الأربعاء، 22 تشرين2/نوفمبر 2017

board

عاصمة الماءات الخمسة

>  نااااااااايم
>  غير النوم عندنا شنو
>  قمت حلمت

>  حلمت ليك وانا قاعد جمب البحر كده
>  جات باغة عايمة ووقفت جمبي
>  كانت مقفولة بي كيس
>  وبس في الحلمة ديك  قمت فتحت الكيس
>  دخان كتير طلع
>  وفي نصو زول ابيض
>  لابس ابيض
>  شعرو ابيض
>  دقنو ابيض
>  سنونو صفر
>  قال لي شبيك لبيك داير شنو اعملو ليك؟
>  قلت ليهو انت منو يا زول !
>  قال لي انا شيطان الجرة
>  قلت ليهو لكن انت طلعت من باغة
>  قال لي انت من زمن الجرة؟ الجرة اتباعت بدري
>  قلت ليهو الباعها منو؟
>  قال لي الاسئلة البتجيب الهوا اتجنبها
>  شبيك لبيك داير شنو اعملو ليك؟
>  سريع دايرين نتخارج
>  قلت ليهو والله يا شيطان الجرة يا اخوي الدايرو انا انت ما بتقدر عليهو
>  لكن فسحني ورجعني بحري ده وشوف باقي شغلاتك
>  قال لي اوديك بلاد الهند ولا بلاد السند ولا جمهورية المحن الديمقراطية؟
>  في حلمتي ديك فكرت كدااااا وقلت ليهو
>  بلاد الهند مع قرارات السعودية الأخيرة دي بتكون اتملت هنود راجعين من المملكة ما دايرها
>  وبلاد السند قالوا اليومين دي ناس الرخص والضرائب والعوائد والرسوم والدمغه شغالين القرف ما دايرها
>  وديني جمهورية المحن دي المشرف عاصمة الماءات الخمسة
>  قالوا البشوف محنة غيرو تهون عليهو محنتو
> بس
>  شيطان الباغه هاج وماج ولفحني ليك في الحلمة ديك وطرنا ونزلنا في عاصمة جمهورية  المحن
>  قال لي دي العاصمة لف واتفسح ولما تكون داير ترجع مسكل لي في الباغة دي
>  وفوووووو
>  عمل عجاجة زي بتاعت محمد معانا ماتغشانا ديك واختفى
>  قلت اتمشى في عاصمة جمهورية المحن
>  اول حاجة السخانة الف
>  الناس في جمهورية المحن كلها ممحنة
>  الشفع راجعين من المدرسة ممحنين
>  المدرسين ممحنين
>  المدرسات ممحنات
>  المناهج ذاتها متمحنة
>  بتاع الركشة ممحن زي بتاع الامجاد
>  الشعب كلو ممحن
>  ست التبش بالشطة ممحنة والغريبة محننة
>  اول مرة اشوف لي زول ممحن ومحنن
>  الناس زهجانة وقرفانة والشوارع وسخانة وعربية نفاياتهم ستة شهور ما جات
>  جيت جمب حي كده اسمو حي الاحنه
>  ديل كمان علي العليهم نورهم قاطع
>  لكن اخير من حي محنتي
>  ناس محنتي ديل لا نور لا خور لا موية لا مدرسة ولا عربية نفايات ولا وظائف لشبابهم
>  ناس ساااي بس
>  كوشة كبيرة جمب الزلط جو شالوها سريع وكبوها في الشارع الوراني قالوا عشان والي ولاية الاحن جاي يعزي في قريبو مات بالشارع الجمب الكوشة
>  والملفت في البلد انو البلد كلها تسهل
>  في حلمتي ديك رددت في سري فعلا البشوف محنة غيرو تهون عليهو محنتو
>  قمت قعدت لي تحت شجرة جمب راجل عجووووز
>  سلمت عليهو وقعدنا نتونس
>  قال شكلك غريب ما من البلد دي  في سري قلت ليهو هي وينا البلد
>  صاح يا حاج انا سائح
>  ضحك جنس ضحك
>  قال لي سائح ولا مجمد
>  قلت في سري عمك ده فكي خلي بالك
>  قلت ليهو يا حاج
>  انتوا في جمهوريتكم جمهورية المحن الديمقراطية دي ليه سميتوا عاصمتكم عاصمة الماءات الخمسة؟
>  قال لي ارث و شعار رفعه الاجداد من زماااان
>  واشرح ليك الماءات الخمسة
>  ما تفتح خشمك
>  ما تبطبط . ما تفكر..  ما تتلامض .. ما تنقرض
>  قلت ليهو ما معقول
>  قال لي قولة (ما) دي تاني ما ترددها
>  انت داير تزيد علينا ماءاتنا الخمسة ولا شنو
>  قلت ليهو لكن ليه؟
>  قال لي نحنا دستورنا الشغالين بيهو مستمد من سياسة الام مع اخطاء ولدها ودسها من الابو
>  قلت ليهو بالطريقة دي ما بتحلوا مشاكل البلد اقصد الولد وتحسنو تربيتو
>  قال لي لا يهمنا النتائج يهمنا فقط الدستور
>  عشان كده بالتزام الفرد مننا بالماءات الخمسة ما بكون في مشكلة
>  قلت ليهو ودعتك الله يا حاج
>  مسكلت لي شيطان الباغه بالباغة لقيت شبكة جمهورية المحن طاشة
>  من الخوف صحيت
>  اللهم اجعلو خير
>  ايها الناس
>  مجلسنا شغال في الصامت ولا ماءات حلمتي حمدتو؟
>  الله يجيبك يا شيطان الباغه تاني تخارجنا من الورطة دي
>  لكن الدايرو انا شيطان البرميل ما بقدر عليهو خلي شيطان باغه ما بتشيل كتير
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  ما شفت يا والينا
>  وما شفت يا والينا
>  وماشفت يا والينا
>  ديل كم ما؟
سلك كهربا
ننساك كيف والكلب قال في ناس ما عارفين انو كل العيش بمشي الطاحونة…بس دورو يجي ويدقق ناااااااعم
والى لقاء.
سلك

الأعمدة