الأربعاء، 22 تشرين2/نوفمبر 2017

board

قمبر قمبر شيخ الطير

>  اسي عليكم الله يافطومة الزول الراسو زي راس قمبر قمبر شيخ الطير ده
>  خاتنوا ستة شهور ياكل ويشرب مسوي داقوسو ده

>  دي ياها الخاتنوا ليها؟
>  خاتنوا لي بشتنة الغربال دي ؟؟
>  يا ريت كورة الطلاب لو وافقنا بي مشاركتو معاكم
>  كان انتهت ستة ما اتنين بس
>  فطومة اختي
>  قلتي لي الجمعه تمرين؟
>  فعلاً والله انتوا محتاجين تمارين كتيييرة.
>  قمبر قمبر الما بعرف يحلق راسو ده محتاج لتعلم ابجديات الدفاع.
>  جيبوهوا كورس عند نمر.
>  لكن يا فطومة الجمعة تتمرنوا.
>  تدرنوا.
>  ماتجوا.
>  مافارقة معانا.
>  نحنا تأهلنا بنجيبوا غربلة ورقاد واطه.
>  ما بنرجي شيء من فاقد الشيء يا فاقد الشيء.
>  لأن فاقد الشيء لا يعطيه.
>  ولكن نقدم الدعوة للكاف والفيفا والعالم اجمع.
>  ليكونوا حضوراً في لموقعة الإنسانية والخلق القويم لنادي التربية والوطنية.
>  انها الجمعة التي يفصح فيها الهلال للعالم اجمع عن تربيته ووطنيته وخلقه وادبه.
>  نقدم الدعوة للعالم كلو لا لنقدم دعوى.
>  ولكن ليشهد العالم على السريرة والخلق وحسن الخصال.
>  ومنكم كتر خيركم مادايرين شيء
>  لأنكم ما عندكم شيء
>  وفي مجموعات افريقيا لا يوجد فريق لم ينتصر الا الهلال السوداني والقطن الكمروني .
>  سانت جورج الافريقي انتصر.
>  يبقى الما قدر ينتصر نهائي ما بقدر يحدد منو البصعد ومنو الما بصعد.
>   الصعود والتأهل ده شعراً ما عندكم ليهو رقبة.
>  طيش افريقيا والعرب.
>  استحقيتوا اللقب.
>  طيش الدنيا والآخرة.
>  هل يمكن أن يصبح طيشاً للأخلاق كمان؟
>  وهل يعقل أن يحدد قمبر قمبر مصير بطولة؟
>  هو ما قدر يحدد يقيف لمحمد عبد الرحمن وين.
>  يحدد محمد عبد الرحمن يتأهل ولا ما يتأهل.
>  ايها الناس.
>  سمعتوا بالمليون والمليار والترليون والبليار؟
>  دي طبعاً اكبر ارقام عرفتها البشرية.
 >  والتفرقة بينها تكون بعدد الاصفار.
>  المليون ستة أصفار.
>  والمليار تسعة أصفار.
>  البليون اطناشر صفر .
>  البليار خمسطاشر صفر.
>  الترليون طمنطاشر صفر.
>  ودي طبعا دراسة قديمة.
>   فقد أثبت العلم الحديث ان هناك رقماً صفرياً كبيراً اكبر بكثير من المليون والمليار والترليون والبليون.
>  وان ذلك الرقم به تسعة وتمنين صفراً قابلة للزيادة في اي لحظة.
>  واطلق العلماء على ذلك الرقم الهلاليار.
>  تقول لي نتمرن ونأهلكم وهرطقة فارغة.
>  خليكم في هلالياركم.
>   ايها الناس.
>  عليىمجلسنا مخاطبة الكاف عن طريق اتحاد معتصم الذي تعترف به الفيفا، وذلك لتراقب الكاف الموقف يوم الجمعة وتتعرف على معادن الفرق والاندية وتتخذ ما تراه مناسباً من قرارات تريح بها الكرة في افريقيا من حاجات كتيييرة.
>  المهم.
>  سمعنا تحت تحت استغناء الهلال عن تيتيه.
>  فسمعنا تحت تحت رغبة غرزه فيه.
>  قمنا سمعنا تحت تحت تمسك الهلال من جديد بتيتيه.
>  غايتو يا روشا
>  تاني البتسجلوهو الا يموت عندكم.
>  تفكوهو بنشيلوا ونغلبكم بيهو.
>  تاني ماحا يكون عندكم كشف شطب.
>  حايكون عندكم كشف اعدام.
>  المادايرنو ماتشطبوهو.
>  اكتلوهو.
>  ايها الناس
>  اوصي مجلسنا مجدداً باتخاذ التدابير اللازمة عن طريق الاتحاد الشرعي ومخاطبة الكاف.
>  ايها الناس .
>  إن تنصروا الله ينصركم.
>  اها
>  نجي لي شمارات والي الخرتوم.
>  كان شفت يا والينا.
>  مطرة واااحدة صبت فينا.
>  طمبجت شوارع المدينة.
>  فكت العفنة فينا.
>  جات بي باعوضها وضبابينها.
>  الشوارع اسهالات مائية يا والينا.
>  والمواطن نعاديهو بالمائية ويعادينا.
>  الدوا صعب علينا.
>  والجيوب إسهالاتها مالية افقدتها سوائل يا والينا.
سلك كهربا
ننساك كيف والكلب لما الجريو قال آآآي يا بطني جرى منو ونكرو.. .فرَّ من بنيه في الدنيا قبل الآخرة.
وإلى لقاء.
سلك

الأعمدة