الإثنين، 18 كانون1/ديسمبر 2017

board

رمضانيات

>  تكثر النوادر في رمضان
>  ولعل المبدع سيد جرسة قد استلهم تلك السلسلة الرائعة من جرسة الصائم
>  و يتناول الناس النكات الرمضانية كوجبة اساسية خلال الشهر

>  و طقوس الناس تتغير برغم انها تنحصر في اشكال محددة
> شاطئ النيل أو البحر كما يحلو لمرتاديه تسميته
>  احب مكان عندي في رمضان
>  السودان كلو تلقاهو في البحر
>  جلبغة وترطيبة ثم صلاة وتلاوة فغسيل عربات وركشات
>  وجابت ليها بيع ليمون وخيار وعجور كمان علي الشاطئ
>  أول يوم مشيت البحر
>  سخانة ألف
>  لقيت ليك الناس جوة الموية مارقين ريسينهم عاملين زي حله الكوارع والموية فايرة حوالينهم
>  رميت ليك روحي في الموية
>  جسمي قال تشششش
>  لقيت البحر زاتو داير ليهو بحر
>  قلت للزول الجمبي السخانة شديدة
>  الزول الجمبي قال لي
رمضان لو يستلف لينا السخانة مابجينا ساي
>  برغم الرهق الشهر جميل
>  ترويح عن النفس وتقرب لله تناسي لهموم الحياة برغم قرب العيد وبعدو المدارس طوالي والخريف معاهن
>  راجينا صرف زي الصرف
>  عندما نتذكر الراجينا نجدد الغطس والجلبغة
>  نحنا أولاد النهار ده
>  باكر يحلها الحلال الوحيد الذي لا شريك له
>  أيها الناس
>  يوجد عشاق سلطة الطماطم بالدكوة التي يخبوها علي الازقة جوار الاسواق
>  ومعاها بيبسي بااااردة
>  الواحد يزوغ من السوق يضرب اتنين ساندوتش وبارد بالضرا
>  ويقش خشمو ويغسل وشو ويخش السوق مكتل عويناتو تحلف تقول صايم الدهر
>  وديل اخير من الناس البصوموا ومن اول يوم تحلف تقول الزول ده بموت اسي
>  الحيل ميت والعيون ناشفات والوش يشبه يوم تسعه وعشرين رمضان
>  أصلو مابتصدق ده وش اول يوم في رمضان
>  لو في زول يقرب يسلم وشاف وش زول من ديل بتردد
>  لكن نحنا لسانا طويل
>  قبل كده رمضان جانا في الشتاء
>  قعدنا نضحك
>  ده ما رمضان
>  ده هيثم ساكت
>  ونتضاحك لما قلب
>  والصبر غلبنا
>  ايها الناس
>  نصبر علي الأحر واسخن من رمضان
>  كيف يغلبنا الصبر علي الصيام
>  مع العلم بانو رمضان هو الشهر الوحيد البناكل فيهو في السودان
>  اسي قبل رمضان ده اتحدي زول خت ليهو صينية فيها تلاته اصناف وجمبها جكين لعصيرين منديات
>  المهم
>  في ناس كده بمشوا الدكتور قبل رمضان بحثا عن رخصة
>  واحد من الجماعة ديل مشي الدكتور
>  قال ليهو يادكتور لما اعطش نفسي بقوم افطر؟
>  الدكتور قال ليهو عادي البلد دي كلها نفسها قايم
>  ماتفطر
>  قام قال ليهو لو جعت قلبي بضرب شديييد وعيوني بتطشش افطر
>  الدكتور قال ليهو البلد دي كلها جعانه وشايفه طشاش
>  عادي ماتفطر
>  قام قال ليهو لكن يا دكتور بالنهار كلاي بنتحن ونخري بفتحن وآمالي بتجهجهن افطر؟
>  الدكتور قال ليهو احمد الله لسه عندك آمال حتي ولو بتجهجهن ماتفطر
>  قام قال ليهو مرات بتجيني شحيحة وفحيحة افطر يادكتور؟
>  الدكتور قال ليهو بركة الجاتك الفحيحه ماجاتك الفضيحه .. ماتفطر
>  قام قال ليهو يادكتور مرات كرعيني بدخلن في بعض افطر؟
>  الدكتور قال ليهو بركة الكرعينك دخلن في بعضهن مادخلن الجامعة
>  لو دخلن الجامعة كان صرفنك دم قلبك
>  احمد الله وماتفطر
>  قام قال ليهو عندي بتين دخلن الجامعة نشفن دم قلبي افطر؟
>  الدكتور قال ليهو احمد الله المادخلن الحراسة
>  ماتفطر
>  قام صاحبنا قال ليهو انا هلالابي افطر؟
>  الدكتور قال ليهو انت هلالابي صابر علي صفرك ده وصايم تمنين سنة بغلبك الصبر علي الصيام ساعات
>  قام قال ليهو يعني شنو يادكتور؟
>  الدكتور قال ليهو تصوم  ودي فرصة تقلع عن التدخين وتتخلي عن التمباك وتترك تشجيع الهلال
>  صاحبنا زهج وقال للدكتور
>  اقول ليك عندي فحيحة وبشجع الهلال تقول لي ماتفطر؟! انت مفطرني من جيبك يادكتور
>  ايها الناس
>  الشفوت بموزمبيق للعودة بنقاط ثلاثة
>  لا قبول لاي احتمال غير النقاط الثلاثة
>  لنردفها بنقاط فيرو هنا
>  ثم نفكر في الصعود
>  ناس تونس فرحانين
>  قالوا السحور وصل تونس
>  التوانسة ديل بحبوا يتسحروا
>  لذا تجدهم في انتظار المسحراتي بفارغ الصبر
>  وبياكلوا في السحور كتيييير
>  ما صحن صحنين
>  صينية كاملة اقل شئ فيها ستة صحانة لو حسبنا صحن الشطة معاهم
>  واتسحري
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  بالشايفو ده كلو نفطر يا والينا؟
سلك كهربا
ننساك كيف والكلب قال الصيام ما جوع وعطش وبس…  الصيام كف عن اشياء كتييييرة و سرقات كبييييرة
وإلى لقاء
سلك