الأربعاء، 26 تموز/يوليو 2017

board

ماشي وين مخلينا !!!

>  ياحليل رمضان
>  حايوحشنا شديد
>  الشهر الوحيد البقابل فيهو الانسان اخيه الانسان المعاهو في البيت

>  الشهر الوحيد البتلتقي فيهو ايادي اهل البيت مجتمعه في اعداد المأكل و تناول المأكل
>  فنحن شعب اضحي لايعرف ختت الصينيه
>  لاننا لافين صينية
>  حايوحشنا رمضان الحبيب الذي تهدأ عنده النفوس
>  وتصفو فيه النوايا
>  ويتبارك فيه الرزق
>  ايها الناس
>  اول مره اشوف حاجه اسرع من بكري المدينة
>  رمضان السنة دي جانا فووووووووو
>  يوم واحد رمضان
>  غبنا سبت البعدو واحد وعشرين والليله تسعة وعشرين
>  مامهلنا
>  زي قون بكري في الهلال في كورة الطلاب
>  خت الون جاهو التو الوكت داك كان وراهو اربعه وبشكير مكسيم في الواطة
>  ايها الناس
>  تقبل الله منا  منكم صالح الاعمال
>  واعاده الله علينا ونحن نرفل في صحة تمكننا من الاستمتاع بالصيام والابتسام واللمة الحلوة
>  وجعل الله هذا الشعب مستمتعا بسلطتة مقتسما في عدالة ثروته ناظرا بزهو لدولته النزيهه ولسلوكه القويم في احترام الآخر والمحافظة علي جمال مدنه ونظافتها
>  اللهم اعده الينا وعربية النفايات تأتينا قبل الكلب الببشتن النفايات علي الطرقات جاعلا من مدننا كوش كبيييرة عندها معتمد بتبع لوالي يتبع بدوره لحكومة تدعي الحضارة سبعة وعشرين سنة ونحن في عهدها نرفل في وسخ بين ارتال الضبان وجحافل جيوش الباعوض التي لايفصلها الا موكب مسؤول تحفه عربات الحراسة وتتقدمه السارينات واكياس النفايات تصفق للسيد المسؤول الذي وفر لها الحرية لتعبث في كل مساحات البلد
>  اللهم اعده علينا واطفالنا لو سألونا عن الفساد واختلاس المال العام لا نعرف لهم اجابة الا ندخل قوقل
>  اللهم اعده علينا ونحن نسمي الاشياء بمسمياتها
> الحرامي حرامي
>  لما نشوفوا نقول ياهووو
>  والكوليرا كوليرا مانسميها مائية
>  المهم
>  تبقت ايام للفاصلة التي تقودنا لمرحلة اعلي بدور المجموعات
>  الشفوت عليهم دور كبير
>  وامام غرزه الفرصة مواتية لاعادة اثبات ذاته
>  اللهم اعده علينا ومجالسنا خالية من اصحاب الاجنده الذين يحفرون لصالحهم حتي ولو كان في ذلك ضررا للكيان الكبير
>  اللهم باعد بيننا وبين الاداريين من شاكلة الذين ينادون فلان وفلان في المقصورة ويحرضونهما علي ضرب المدرب علنا بين الناس للدرجة التي تجبر اسامة عضو اتحاد الخرطوم للتدخل بقوله
>  عيب يا «.........»
>  تعتذر يا «.........» للملأ
>  ولا ننشر ليك الواقعه بالاسم و التسجيل؟
>  ايها الناس
>  كمل رمضان
>  تلفزيونيا طلعنا منو بي سوار الدهب الرائع وهايل السر قدور المميزه
>  وبالمناسبة السر قدور السنة دي جاب ناس صورة وصوت
>  وناس بس صوره زي العصفورة
>  وناس لا صوت لاصورة
>  ولكن تبقي هايل قدور سببا للدهشة
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  والينا
>  طالما بنقري اولادنا علي نفقتنا
>  طالما بنعالجهم برانا ومعظم العلاجات بره التأمين حسب ما مكتوب في ورقتنا
>  طالما بنشتري بالشئ الفلاني كهربتنا
>  طالما بندفع للحكومة من عرق درداقتنا
>  موش حقو نرفع علمنا ونعمل سلام جمهوري لي دولتنا
>  دولة رب الاسرة الفي حلتنا
>  وتبقوا انتوا دولة صديقة يا والينا
سلك كهربا
ننساك كيف والكلب قال في دولتكم اعملوا وزارة للبطري تعتني بالكلاب الزينا
والي لقاء
سلك

الأعمدة

خالد كسلا

الأربعاء، 26 تموز/يوليو 2017

د. حسن التجاني

الأربعاء، 26 تموز/يوليو 2017

بابكر سلك

الأربعاء، 26 تموز/يوليو 2017

د. حسن التجاني

الثلاثاء، 25 تموز/يوليو 2017