الأربعاء، 28 حزيران/يونيو 2017

board

السحور بالزنطور

>  عين الكوكي بقت عين مفارق
>  نفس ملامح عين الحيدوسي ايام اخد ستة

>  ولعل روشا وفطومة قد اعدا اعمدت بعد السحور التي تدور حول خيانة الكوكي والتواطوء مع بني جلدته
>  وطبعا ماحاينسوا عبارات ليه بدأ بكاريكا العجوز ووضع محمد موسي بالكنبة
>  ولو بدأ بمحمد موسي ووضع كاريكا بالكنبة
>  فان الامر لايكلفهما سوي عكس الاية والحديث عن لماذا بدأ بمحمد موسي عديم الخبرة والذي يبرطع كالحصان في المطر وترك كاريكا القائد المحنك
>  ويزيدوا علي كده
>  هو محمد موسي لو فيهو فايدة كان المريخ شطبو سنة 2014
>  روشا وفطومة في سبيل التبرير لسوء تسجيلات كردنه ممكن يقولوا اي كلام وفي اي زول
>  وسمعنا انو كردنة قال عندو جلطة حايمه لو ماركزت في 2017 دي تاني مابتركز
>  اكيد عند روشا سبب الجلطة هو بويا ود الارباب
>  وعند فطومة اي زول ممكن يكون سبب الجلطة الا اوتارا القاعد ستة شهور يتضاره
>  واحساسي بيقول اوتارا وابو عاقلة واب ستة هم اسباب الجلطة
>  والناس التلاته ديل علي اقل تقدير عندهم قونين يوم كورة النجم
>  لكن في ياتو شبكة ربك يعلم
>  ايها الناس
>  التوانسة بعشقوا السحور
>  وقمة المتعة عندهم السحور بالزنطور
>  تلقاهم قبل رمضان طوالي بمشوا السوق يشتروا عدسية وبلح وزنطور
>  سوق الزنطور في رمضان بكج شديد
>  والغريبة في التوانسة ببدوا السحور الساعة واحدة الا ربع
>  وما عندهم امساك
>  اذن ما اذن
>  مابخلوا السحور الا لما يكمل الزنطور
>  وممكن يكونوا بياكلوا من سحور الليله لي فطور بكرة
>  امانة الزنطور مو طاااعم
>  ايها الناس
>  في غبار امس ده عيني لي كيس الكوكي طاير
>  وردحي ام ضفاير
>  لما الغبار جا كنا في البحر
>  الشعب الهايم كلو عايم
>  جنيهنا زاتو عايم اظنو صايم
>  اعوم واحد فينا كان الجنيه
>  اكثرنا خبرة في العوم
>  نحنا بنعوم في رمضان بس
>  لكن جنيهنا عايم السنة كلها
>  بقي كيجاب بس
>  كيجاب زاتو ماعام تلتين سنة متواصله
>  بعوم حرة وفراشه وكلب وبدق راس من اي حته ومابهمو
>  وكانت الاغنية تقول كلماتها الصيد العوام يا ناس
>  وياوزينة عومي وعومي
>  بقينا نحنا والوزينة و الصيد بنتفرج علي الجنيه العايم
>  في ناس قالوا جنيهنا ممكن يبطل عوم ويطير
>  احلام الفتي الطائر
>  ايها الناس
>  الشفوت بموزمبيق في انتظار صافرة الحكم علي احر من الجمر
>  يريدون ان يصالحوا الجماهير ويمحون عثرة الدار
>  كلهم همة و اصرار
>  بدءا من حاتم عبد الغفار مرورا بالمعلم غرزه ووصولا للاولاد
>  نحن نعد العدة لاستقبال نصر كبير تحققه بعثة التحدي بحول الله
>  دايرين نفطر بمزاااج وننتظر السحور بمزااااج
>  سنكون ليلة السبت في المركز الثاني للمجموعة بنقاط اربع يتقدمنا النجم بنقاطه التسعه واهدافه الطلطاشر
>  النجم خلاص عبر
>  كورة تاني ونعبر معاهو بي سبعة نقاط والنجم بكون عمل اطناشر نقطة بالتمام والكمال
>  او هكذا يقول منطق الحسابات من واقع المستويات
>  نعبر مع النجم ونترك فيروفيارو وصفروطارو ونمضي
>  اها
>  رمضان البلعب لينا لو سخن زي رمضان الفينا
>  فيرو مابياخد دقيقه معانا
>  مسألة اصرار تجعل نقاط موزمبيق عندنا في الحفظ والصون
>  لذا
>  لا للاستهتار والاستهوان واضاعة الاقوان
>  من بدايتها نحسمها وتقوم علي فطورنا عشان نتفرغ لي سحورنا
>  المهم
>  خبر اقتحام الاتحاد العام بامر النائب العام اللافي في القروبات ده
>  في ناس تمنوا انو يكون صحيح عشان يجينا التجميد
>  وبرروا ذلك بان المستوي متدهور ولذا اخير التجميد
>  الناس ديل بنقول ليهم بس ياريت ماتكيلوا بمكيالين
>  اذا كان تدهور المستوي اخير منو التجميد
>  يجب ان تنادوا بتجميد الجنيه
>  والتعليم
>  والصحه
>  والمواطن
>  والوطن
>  والاخلاق
>  والسلوك
>  ديل موش كلهم مستواهم متدهور لمن لحقن امات طه؟
>  هي بقت علي الكورة؟
>  زمان قلت ليكم كورتنا لازم تشبه عملتنا البتشبه عيشتنا البتشبه لقمتنا
>  شئ طبيعي يتشابهن
>  ايها الناس
>  رمضان قالوا العشرة الاوائل في الشحم والبعدن في اللحم والبعدن في العضم
>  السنة دي اليوم الاول في العضم ومن اليوم التاني دخل القلب توووووووش
>  تقبل الله منا ومنكم صالح الاعمال واجاب دعواتكم السرية الكوتيمي
>  قولوا آميييييين
>  آميييين ذاتها كوتيمي!!!
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  نفطر يا والينا؟
سلك كهربا
ننساك كيف والكلب قال ناس بتقول آمييين كوتيمي راجي منهم شنو؟ راجي عبد العاطي!
والي لقاء
سلك