون عجب عقرب! !
>  نشوف
>  ايها الناس
>  رجال كتااار يعملون سراً وعلانية للنصر
>  نشكرهم جميعاً ونخص منهم رجال الحوبة دون فرز
>  ولصديقي عراقي تحية خاصة
>  الما بعرفك يا عراقي بجهلك
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  كان شفت يا والينا
>  من حقنا ان نطمع في الحكومة الجديدة علينا
>  من حقنا  ان نحلم يا والينا
>  من حقنا ان نحلم بحكومة تحس بينا
>  بي حكومة تخاف علينا
>  وتخاف الله فينا
>  ومن حق اولادنا ان يحلموا بغد مشرق تحت راية الحكومة يا والينا
>  من حقهم ان يغنوا ويلعبوا
>  عازه يا عازة مالك بتبكي عايزة ايه؟
>  عايزة حكومة تكون مهمومة بهم الناس
>  تجيب الموية تجيب الكهرباء والكراس
>  تربطنا بي وطننا وتعمق الاحساس
>  عازة يا عازة مالك بتبكي عايزة ايه
>  عايزة وزير لا سمسار لا سراق ولا نقناق ولا أفاق.
>  دايرة موظف يلف في الشارع ما يلف ساقاً بالساق
>  عازة يا عازة مالك بتبكي عايزة ايه
>  عايزة مدينة نضيفه امينة ليست مكب نفايات
>  دايرة فنادق تكون مستشفيات
>  دايرة مسؤول يقلل صرفو يجي بالمواصلات
>  دايرة برلمان يقول لا وابداً ومستحيل ويبطل التطبيل والصفقات
>  موش من حقنا ان نحلم يا والينا!
سلك كهربا

ننساك كيف والكلب قال ولد الودع بت وحلم الجيعان عيش
والى لقاء.
سلك