الجمعة، 18 آب/أغسطس 2017

board

رمضان وا فليلا

>  يمن الله علينا ببركات شهر كريم فيه عتق من النار.
>  ونسأل الله ان يكون فيه عتق من الناس
>  الناس الكده.

>  ومعقولة بس في ناس كده؟
>  دعواتنا بمناسبة معقولة بس في ناس كده للراحل المقيم الحوت برحمة واسعة.
>  محمود خدام الرسول.
>  صلي الله عليك يا حبيب الله.
>  رمضان يا حليلو كمل.
>  السبت الجاي خليهو.
>  السبت البعدو اسي بجي.
>  والسبت البعد البعدو رمضان ليهو واحد وعشرين يوماً
>  ياحليلو ما فضل فيهو شيء.
>  اهلنا في دارفور ملوك الامثال والحكم
>  واهل دين وقرآن.
>  بتفرحهم جية رمضان.
>  عندهم نمة برددوها مع دخول رمضان بتقول
>  رمضان وا فليلا السعن مليان بليلة
>  ووفرة البليلة عندهم تعني الكفاية في شهر الهم فيه عبادة ما اكل زيادة.
>  السنة دي غايتو نحنا واهلنا في دارفور الخوف  نردد:
>  وا فليلنا نحنا
>  ايها الناس
>  فرصة لممارسة المحبة والعفو.
>  تعالوا نحن بعض في هذا الشهر.
>  ما بالضرورة حب شديد.
>  في الاول تعويد وبعدين تجويد.
>  فالزايلة تتسارع خطاها نحو الدايمة.
>  والموت الفحك الفحك مابدي فرصة.
>  وقد تقوم القيامة في اي لحظة.
>  وعندها يكون الحساب ولد.
>  اخوتنا الاهلة تقوم قيامتهم بي صفرهم ده.
>  كضب هناك ما بنفع.
>  كاس كنغو  ووصلنا وقصص زي دي ما محلها هناك.
>  عشان كده حقو نتسامى على الصغائر ونبقي ناس آخرة ساااكت.
>  طلعنا من الدنيا كيت.
>  لا اختلسنا مال عام
>  ولا استغلينا وظيفة
>  ولا عملنا كوبري.
>  ولا تطاولنا في بنيان هو في حقيقته دليل اثبات يقدم ضدنا في يوم لا تشطب فيه الاجراءات بقرار.
>  ولن نترك لاولادنا ميراثاً يخجلهم بمجرد ارتباطه باسامينا.
>  فقط سنورثهم اخلاقاً وسلوكاً حميداً وسيرة تجعلهم لا يخجلون لارتباط اسمائهم بنا لاننا لم نربهم علي موائد خبزها سحت ولحمها خنزير.
>  عشان كده نصفي النفوس ونحسن العبادة ونستغفر الله كثيراً على هنات نحمد الله لا تتعلق باموال الناس وحقوقهم
>  فقد ورد بالحديث القدسي
>  وعزتي وجلالي لا اظلمن عبداً لعبد
>  نبارك للوطن والامة اطلالة الشهر الكريم
>  المهم
>  الدين سلوك
>  والسلوك تعامل  ومعاملة
>  تعالوا نستغل هذا الشهر الكريم في مراجعة سلوكنا وسلوكياتنا لننقيها من الشوائب.
>  تعالوا نعترف بعيوبنا كي نعالجها
>  الراشي مواطن سوداني
>  المرتشي مواطن سوداني
>  المسؤول المختلس سوداني
>  البقول منعول ابو دي بلد سوداني
>  يبقي الخلل واضح
>  نحتاج تربية من تحت لي فوق
>  وبالذات لي فوق دي
>  لا نحتاج لبناء مسجد
>  ولكنا نحتاج لبناء منهج سلوكي وتربوي نجني ثماره بعد ميتين سنة
>  لا يهم اننا لن نحضر جني الثمار
>  تعالوا نتعامل من امر غرس السلوك الطيب والتربية معاملة الهنود مع زراعة اشجار الصندل.
>  فمن يزرع شجرة الصندل يكون عالما بانها لا تكتسب رائحة الصندل المميزة والمقيمة لها الا بعد مئات السنين.
>  ولكنه يزرعها لاجيال قادمة.
>  فهل قمنا بزراعة السلوك والتربية القومية والقويمة لتجني ثمارها اجيال قادمات علي نهج زراعة شجرة الصندل حتي نضمن بعد ميتين سنة
>  مافي زول بقول منعول ابو دي بلد
>  مافي وزير بختلس
>  مافي مواطن برشي
>  مافي موظف برتشي
>  مافي زول يصاب في حادث حركة الناس مودياهو المستشفي تسرق موبايلو
>  مافي سودان قبلي
>  مافي وطن فقير
>  مافي وصاية علي زول
>  مافي استغلال للبسطاء
>  مافي تبعية عمياء
>  مافي اشياء كتيرة عانينا منها كثيراً.
>  المهم
>  ماشين موزمبيق بمفهوم ناكل فيرو هناك ونجيب معانا فيارو ناكلو هنا
>  واخوتنا مشوا تونس.
>  ما عارف شالوا معاهم احذية الكفن ولا مشوا سااااي ناس تابوت.
>  المهم
>  على غرزة واولادو ان يعلموا اننا ننشد من موزمبيق تلاتة نقاط
>  وعليهم ان يعملوا على ذلك
>  ويقرطوا على كده
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  كان شفت يا والينا
>  امس للتراويح صلينا
>  اصطفينا
>  الامام كبر لينا
>  كبرنا يا والينا
>  قرأ لينا
>  ركع بينا
>  ركعنا معاهو يا والينا
>  رفع بينا
>  رفعنا معاهو من السجود يا والينا
>  سجد بينا
>  سجدنا معاهو يا والينا
>  رفع بينا من السجود يا والينا
>  قام بينا
>  لقي روحو قائم براهو يا والينا
>  الركب حمننا والكراسي كترت في الجوامع يا والينا
سلك كهربا

ننساك كيف والكلب قال شدوا حيلكم قبل البليلة
والى لقاء
سلك