الجمعة، 22 أيلول/سبتمبر 2017

board

هو انتو قفلتوا متين؟!

> أضحك كثيراً
> أضحك لما اتفنقل في الواطة
> لمن اسمع بنية الاهلة للفتح لفيرو بعد طارو

> انتو قفلتوا متين؟
> ماطوالي فاتحين
> زي قسم الشرطة
> فاتحين طوااالي
> زي الباب المافيهو ضلف
> شراعه سااااي
> حلق بس
> غير الحلق ده ما عندكم شئ
> قفلتوا متين وغلبتوا منو عشان تفتحوا لي فيرو؟
> الحسادة ماتعميكم عن مستواكم الحقيقي ياطيش
> انه كيانكم
> علي كيفكم تفتحوا تقفلوا تطيروا
> البريحكم
> لكن التاريخ لن يرحمكم
> وحق الاهلة الشرفاء علي اعناقكم
> و صفحات التاريخ لن تنسى تسجيل السقطات على صفحات الساقطين
> فمن يسقط يتحمل تبعات سقوطه اجيال واجيال
> المهم
> الغربال شغال في مناطق الدهب شغل جد
> بغربل دهب
> الغرابيل كلهم شغالين بغربلوا دهب
> الا غربالنا بغربل صفر
> الغرابيل تغربل دهب
> وغربالنا يغربل صفر
> وما زعلانين
> فرحانين من غربالنا البغربل الصفر ده
> واتصفري
> واتغربلي
> ايها الناس
> نستأذن استاذنا الفاتح جبرة في واواتو
> فاصفار الهلال اكتر من واوات الفاتح جبرة
> والخوف يا استاذي جبرة خط هيثرو يرجع وصفر الهلال يكون في حتتو
> ونختم كلامنا بعبارة
> اخبار صفر الهلال شنووووووو + وشنوووو؟.
> والحصل في صفر الهلال شنووووووووووووو
+ شنوووووو+ و+ و؟
> ايها الناس
> لن نعتمد علي غيرنا
> نأكل بيدنا
> ونمضغ جيدا مستمتعين بي حقنا
> نقتلع نصرنا من بين براثن جمهور سوسة الشرس
> ونعلن تأهلنا من هناك بفضل الله بصرف النظر عن فتحوا وما فتحوا
> ولن نعير مباراة الطارو وفيارو ادني اهتمام
> فنحن لا نضيع زمننا في مباراة اطرافها طايرين
> وأأكد لكم
> بعد مباراة الطارو وفيارو الاتنين حايبكوا
> الدرون بنزلهم الاتنين
> الله يجيب يوم الجمعه عشان تكون بطولة العرب اعدادنا للمرحلة الافريقية المقبله
> ايها الناس
> المريخ عالم جميل
> فبعد ان قدم قروب ديناكوردات الزعيم المعايدة لكابتن كمال عبدالوهاب بمنزله العامر
> هاهم يكرمون وفاءا اهل العطاء في شخص الكابتن بشارة عبدالنضيف
> التكريم الرائع بدار الشرطة العامر انابة عن جماهير المريخ العريضه
> ومقابلة عطاء بشارة وجيله بوفاء الجماهير ابد الدهر
> شكرا ديناكوردات شفوت الزعيم
> المهم
> نقلت الانباء نجاة تيتيه واوكرا في حادثة انفجار انبوبة الغاز
> دايرين تشطبوهم ولا شنو يا روشا !!
> دايرين تشطبوهم وخايفين نلمهم يغربلوكم ويعقربوكم ولا شنو يا روشا؟
> امس القريبه دي موش قلت ليكم بعد بكري والغربال شطب مافي «...........» بس
> ايها الناس
> صدقوني
> الهلال لو ماجا الميدان
> المريخ صاعد صاعد
> واي محاولة من المحسوبين علي جمهور الهلال لاشاعة الفوضي وايقاف المباراة سيدفع تمنها الهلال حرمانا من المشاركة
> علي الاقل تريحوا الصفر القطعتوا نفسو بالسك ده يافطومة
> ايها الشفت
> خلي املك في الله كبير وثقتك بنفسك كبيرة فانت صاعد لمرحلة جديدة من المنافسة الافريقية بفضل الله
> ايها الناس
> ان تنصروا الله ينصركم
> اها
> نجي لي شمارات والي الخرتوم
> الزول ده ماسك عليهم شنو يا والينا؟
> نحنا عارفين لكن قول لينا
سلك كهربا
ننساك كيف والكلب قال خبر بفلوس بكرة ببلاش .. الشمار بتغربل والتفل بتصفى.
والي لقاء
سلك

الأعمدة

خالد كسلا

الجمعة، 22 أيلول/سبتمبر 2017

د. حسن التجاني

الأربعاء، 20 أيلول/سبتمبر 2017

خالد كسلا

الأربعاء، 20 أيلول/سبتمبر 2017

الصادق الرزيقي

الأربعاء، 20 أيلول/سبتمبر 2017

إسحق فضل الله

الأربعاء، 20 أيلول/سبتمبر 2017

محمد عبدالماجد

الأربعاء، 20 أيلول/سبتمبر 2017

كمال عوض

الأربعاء، 20 أيلول/سبتمبر 2017